Read gitonga Levhi 4 Bible Online

Levhi 4 - gitonga bible

Levhi 4

¹PFHUMU Nungungulu a di ganela ga Mosi, khuye:

²Ganela ga sanana sa Israyeli, u si embela, khuwe: “Muthu a gu dzipwa na ghohide, nasiri kha gwenye, aholu na giride esi PFHUMU Nungungulu a si himbedzedego gukhuye si nga girwi khu muthu, fanede gu gira, kharati:

³Oyu a nga ghohago, a gu bani ari muphasi nya mhamba a agisidwego,[10] girede libango vathu vatshavbo, khu kotani nya gughohe gwaye, a na bikela ga PFHUMU Nungungulu ningelo nya gimombyana nyamba hasa, a gira mhamba nya ditshedzo[11]

⁴A na dzega gimombyana aya gi bikela nyangwatunu nya Tshatsha nya Tshangano, mbeli ga PFHUMU Nungungulu, a na gi handzega mandza hungoni; a hegisa a gi paya mbeli ga PFHUMU Nungungulu.

⁵Khu gulandrela, muphasi nya mhamba a todzidwego mafura a na dzega novba nya gimombyana gi payidwego a bela nawo Tshatshani nya Tshangano;

⁶a na nega nyala novbani, khu novba wowo a na mitegedzela livbandre na dzimbili dzinyondro, mbeli ga PFHUMU Nungungulu, na khedzane ni mwendra wa makhuvini nya Wulanga nya Guage.

⁷Khu hwane a na vbaladza wumbe novba avba nya dzikeho nya giluvelo nya libani nya gunungele, gi guromo mbeli ga PFHUMU Nungungulu, ndrani nya Tshatsha nya Tshangano; owu wumbe watshavbo novba nya gimombyana a na wu vbaladza tshinani nya giluvelo nya miphaso nya guvbiswe, gi guromo nyangwatunu nya Tshatsha nya Tshangano.

⁸Khavbo avbo, a na dusa mafura yatshavbo nya gimombyana gi payidwego khu gighoho gyaye, aya ma fumbelago mahembe ni aya ma patanego ni sa ndrani;

⁹gumogo ni dzitshwa dza dzimbili ni mafura ma dzi fumbelago mugiwununi, ni mafura nya libindri ma na duswago gumogo ni dzitshwa;

¹⁰kha nga idzo gu girwago khidzo gimombyana nya phaso nya patano. Muphasi nya mhamba a na vbisa satshavbo vbatshani nya giluvelo nya miphaso nya guvbiswe.

¹¹Aholu, lidowo nya gimombyana ni nyama yakone yatshavbo, gu pata ni hungo ni dzizondzo, ni mahembe ni swanyi;

¹²rumba nya gimombyana gyatshavbo, a na gi dzega a gu duga nagyo vbavbandze nya lizumbo, wulangani wu agidego,[12] talatunu va vbaladzelago avbo nguma, aya gi vbisa avbo, vbadzikhunitunu. Gi na vbisedwa vbatalatunu nya nguma.

¹³A gu bani ari tshangano watshavbo nya vathu va na Israyeli va ghohidego khu guphazama, nasiri kha gwenye, va gira gilo gimwegyo gi himbedzedwago khu PFHUMU Nungungulu, va na mana nandru khu guralo.

¹⁴Gikhati gighoho va giridego gi na tugudwago, tshangano wu na bikela ningelo nya ditshedzo khu gimombyana nya kuzi va gi resa mbeli nya Tshatsha nya Tshangano.

¹⁵Madhota nya tshangano wa na Israyeli ma na handzega mandza hungoni nya kuzi, va yi paya avbo vbale mbeli ga PFHUMU Nungungulu.

¹⁶Khu gulandrela, muphasi nya mhamba a todzidwego mafura a na dzega wumbe novba nya kuzi a gu bela nawo Tshatshani nya Tshangano.

¹⁷A na nega nyala novbani, a mitegedzela khu novba wowo livbandre na dzimbili dzinyondro mbeli ga PFHUMU Nungungulu na khedzane ni mwendra nya makhuvi nya Wulanga nya Guage.

¹⁸Khu hwane, a na vbaladza wumbe novba mudzikehoni nya giluvelo gi guromo mbeli ga PFHUMU Nungungulu, Tshatshani nya Tshangano. Gasi watshavbo wu na tshalago a na wu vbaladza tshinani nya giluvelo nya phaso nya guvbiswe gi guromo nyangwani nya Tshatsha nya Tshangano.

