Read gitonga Jeremiya 20 Bible Online

Jeremiya 20 - gitonga bible

Jeremiya 20

¹Gikhati Pasuri, mwamana wa muphasi nya mhamba Imeri, a nga emiswago gu khala muthangeli wa Nyumbani ga PFHUMU Nungungulu, a nga pwago Jeremiya na gu profeta mahungu yaya,

²Pasuri a di bayisa muprofeti Jeremiya, ni gu mu hunga khu makhetshe a mu khothela wulangani wu guromo vbafuvbi ni nyangwa nya yikhongolo ya Bhejami, yi guromo Nyumbani ga PFHUMU Nungungulu.

³Khu litshigu li landrelago, avbo Pasuri a nga dusago Jeremiya khu pasoni, Jeremiya a di mu embela, khuye: “PFHUMU Nungungulu gukhugela muhuno kha na gu rana gambe khuye khuwe Pasuri; aholu a na gu rana khuye Gighevenga-Malangani-Yatshavbo.”

⁴Kholu PFHUMU Nungungulu a ngu ganela kharati, khuye: Wona nya gukhuwe nyi na gu gira gighevenga, u dzi thusedzela wabune ni gu thusedzela dzipari dzago; avo va na songwa khu matshari khu valala vawe nu gu va wona, va na Judha vatshavbo va na thegela mandzani ga mufumeli wa Bhabhiloni; uye a na va vbagela vayiswa wugumbini tigoni ga Bhabhiloni aya va sasela khu matshari.

⁵Gambe nyi na ningela mufumo watshavbo nya lidhoropa leli ga valala vago va phanga silo nya lisima, gumogo ni thomba yatshavbo ya vafumeli va Judha, va na dzega ni gu phanga satshavbo va si yisa Bhabhiloni.

⁶Aholu, uwe Pasuri, gumogo ni ngamo yago, mu na vbagedwa mu yiswa wugumbini Bhabhiloni; u na yafa u dzingwa iyoyo uwe gumogo ni dzipari dzago dzatshavbo u giridego nadzo wuprofeti nya malipha.

⁷Uwe PFHUMU Nungungulu u nyi kotode; uwe khuwe u gu ni tshivba guvbindra eni; tshivba yago yi ngu nyi pala, matshigu yatshavbo nya gu khala gihegiso, vathu vatshavbo va gu nyi hega.

⁸Kholu gikhati gyatshavbo nyi ganelago nya gu keta ni gu womba huwa, kheni: “Wusaseli ni gu pfhungumudwa! Kholu magana ya PFHUMU Nungungulu ma khade gihegiso gwangu ni tshanisa matshigu yatshavbo!”

⁹Khavbo avbo, nyi di, kheni: “Kha nyi na mu alakanya gambe, ambari gu ganela gambe khu lina laye;” aholu isoso si di manega monyoni gwangu kha nga nilo wu dzurago na wu sihade maramboni gwangu; nyi ngu zama gu wu segela, aholu kha nyi yi mani ndzila.

¹⁰Kholu nyi dipwa gidzemo na gi gu lemba, khigyo: “Khu maphuvbo yatshavbo hi randredwe khu sighevenga! Mu thuledzeni! Hongoleni hi mu thuledze!” “Avo va nga bani vari dzipari dzangu, va gu khedzisela guthega gwangu, va ganela, khavo: Ha gu mu tshunganisa hi na mu mana, hi kodza gu dzi phodzela.”

¹¹Aholu PFHUMU Nungungulu a na ni eni, kha nga ndrena nya tshivba; khu guralo, uye a na tshunganisa vatshanisi vangu vatshavbo va thega, va na poyidwa va tala khu dzitshoni; wusiwana wawe kha wu na vbela, gambe gima kha va na wu divala.

¹²Gasi olu, uwe PFHUMU Nungungulu nya Tshivba Yatshavbo, uwe u khedzago monyo nya muthu a lulamidego, ni guti mapimo nya monyo waye, nyi phodzele ga valala vangu na nyi gu va wona khu maho yangu, kholu nyi gu tiviside mahungu yangu.

¹³Embelelani ga PFHUMU Nungungulu, dhumisani PFHUMU Nungungulu; kholu vbulugiside hefemulo nya gisiwana mandzani nya sighohi.

¹⁴Li na vadwe litshigu nyi nga velegwago khilo! Litshigu leli mayi wangu a nyi residego khilo mafuni, li nga kategi!

¹⁵A na vadwe muthu a bikedego babe wangu, mahungu nya gutsakise, khuye: “U velegedwe gyanana nya gikhwathana! A nengela ngudzu, khuye.”

¹⁶Muthu yoyo a na fanane ni madhoropa yale PFHUMU Nungungulu, a ma pfhungumudego nyamba ma tsetsa; a napwe dzihuwa vbadzimindrutunu, vbamihanitunu a napwe ligwaha nya dzinyimbi.

¹⁷Khu ginani Nungungulu a ngamba nyi songa nyi ngari ndrani ga mayi wangu? Nari pwani a di giride kharato, mayi wangu a di hadza gu khala lithowo langu, a simama nari ni mimba gikhati gyatshavbo!

¹⁸ Gasi nyi dugede ginani khu rumbuni! Gasi nyi fela guta wona basi dzitshanisa ni guvbisega matshigu yangu ma hegisa khu dzitshoni, gani?