Read gitonga Levhi 3 Bible Online

Levhi 3 - gitonga bible

Levhi 3

¹Muthu a gu bikela ningelo wuri wa mhamba nya patano[8], khu mombe nya kuzi, mwendro nya ngadzi, gu vbwetega nyamba hasa, a yi bikela mbeli ga PFHUMU Nungungulu.

²A na handzega mandza hungoni nya girengo nya miphaso gi bikedwego, aya gi paya nyangwatunu nya Tshatsha nya Tshangano, khu hwane, vaphasi nya mhamba, sanana sa Aroni, va na mitegedzela novba maphuvbo yatshavbo nya giluvelo.

³Avbo nya phaso nya mhamba yeyi nya patano, va na bikela mafura yatshavbo ma fumbelago mahembe, ni mafura yatshavbo ya sa ndrani, va gira ningelo nya phaso wu vbisedwago PFHUMU Nungungulu,

⁴gumogo ni dzitshwa dzatshavbo dza dzimbili ni mafura ma dzi fumbelago, ni mafura ya vbalongotunu ni aya ma fumbelago libindri, ma na duswa yatshavbo gumogo ni dzitshwa.

⁵Vaphasi nya mhamba, sanana sa Aroni, va na vbisa satshavbo vbatshani nya giluvelo, gumogo ni phaso nya guvbiswe wu handzegidwego vbatshani nya dzikhuni dzi guromo niloni; Owu ningelo nya phaso nya guvbiswe nya gunungele gwadi wu salalegisago PFHUMU Nungungulu.

⁶Muthu a guya bikela ga PFHUMU Nungungulu ningelo nya phaso nya patano khu girengo nya gidugwana, fanede gu hatha matune mwendro ngadzi nyamba hasa.

⁷A guya bikela phaso waye khu nvuta, a naya yi ningela mbeli ga PFHUMU Nungungulu;

⁸A na handzega mandza hungoni nya gifuyo nya miphaso, aya gi paya nyangwatunu nya Tshatsha nya Tshangano; khavbo avbo, sanana sa Aroni si na mitegedzela khu novba maphuvbo yatshavbo nya giluvelo.

⁹Khu guralo, avba nya phaso nya mhamba yeyi nya patano, a na ningela mafura yatshavbo.[9] Ngila watshavbo wu na pidwago khu vbalongotunu nya hwambo, ni mafura ma fumbelago mahembe, ni aya ma patanego ni sa ndrani, a gira phaso nya guvbiswe wu salalegisago PFHUMU Nungungulu;

¹⁰Dzitshwa dza dzimbili ni mafura ma dzi fumbelago ni ya vbalongotunu ni aya ma fumbelago libindri, ma na duswa gumogo ni dzitshwa.

¹¹Muphasi nya mhamba a na vbisa satshavbo vbatshani nya giluvelo. Ogu guhodza nya ningelo nya phaso wu vbisedwago PFHUMU Nungungulu.

¹²Aholu, ningelo a gu bani ari nya phongo nya ngadzi, a na yi ningela mbeli ga PFHUMU Nungungulu;

¹³a na handzega mandza hungoni nya gifuyo nya miphaso, a gi paya mbeli nya Tshatsha nya Tshangano. Khavbo avbo, sanana sa Aroni si na mitegedzela khu novba giluvelo maphuvbo yatshavbo.

¹⁴Khu hwane a na dusa mafura ma fumbelago mahembe ni aya ma patanego ni sa ndrani, a gira phaso nya guvbisedwe PFHUMU Nungungulu.

¹⁵Dzitshwa dza dzimbili ni mafura ma dzi fumbelago gumogo ni hwambo; ni gipandre nya libindri gumogo ni dzitshwa, fanede gu dzi dusa.

¹⁶Muphasi nya mhamba a na vbisa satshavbo vbatshani nya giluvelo, si khala guhodza nya phaso nya guvbiswe, nya gunungele gwadi si tsakisa. Mafura yatshavbo ma gu lumba PFHUMU Nungungulu.

¹⁷Owu nayo nya gupindruge wu na hungago sanana sanu, ni evbini mu na gu bani mu vbanya avbo: Mu nga hodzini mafura mwendro novba.”