¹⁹Khavbo avbo, a na dusa mafura yatshavbo nya kuzi a ma vbisa vbavbatshi nya giluvelo,

²⁰a na gira kuzi yeyi idzosaye ni idzo a nga girago kuzi nya phaso nya ditshedzo, khu magirelo yoyo va na Israyeli va na ditshedzwa sighoho sawe satshavbo.

²¹Khu hwane a na dzega kuzi a duga nayo vbavbandze nya lizumbo, aya yi vbisa avba a vbisidego iyo nya guphele. Owu ningelo nya phaso nya guhandze gighoho nya tshangano.

²²A gu bani ari moyo nya muthangeli a nga ghohago khu guphazama, nasiri kha gwenye, a gira gilo gimwegyo gi himbedzedwago khu PFHUMU Nungungulu waye, a dzi vangede nandru;

²³Avbo gi na tugudwago gighoho a giridego, a na resa nyamabhongwe nyamba hasa gasi gu gira khuye phaso.

²⁴A na handzega mandza hungoni nya nyamabhongwe a wu paya wulangani wu giredwego gu payela avbo miphaso nya guvbiswe, mbeli ga PFHUMU Nungungulu. Owu ningelo nya phaso nya ditshedzo.

²⁵Khu gulandrela, muphasi nya mhamba a na dzega novba nya gifuyo nya miphaso nya guvbiswe gasi gu handza gighoho, khu nyala a na todza khuwo dzikeho nya giluvelo nya miphaso nya guvbiswe; wumbe novba watshavbo a wu vbaladza tshinani nya giluvelo nya miphaso nya guvbiswe.

²⁶A na vbisa mafura yatshavbo vbatshani nya giluvelo, kha nga idzo gu girwago mafura nya phaso nya patano, khavbo avbo, muphasi nya mhamba a na gira mhamba nya ditshedzo khu gighoho gyaye, khu guralo, uye a na tsetseledwa.

²⁷A gu bani ari muthu a nga ghohago basi khu guphazama, nasiri kha gwenye, na giride gilo gimwegyo gi himbedzedwago khu Nungungulu waye, khu kharato a wu mane nandru.

²⁸A gu tugudziswa gighoho a giridego, a na resa mhamba nya phongo nya ngadzi nyamba hasa, gasi gu handzwa gighoho a giridego.

²⁹A na handzega mandza hungoni nya phongo nya mhamba nya guhandze sighoho, a yi payela wulangani va payelago avbo sifuyo nya miphaso nya guvbiswe.

³⁰Khu gulandrela, muphasi nya mhamba khu nyala a na dzega novba nya gifuyo nya phaso nya ditshedzo a thela dzikehoni nya giluvelo nya miphaso nya guvbiswe, wumbe novba watshavbo a na wu vbaladza tshinani nya giluvelo.

³¹ Khavbo avbo, a na dusa mafura yatshavbo, kha nga avbo nya phaso nya patano, a ma vbisa vbatshani nya giluvelo, kha nga mahema nya gunungele gwadi ma salalegisago PFHUMU Nungungulu; khavbo avbo, muphasi nya mhamba a na mu girela phaso nya mhamba nya ditshedzo, giwono gyaye gi na tsetseledwa.

³²Aholu, a gu bikela ningelo nya phaso nya ditshedzo, khu nvuta a na dusa ngadzi nyamba hasa.

³³A na handzega mandza hungoni nya gifuyo nya guhandze gighoho, a gi paya wulangani nya miphaso nya guvbiswe.

³⁴Khu gulandrela, muphasi nya mhamba, khu nyala, a na dusa novbanyana nya gifuyo nya phaso nya ditshedzo a thela dzikehoni nya giluvelo nya miphaso nya guvbiswe; a vbaladza wumbe novba watshavbo tshinani nya giluvelo.

³⁵Khavbo avbo, a na dusa mafura yatshavbo, kha nga avbo nya phaso nya patano, a ma vbisa vbatshani nya giluvelo, kha nga ningelo nya phaso wu vbisedwago PFHUMU Nungungulu. Khu kharati, muphasi nya mhamba a na girela muthu yoyo mhamba nya ditshedzo, uye a na tsetseledwa sighoho a giridego.