Read gitonga Levhi 6 Bible Online

Levhi 6 - gitonga bible

Levhi 6

¹PFHUMU Nungungulu a di engedza gambe a embela Mosi, khuye:

²“Muthu a gu ghoha, a gira sihoso sile nya sikhongolo si hambanago ni milayo ya PFHUMU Nungungulu; a gu bomba gu bweledza ga muthu kwawe gilo a nga phariswago, mwendro gu mu hodzela silo a nga mu lombago, mwendro gu mu bela khu mambe magirelo, gu kalavela muthu kwawe;

³mwendro, na rode gilo gya muthu gi dzimedego, a langa, a lipha khuye kha giti, ngudzungudzu a gu bwelo khavbo a sambanya malipha ga silo nya nga esi, mwendro ga gevbini gimbe gilo gi girago gu muthu a ghoha.

⁴Oyu a ghohago khu magirelo yaya, a ngu mana nandru, fanede gu bweledza gile a bidego, mwendro gu kalavela muthu kwawe; gilo a nga phariswago, mwendro gilo gi nga bani gi dzimede a gi rola;

⁵mwendro ni gimbe gilo a nga sambanyago khigyo malipha. A na livba tengo watshavbo nya gilo gyogyo, a wuya khavbo a engedzela gipimo nya livbandre nya tengo yoyo. A na ningela nivbo ga mune wakone, litshigu lolo kamwe a girago phaso nya gulivbe nandru.

⁶Fanede gu hatha nvuta nyamba hasa ya tshambini gwaye a resa ga muphasi nya mhamba, gasi gu gira mhamba nya gulivbe nandru ga PFHUMU Nungungulu, gukhedza khu tengo wu vegidwego gasi gu gira phaso nya gulivbe nandru.

⁷ Muphasi nya mhamba a na mu girela phaso nya ditshedzo mbeli ga PFHUMU Nungungulu, khavbo avbo, a na tsetseledwa milandru yatshavbo a ghohidego.”

⁸PFHUMU Nungungulu a di embela gambe Mosi, khuye:

⁹“U na ninga milayo yeyi Aroni ni sanana saye: Eyi khu milayo nya miphaso nya guvbiswe. Phaso nya guvbiswe wu na khala vbagikhotunu wutshigu watshavbo kala vbadzimindrutunu; nilo wa vbagiluvelotunu wu na simama wu dzura.

¹⁰Muphasi nya mhamba a na ambala ngandzu nya gulaphe nya seda, a ambala gambe ni gikhunyula nya seda gasi gu fenengedza givili gyaye. A na wola nguma hwane nya gu nilo na wu tsagamiside nyama nya phaso nya guvbiswe vbagiluvelotunu, a wu vega khu bambe nya giluvelo.

¹¹Khavbo avbo, a na tshula dzingandzu, a gu ambala dzimbe, gasi gu rwala nguma a duga nawo vbavbandze nya lizumbo, aya wu vbaladza wulangani wu agidego.

¹²Nilo wa vbagiluvelotunu guvbwetega wu dzura gikhati gyatshavbo nyamba tshimega. Muphasi nya mhamba a na engedzela dzikhuni matshigu yatshavbo dzimindrudzile, a handzega vbatshani gakone miphaso nya guvbiswe, a vbisa mafura nya mhamba nya pwanano.

¹³Nilo wu na dzura gikhati gyatshavbo nyamba tshimega.

¹⁴Eyi khu milayo nya miningelo nya phaso nya dzimbewu; sanana sa Aroni si na ya bikela mbeli ga PFHUMU Nungungulu na va emide mbeli nya giluvelo.

¹⁵Moyo nya vaphasi nya mhamba a na baga gyandza nya wuguvbi nya ningelo ni mafura ni libani latshavbo, a vbisa vbatshani nya giluvelo, kha nga gialakanyiso nya phaso nya gunungele gwadi wu salalegisa PFHUMU Nungungulu.

