Read gitonga Jeremiya 23 Bible Online

Jeremiya 23 - gitonga bible

Jeremiya 23

¹PFHUMU Nungungulu a ngu ganela, khuye: Libango ga vahavisi va pfhungumulago ni gu phalalegisa dzinvuta nya tshambi wangu.

²Khu guralo, PFHUMU Nungungulu wa Israyeli a ngu ganela kharati ga vahavisi va havisago vathu vangu, khuye: Mu phalalegiside dzinvuta mu dzi dzimedza mu si khathali khidzo; khu guralo, nyi na mi tsayisa khu kotani nya mithumo yanu nya guvivbe.

³Eni mune kamwe nyi na tombanisa dzinvuta dzi tshadego, khu mayigoni gwatshavbo dzi nga bani dzi thavede umo, nyi na dzi wuyisa mavbandroni gwawe; umo dzi na guta velegelana.

⁴Nyi na dzi emisela vahavisi va na gu dzi havisago, avbo dzi na gumba thava ambari gu ndrendremela, gambe yi mwalo ni mweyo yi na dzimelago, a ngu ganela PFHUMU Nungungulu.

⁵PFHUMU Nungungulu a ngu ganela, khuye: “Wonani, ma nguta matshigu nyi na bugiselago Dhavhidhe pfhundre nya gululame; uye a na khala mufumeli, a na fumelago khu wugengeli ni guti, gambe a na lamula vathu khu nongameto.”

⁶ Matshiguni yaye, Judha a na vbanyiswa, Israyeli a na vbanya na khadzisegide khu gurula; a na ningwa lina nya gupwani: “PFHUMU Nungungulu khuye gululama gwathu.”

⁷Khu guralo, wonani nya gukhenu ma nguta matshigu, a ngu ganela PFHUMU Nungungulu, “va na gumba ganela gambe, khavo: Nyi ngu sambanya khu Pfhumu a vbanyago, a dusidego livelego la Israyeli khu tigoni ga Egipito;”

⁸“Aholu va na sambanya, khavo: Hi ngu sambanya khu PFHUMU Nungungulu a vbanyago, khuye a residego livelego la na Israyeli khu mayigoni ga Wuronga ni mayigoni gwatshavbo va thavedego umo; gambe avo va na wuya tigoni gwawe nya mavelego.”

⁹Mayelano khu vaprofeti; nyi ngu garadzega ngudzu ni monyo wangu wu ngu vila ni givili gyangu gyatshavbo gya gu ndrendremela gufanane ni muthu a dhedherekago khu gu leva khu wadwa, khu kotani ya PFHUMU Nungungulu ni magana yaye nya guage.

¹⁰Kholu litigo li tade khu wubhayi, gambe la gu lila khu kotani nya sighoho, wuhaviseloni gu bangide nyambana mwasi, sirengo kha si nga gu hodza gilo; vathu va gu tutumela gu gira silo nya guvivbe, va dzi gira dzindrena khu sighoho.

¹¹PFHUMU Nungungulu a ngu ganela, khuye: “Simbari vaprofeti ni vaphasi nya mhamba; vatshavbo va gu thuma silo nyamba sadi, ni nyumbani gwangu va gu gu nyenyezisa.”

¹²Khu guralo, dzindzila dzawe dzi na fanana ni wulanga nya gukwirige; va na redwa va thegela gidemani; kholu nyi na resa gwawe dzitshanisa khu mwaga nya tsayiso wawe; a ngu ganela PFHUMU Nungungulu.

¹³Ga vaprofeti va Samariya nyi wonide gwadi wuphuguphugu wawe; avo va di gu profeta khu lina la Bhahali, va ndreyisa vathu vangu va na Israyeli.

¹⁴ Aholu vbakari ga vaprofeti va Jerusalema nya gu wona silo nya guthise ngudzu; va gu gira wuphuphulu gumogo ni malipha, va gu kutsedzela vale va girago guvivba, gasi va si digi guvivba gwawe; vatshavbo nya gu va wona va gu fanana ni Sodhoma, ni vavbanyi va Jerusalema, va gu fanana ni Ghomora.

¹⁵Khu guralo, PFHUMU Nungungulu nya Tshivba Yatshavbo a ngu ganela kharati mayelano khu vaprofeti, khuye: “Nyi na va ninga va hodza mihandro nya guvave, bwelo khavbo va sela wuhungu; kholu khu ga vaprofeti va Jerusalema gu yadwe sighoho tigoni gwatshavbo.”

¹⁶PFHUMU Nungungulu nya Tshivba Yatshavbo a ngu ganela kharati, khuye: “Mu nga theli kota khu magana ya vaprofeti va mi embelago situmbiso nya malipha; va gu mi pwadzelani siwoniso nya myonyo yawe, yi si tigo khu ga PFHUMU Nungungulu.”

¹⁷Va gu simama va embela vale va bombago magana yangu, khavo: PFHUMU Nungungulu a ngu ganela, khuye: Mu na khalega khu gurula; va tiyisa gambe vale va si khathaligo khu magana yaye, khavo: “Li mwalo libango li na gu mi dugelelago.”

¹⁸Kholu khu mani wawe a wu tigo wusingalagadzi wa PFHUMU Nungungulu gasi gu wona ni gupwa magana yaye? Khu mani a dzi vegisidego ni gupwa magana yaye?

¹⁹Wona nya gukhuwe likhulo la PFHUMU Nungungulu li na khusega kha nga phuvbo nya gingulu vbatshani nya sighohi.

