Read gitonga Jeremiya 18 Bible Online

Jeremiya 18 - gitonga bible

Jeremiya 18

¹Aya khu magana PFHUMU Nungungulu a ma rumedego ga Jeremiya, khuye:

²“Khuga u relele ndrangani ga muwumbi nya dzikhali, nyi naya gu embela iyoyo magana yangu.”

³Nyi di relela ga muwumbi, nyi ya mu mana ni thumo waye nya guwumbe vbatshani nya marodha.

⁴Muwumbi a gu wona gukhuye kanvu a wumbago kha wa duga gwadi, a di wu pfhungunula, a pheledza gu suga libumba, a gira wa walo, gukhedza khu gugola gwaye.

⁵Khavbo avbo, PFHUMU Nungungulu a di nyi resela magana yaya ma ta nyi embela, khayo:

⁶ “Enu va nyumbani ga Israyeli, ina kha nyi kodzi gu mi girani kha nga idzo a girago muwumbi yoyu, gani? A ngu wudzisa PFHUMU Nungungulu. Wonani nya gukhenu kha nga libumba li manegago mandzani ga muwumbi, enu nenu mu libumba mandzani gwangu, enu mu dugelago nyumbani ga Israyeli.”

⁷Nya gu tivisa litigo mwendro mufumo nya gukari gukheni nya na wu wugela, nyi wu pfhungumula ni gu wu mbembisa,

⁸vathu nya litigo lolo va gu dzi laya, va vbindrugedza mavbanyelo, va diga sighoho va girago, eni neni, nyi na dzi laya, nyi si va rumeli tsayiso nyi wu dongisedego gu va rumela.

⁹Khu gimbe gikhati nya gu leletisa gukheni gu vbahwa ni gu emisa litigo mwendro mufumo nya gukari,

¹⁰vathu vovo va gumba yingisa lito langu, va thuma silo nya guvivbe mbeli gwangu, eni nyi na dzi laya nyi thindregisa makategwa nyi va dongisedego.

¹¹Gasi olu, embela vathu va na Judha ni vavbanyi va Jerusalema, khuwe: PFHUMU Nungungulu a ngu ganela kharati, khuye: “Wonani nya gukhenu nyi ngu mi dongisela dzimhango ni gikungo nya gu mi wugele; dzi woneleni olu vbindrugedzani mavbanyelo yanu nya guvivbe, muthu ni muthu a ndreya ndzilani gwaye mu lulamisa dzindzila dzanu ni sigiro sanu.”

¹²Aholu avo va gu hakha, khavo: “Ethu hi mwalo mahungu khu isoso! Gambe hi na simama ni mavbanyelo yathu, muthu ni muthu a na gira iso a rumwago khu monyo waye nya guvivbe.”

¹³Khu guralo, PFHUMU Nungungulu a ngu ganela kharati, khuye: “Olu nga wudzisani mambe mafumbu ya mambe mayigo; gukhugela, khu mani a pwidego silo nya nga esi? Likendzi la Israyeli, li giride gighoho nya guthise ngudzu!”

¹⁴Ina musiwindrini ga Libhanoni gu ngu khala nyambana thondrwane, gani? Mwendro mitsongo ya sigomoni yi gogago mati nya gudzidzile nya gute khu hwindzo, ina yi ngu vbwa, gani?

¹⁵Kholu vathu vangu va nyi divade, vaya vbisela libani vanungungulu nya sifananiso; si va tshunganisa ndzilani gwawe va thega va diga ndzila yawe ya gale, gasi va ndreya va gimbila khu dzindzila dza khabini nyamba lulama;

¹⁶gasi gu gira litigo lawe li khala gisamadziso, vavbindri nya ndzila va samala, va kutsunga mihungo khilo.

¹⁷“Vathu vangu nyi na va phalalegisa vbakari ya valala vawe, nga phuvbo yitago khu Khugadambo; nyi gikha marundra nyi va pfhurarela, nyi si va yeyedzi khovbe yangu khu litshigu nya mhango.”

¹⁸Vathu va di ganela, khavo: “Hongoleni hi hunga gikungo nya guwugele Jeremiya; kholu kha gi na fuva gihevbudzo nya nayo wa muphasi nya mhamba, ni wusingalagadzi wa mugengeli, ambari magana ya muprofeti; hongoleni hiya mu paya khu malito yathu, hi nga khathali khu magana yaye.”

¹⁹Nyi wone, PFHUMU Nungungulu, upwa iso si ganedwago khu valala vangu.

²⁰Ina wuwadi wu ngu livbwa khu guvivba, gani? Kholu va nyi kembede liphala gasi gu reledza umo hefemulo wangu. Alakanya idzo nyi emidego khidzo mbeli gwago, nyi lombelela khu vathu vava gasi u si va theseli likhulo lago.

²¹Khu guralo, sanana sawe si na vbele khu ndzala, va na sasedwe khu matshari; vagadzi vawe va na wandredwe sanana, ni gu khala dzinoni; vama vakone va na vbele khu tungu, madzaha yawe ma na sasedwe khu matshari nyimbitunu.

²²Gu na pwale dzihuwa dzinyumbani gwawe, avbo u na va rumelago khu guvbiredza tsawa nya sighevenga! Kholu va nyi kembede liphala gasi gu nyi rinya umo, va riyide naphwi gasi gu nyi mola.

²³“Gasi uwe PFHUMU Nungungulu, u ngu mati gwadi makungo yawe va vbwetago gu nyi songa khayo; u nga va divaleli gighoho gegi, ni milandru yawe yi nga khali hwindzo ni maho yago; aholu va na tshunganele mbeli gwago; va girele isoso litshiguni nya likhulo lago.”