Read gitonga Jeremiya 16 Bible Online

Jeremiya 16 - gitonga bible

Jeremiya 16

¹PFHUMU Nungungulu a nyi rumede magana yaya, khuye:

²U nga dzegi nyamayi wa tigoni momu, ambari gu velega sanana nya sikhwathana nesi nya sagadzyana sa wulanga wowu.

³Kholu PFHUMU Nungungulu a ngu ganela khu mahungu nya sikhwathana ni sagadzyana si velegedwago tigoni momu, ni mayelano khu vamayi, gumogo ni vababe vawe va va velegidego tigoni momu, khuye:

⁴“Va nafa khu mitungu nya guthise, gima kha va na lidwa ambari gu dzingwa; va na mbambamela nga ndzilo ya tigoni, va na mbembiswa khu ndzala ni matshari, sirumbi sawe si na khala guhodza nya sinyoni sa damboni ni sirengo sa khabini.”

⁵Kholu, PFHUMU Nungungulu a ngu ganela kharati, khuye: U nga beli nyumbani nya gililo, ambari guya lila, gambe u nga va pweli gisiro; kholu PFHUMU Nungungulu wari khuye vathu vava kha nyi nga gu khathala gambe khavo, kha nyi va goli ambari gu va pwela wusiwana.

⁶Vakhongolo ni sanana va nafa tigoni momu nyamba dzingwa khu muthu; kha va na lidwa ambari gu dzi hatshela ni gu vbalula ndzudzu mihungoni gwawe.

⁷Gambe mwalo a na gu hodzago navo guhodza nya gililo gasi gu va tangadzisa, kholu va fedwego, ambari gu va ningwa libogo nya gu thaveledwe, ga vale va fedwego khu vavelegi vawe.

⁸Gambe u nga beli nyumbani va girago buzo u ya hengela gu hodza ni gu sela gumogo navo.

⁹ Kholu, PFHUMU Nungungulu nya Tshivba Yatshavbo, Nungungulu wa na Israyeli, a ngu ganela kharati, khuye: Wona nya gukhuwe ga matshigu yanu, nyi na fuvisa mbeli gwanu wulanga wowu, malito nya gutsake ni malito nya gunengele, malito ya mudzegi ni ya oyu a dzegwago.

¹⁰Aholu gikhati u na va tivisago mahungu yaya yatshavbo, va gu wudzisa, khavo: Gasi khu ginani PFHUMU Nungungulu a fungidego khu gu hi tsayisa khu dzimhango dzedzi? Gasi gighoho muni hi ghohedego PFHUMU Nungungulu wathu?

¹¹U na va hakha kharati, khuwe: PFHUMU Nungungulu a ngu ganela kharati, khuye: Khu kotani ya vababe vanu va nyi digidego va landrela vambe vanungungulu nyamba phasa gilo, va va khozela ni gu va thumela, va noga mbeli gwawe, va hambaniside nayo wangu va nyi pfhurarela.

¹²Khu guralo, mu dzi nyenyeziside guvbindra vababe vanu, wonani nya gukhenu muthu ni muthu a gu landrisa iso si godwago khu monyo waye nya guvivbe a si dzumeli gu nyi yingisa.

¹³“Khu guralo, nyi na mi dusa tigoni momu nyi mi yisa ga litigo mu si litigo enu ambari ni vavelegi vanu va ngamba liti; iyoyo mu na ya thumelani vanungungulu nya malipha, wutshigu ni mihani, kholu eni kha nyi na khathala gambe khenu.”

¹⁴Khu guralo, wonani nya gukhenu ma nguta matshigu, a ngu ganela PFHUMU Nungungulu, gu na gumba sambanywa gambe pwani: “PFHUMU Nungungulu a ngu vbanya, uye a nga dusa sanana sa Israyeli khu tigoni ga Egipito.”

¹⁵“Gambe va na ganela, khavo: PFHUMU Nungungulu a ngu vbanya, Uye a nga wuyisa sanana sa Israyeli khu tigoni ga Wuronga ni ga mayigoni gwatshavbo a nga bani a va phalalegisede umo; kholu nyi na va wuyisa ga litigo nyi nga ningago vababe vawe.”

¹⁶PFHUMU Nungungulu a ngu ganela kharati, khuye: Nyi na rumela tengo nya wungi nya vagogi vuta va goga; khu hwane nya isoso, nyi na rumela wumbe tengo nya vasoti, vaya va sota sigomoni ni sigomwanani, gumogo ni dziphagoni nya siwindri.

¹⁷Kholu maho yangu ma ronogede dzindzilani gwawe gwatshavbo mu dzi wonago; ni sighoho sawe satshavbo kha si sihali mahoni gwangu.

¹⁸Khu guhegula, nyi na va bweledzela khu nyondro mbili tshatshazelo nya sighoho ni wuvivbi va nga nyenyezisago khuwo litigo langu, ni sirumbi nya sifananiso sawe, si nyenyezisago thomba yangu.

¹⁹Uwe PFHUMU Nungungulu, u tshivba, muvhikeli ni wuthavelo wangu litshiguni nya mhango! Avbo gwago mayigo ma nata khu mahegiso nya litigo ma ta, khayo: “Vababe vathu va hakhide thomba nya malipha ni wupumbu nyamba phasa gilo.

²⁰Ina muthu a nga dzi kodza gu dzi girela vanungungulu, gani? Kholu avo khandri vanungungulu nya lisine!

²¹Aholu gukhugela olu guya mbeli, nyi na va layedza ni gu va gira va wona tshivba yangu, va na dziti gukhavo lina langu kheni PFHUMU Nungungulu.”