²⁰Likhulo la PFHUMU Nungungulu kha li na vbindra na li si gu giri iso li fungidego gu gira; khu matshiguni nya guhegise mu na si wona ni gu siti gwadi.

²¹Khandri eni nyi va rumidego vaprofeti vovo, aholu avo va di dzi tela khu gugola gwawe; gi mwalo nyi va rumedego gu ganela, avo va di dzi girela wuprofeti vabune.

²²Aholu nari pwani va di landrisa gugola gwangu, na va tiviside vathu magana yangu, gasi va vbindrugedze mavbanyelo yawe nya guvivbe va wuya ndzilani nya gululame.

²³PFHUMU Nungungulu a ngu ganela, khuye: “Gasi eni nyi Nungungulu nya gu bani nyiri khu vbafuvbi basi, mwendro kha nyiri Nungungulu nya gubani nyiri khu hwindzo, gani?”

²⁴Mwa gu alakanya gukhenu womo muthu a dzi kodzago gu sihala nyamba mu wona eni, gani? A ngu ganela PFHUMU Nungungulu, khuye: Ina kha mu dziti nya gukhenu eni nyi womo malangani yatshavbo ndzadzini ni mafuni, gani?

²⁵Nyi yingiside malipha ma ganedwego khu vaprofeti khu lina langu, avbo eni nyi ngamba va ninga siwoniso soso, va ganela, khavo: Hi di loriswa! Hi di loriswa!

²⁶Kala lini vaprofeti vava nya malipha va na simamago gu kanganyisa vathu vangu, khu malipha yawe va ma lugidego khu mapimoni gwawe, na?

²⁷Mwa gu alakanya gukhenu, miloro va tshamuselago yi na gira gu vathu vangu va divaledwa khu lina langu khu kotani nya miloro yawe va tshamuselanago khu gyawe, va si nyi alakanyi kha nga vababe vawe va nyi digidego gu nyi ninga githawo, va ya khozela vanungungulu nya Vabhahali, gani?

²⁸PFHUMU Nungungulu a ngu ganela kharati, khuye: “Muprofeti a lorago ndroro a na yi tshamusele, aholu uye a gu ni giningwa nya gupwe magana yangu a na ma huwelele khu gutumbega. Khu ginani mu pfangago muru ni sivbila?”

²⁹PFHUMU Nungungulu a ngu ganela, khuye: Ina magana yangu khandri ma gu vbisa gu fanana ni nilo, mwendro gikhokhotho gi pandrago siwindri, gani?

³⁰Yingisani magana ya PFHUMU Nungungulu a gukhuye nyi na dwana ni vaprofeti va wandrago magana yangu ga vakwawe.

³¹PFHUMU Nungungulu a ngu ganela, khuye: Nya gu dwana ni vaprofeti vovo va dzi profetago magana ya myonyoni gwawe; va ganela khavo, khuye a ganelago.

³²Eni PFHUMU Nungungulu nya gu dwana ni vaprofeti va resago dzindroro nya malipha, va pengisa vathu vangu, khu malipha yawe nya gukanganyise; aholu na siri eni nyi va rumidego ni gu va ninga nayo yoyu. Khu guralo, gimwalo giphaso va resago ga vathu; a ngu ganela PFHUMU Nungungulu.

³³PFHUMU Nungungulu a ngu ganela, khuye: A gu dugelela moyo nya vathu vava, muprofeti mwendro muphasi nya mhamba ata gu wudzisa, khuye: Khu gevbini gilemedzo nya giphya nya magana hi rwegidwego [9] khu PFHUMU Nungungulu u ma ganelago? U na mu hakha, khuwe: Gilemedzo khenu mu rwegago PFHUMU Nungungulu mirwalo. Uye a na mi dzudzuga mu ya hwindzo.

³⁴Muprofeti, muphasi nya mhamba mwendro mumbe muthu a na ganelago, khuye: Aya khu magana hi rumedwego khu PFHUMU Nungungulu, muthu yoyo nyi na mu tsayisa uye gumogo ni ndranga yaye.

³⁵Moyo ni moyo a na wudzisa pari gumogo ni ndriyaye, khuye: Gasi PFHUMU Nungungulu a di hakha khuye ginani? Ginani a ganedego PFHUMU Nungungulu?

³⁶Aholu mu nga ganeli gambe khu rwalo wa PFHUMU Nungungulu; kholu muthu ni muthu a na lemedwa khu magana yaye; kholu mu hambanisago ndzila nya magana ya Nungungulu a vbanyago, ya PFHUMU Nungungulu nya Tshivba Yatshavbo, Nungungulu wathu.

³⁷Mu na embela muprofeti kharati, khenu: Gasi PFHUMU Nungungulu a di gu hakha khuye ginani? Mwendro ginani a ganedego PFHUMU Nungungulu?

³⁸Aholu mwa gu ganelani, khenu: Aya khu magana hi rwegidwego khu PFHUMU Nungungulu, PFHUMU Nungungulu a ngu ganela kharati, khuye kholu mu ganelago khu maganelelo yaya khenu magana ya PFHUMU Nungungulu ma lemede, eni na nyi mi himbedzede gu ganelani gukhenu magana ya PFHUMU Nungungulu ma lemede;

³⁹khu kotani nya isoso, eni nyi na mi dzega nyi mi dzudzuga hwindzo ni eni, enu gumogo ni lidhoropa nyi mi ningidego enu gumogo ni vababe vanu.

⁴⁰“Nyi na mi poyila ni gu mi thelani dzitshoni nyamba divadwa khu muthu.”