Read gitonga Jeremiya 10 Bible Online

Jeremiya 10 - gitonga bible

Jeremiya 10

¹Enu nyumba ya Israyeli, yingisani magana a mu embelago PFHUMU Nungungulu.

²PFHUMU Nungungulu a ngu ganela kharati, khuye: “Mu nga pimedzeli mavbanyelo ya mambe mayigo, ambari gu thurugiswa khu sisamadziso sa damboni; kholu va nya mayigo va ngu thurugiswa khiso.”

³Kholu sihena nya tumbunugo sa va nya mayigo kha si phasi gilo; kholu va gu koka simbo wa khabini, Wu vatwa khu meseri khu mbato.

⁴Va wu mburisela khu parata ni ndralama, va wu tiyisa khu gu wu khokhotha khu dzikhogo, gasi wu si kutsungegi.

⁵Sifananiso sawe sa gu fanana ni githombe gi vbayegwago thembweni ga mulimi gi thusa sinyoni, aholu gi si ganeligo; si lindrela muthu nya gu si khuse, kholu kha si kodzi gu gimbila; mu nga thusedzedwi khiso, kholu kha si na mi tshongisa; ambari gu mana tshivba nya gu mi gireleni iso nya sadi.

⁶Mwalo a fananago nago uwe PFHUMU Nungungulu; u khongolo, lina lago likhongolo li na ni tshivba.

⁷ U Mufumeli nya mayigo, khu mani a si yeligo gu gu ninga githawo? U fanede gu ningwa githawo; kholu vbakari ga va nya guti nya mayigo yatshavbo ni mifumo yawe yatshavbo, mwalo a fananago nago.

⁸Aholu vatshavbo va dhadhavade va vbindrugedza va khala sipumbu; kholu vanungungulu vawe va di girwa khu misimbo.

⁹Va namegedwe parata ya Tarisisi ni ndralama nya gute khu Ufazi, thumo wa muvati ni mupfhuli nya ndralama; si ambagisidwe mwendra nya livala la damboni ni giwunguwungu; Satshavbo sesi i thumo wa vathu nya gugengele.

¹⁰Aholu PFHUMU Nungungulu khuye nya lisine; uye Nungungulu a vbanyago; ni Mufumeli nya gupindruge. A gu goroga, litigo la gu ndrendremela, ni mayigo kha ma tiyi gu ema mbeli nya likhulo laye.

¹¹Khu guralo, va embeleni gukhenu: “Vanungungulu vava va ngamba gira ndzadzi ni mafu, va na fuva tigoni ni vbavbatshi nya lidambo leli.”

¹²PFHUMU Nungungulu khu tshivba yaye, khuye a giridego mafu, a tiyisa litigo khu guti gwaye, khu wugengeli waye a ladza damboni.

¹³A gu khusa lito laye, mati ma gu dzumadzuma, ma khugega mapfhi khu mahegiso nya litigo; ma veta mabara, yiwa ndzadzi, gu duga phuvbo khu wulangani yi khalago.

¹⁴Vatshavbo va si wonago va gu samala va si pimi gilo; vapfhuli vatshavbo va khala dzitshoni khu kotani nya sifananiso sawe nya guvatwe; kholu sifananiso va si pfhudego khya malipha, iso si mwalo hefemulo.

¹⁵Kha si phasi gilo va gu dzi pfhadza khu mithumo nya wukanganyisi, litshiguni la Pfhumu, si nata mwalalega.

¹⁶Nungungulu wa Jakobe kha fanani navo, kholu uye khuye a vangidego satshavbo hi si wonago; uye a gu lumba va na Israyeli, lina laye khuye PFHUMU Nungungulu nya Tshivba Yatshavbo.

¹⁷Rwalani sibubu sanu mu si dusa vbavbandze, enu mu vbahidego ga lidhoropa li randredwego.

¹⁸Kholu PFHUMU Nungungulu a ngu ganela kharati, khuye: “Khu gikhati gegi nyi na va dzudzuga hwindzo vatshavbo vavbanyi va tigoni, nyi na va tshanisa kala va ganela, khavo:

¹⁹Yowe! Libango langu khu kotani nya gumbembiswe gwangu, mbanga yangu yi mwalo rendre! Ambari khu guralo nyi di, kheni: Owu khu tsayiso wangu, nyi fanede gu wu rwala.

²⁰Tshatsha wangu wu pfhungumudwe, ni dzingodzi dzakone dzi kaviledwe; sanana sangu si nyi digide, kha nyi si woni gambe; mwalo a tshadego nya guwuse tshatsha wangu ni gu ghwimba matanga yaye.”

²¹Kholu vathangeli vathu va hambaniside nayo, kha va yingisa PFHUMU Nungungulu; khu guralo, kha va dugelela, mitshambi yawe yatshavbo yi phalalegide.

²²Yingisani! Gupwala ligwaha nya likhongolo litago khu Wuronga, gasi guta sasela madhoropa ya Judha ma khala giwula, ma vbindrugedza ma khala mavbala nya migehe.

²³Uwe PFHUMU Nungungulu, eni nyi ngu dziti gukheni ndzila nya muthu yi mwalo tshivbani gwaye, gambe mwalo a kodzago gu lulamedza ndzila yaye.

²⁴Nyi tsayise uwe PFHUMU Nungungulu, khu gululama nasiri khu dzihanyi, gasi nyi si mbembi.

²⁵“Likhulo lago li vbaladze ga mayigo ma si gutigo, ni mafumbu ma si thavigo lina lago; kholu va hodzide Jakobe va mu midza, va pfhungumula wulanga a nga bani a vbanya avbo.”