¹⁶Esi si tshalago vbamiphasotunu sa gu lumba gu hodzwa khu Aroni ni sanana saye; va na hodza kha nga gibaba nyambana mela, vari wulangani wu agidego, likupakupani nya Tshatsha nya Tshangano.

¹⁷Gibaba gegi va nga gi vawuli na va thede mela, kholu egi khu gipandre nyi va vegelago avba nya miphaso yi vbisedwago PFHUMU Nungungulu. Silo si agidego ngudzu gu fanana ni phaso nya guhandze sighoho, mwendro ni phaso nya gulivbe milandru.

¹⁸Sa gu lumba gu hodzwa basi khu sanana nya vama sa Aroni: Egi gilawulo gi ningedwago khu nayo ga sanana sanu avbo nya miningelo nya miphaso yi vbisedwago PFHUMU Nungungulu. Owu nayo wa gu hunga enu ni situgulwana sanu kala gupindruga. Muthu watshavbo a na khumbago guhodza gogu a na agiswa.

¹⁹PFHUMU Nungungulu a di embela gambe Mosi, khuye:

²⁰“Litshigu Aroni ni sanana saye va wumbedwago khu gu thedwa mafura hungoni, moyo ni moyo fanede gu bikela ga PFHUMU Nungungulu dzimhamba nya silo sesi: Gipandre nya efa nya wuguvbi nya gudadatwe, va gira miphaso nya litshigu ni litshigu, va na kabanisa khu vbakari: Gipandre va na ningela vbadzimindrutunu, gimbe gipandre va na ningela gupfolani nya lidambo.

²¹Wuguvbi wowu wu na pfangwa ni mafura, na wu sugidwe wu vidzwa gwadi, wu na gadzingwa tindzaloni, wu na reswa na wu kabanisedwe khu sipandre, muphasi nya mhamba ata gira ningelo nya guhodza nya gunungele gwadi wu salalegisa PFHUMU Nungungulu.

²²Gyanana gya Aroni gi na thedwago nigyo mafura hungoni gi wumbedwa gu khala muphasi nya mhamba wulanga wa Aroni, gi na gira nigyo kharalo gu ningela phaso nya mhamba yeyi. Kha nga nayo wu vegidwego kala gupindruga mbeli ga PFHUMU Nungungulu.

²³Khu kharati ningelo wa muphasi nya mhamba wu fanede gu vbiswa watshavbo, gimwalo gi na hodzwago avbo nya miphaso yeyi.”

²⁴PFHUMU Nungungulu a di embela gambe Mosi, khuye:

²⁵“Embela Aroni ni sanana saye, khuwe: Eyi khu milayo nya ningelo nya miphaso nya ditshedzo; girengo nya phaso nya mhamba nya ditshedzo gi na paywa mbeli ga PFHUMU Nungungulu, wulangani gu payedwago avbo sirengo nya miphaso nya guvbiswe; gilo gi agidego ngudzu.

²⁶Muphasi nya mhamba a na thangelago phaso yoyu khuye basi a na hodzago nyama yakone wulangani nya guage, likupakupani nya Tshatsha nya Tshangano.

²⁷Gilo gyatshavbo gi na kuhanago ni nyama nya miphaso gi na agiswa. Novba wakone nya girengo nya miphaso wa gu dotegedza vbangandzutunu, ngandzu yoyo yi na ya handzwa wulangani nya guage.

²⁸Khali nya libumba yi na gu phuledwago umo nyama yi na pandrwa; ya gu bani yiri ya gikete, yi na guhwa yi handzwa khu mati.

²⁹Nyama yeyi, yi na hodzwa basi khu vama va nyumbani nya wuphasi nya mhamba, kholu gilo gi agidego ngudzu.

³⁰Aholu girengo nya miphaso nya ditshedzo, egi novba wakone wu residwego Tshatshani nya Tshangano gasi guta gira mhamba nya guhandze sighoho wulangani nya guage, Nyama yakone, gima yi nga tshuki yi hodzwa; yi na vbiswa yatshavbo niloni.”