Read gitonga Jeremiya 25 Bible Online

Jeremiya 25 - gitonga bible

Jeremiya 25

¹ Khu mwaga nya wu na nya gufume ga Jowakimi, mwamana wa Josiya, mufumeli wa Judha, gu rumedwe magana yaya ga Jeremiya, mayelano khu vathu va Judha; a diri mwaga nya guphele gufuma ga Nabhukodhonosori, mufumeli wa Bhabhiloni.

²Avbo muprofeti Jeremiya a nga huwelela ga vathu vatshavbo va Judha ni vavbanyi vatshavbo va Jerusalema a va embela, khuye:

³Gukhugela khu mwaga nya likhumi na wuraru nya gufume ga Josiya, mwamana wa Amoni, mufumeli wa Judha, kala muhuno a gu magumavili na miraru myaga, PFHUMU Nungungulu a gu nyi rumela magana, eni nyi pinyama gu mi tivisa gikhati gi nga gu dzumela, aholu enu kha mwa nyi yingisa.

⁴Dzinyondro nya dzingi PFHUMU Nungungulu a mi rumedeni sithumi saye nya vaprofeti, aholu enu kha mwa va yingisani ambari gu neredza ndzeve gasi gu vapwa,

⁵avbo va nga bani va mi embela, khavo: Olu, vbindrugedzani mavbanyelo, muthu ni muthu a diga ndzila yaye nyamba yadi ni mithumo yaye nya guvivbe, gasi mu kodze gu khala ga litigo PFHUMU Nungungulu a ningidego enu ni vababe vanu, gukhugela matshiguni ya gale kala gupindruga.

⁶Mu nga landriseli vambe vanungungulu mu va thumela ni gu va khozela, ambari gu nyi wuselani likhulo khu sifananiso mu girago khu mandza yanu, gasi nyi si mi gireli dzimhango.

⁷“Enu kha mwa nyi yingisani, a ngu ganela PFHUMU Nungungulu, aholu mu di nyi wusela likhulo khu mithumo ya mandza yanu, gasi mu dzi wuselani libango.”

⁸Khu guralo, PFHUMU Nungungulu nya Tshivba Yatshavbo, a ngu ganela kharati, khuye: “Kha nga olu mu ngamba yingisani magana yangu,

⁹wonani nya gukhenu nyi na mi rumelani mahundzu yatshavbo ya phuvbo ga Wuronga, a ngu ganela PFHUMU Nungungulu, nyi ramba ni githumi gyangu Nabhukodhonosori, mufumeli wa Bhabhiloni, nyi mu leletela gu sasela litigo ni vavbanyi vaye, ni mayigwana yatshavbo ya vbafuvbyana gwanu. Yatshavbo nyi na ma mbembisela muphelo, nyi mi vbindrugedza mu na khala gisamadziso nya guthise ni gihegiso, ni marumbi nyamba vbela.

¹⁰ Nyi na degudza mikulungwane yawe nya litsako ni gunengela, ni malito ya vadzegani kha ma na pwala, ni ligwaha nya gitshindro ni safa nya kandriya.

¹¹ Tigoni momu gwatshavbo gu na vbindrugedza gu khala giwula ni gisamadziso; mayigwana yaya, ma na thumela mufumeli wa Bhabhiloni gipimo nya livbandre na mavili magumi myaga.

¹²Khu guralo, PFHUMU Nungungulu a ngu ganela, khuye: Hwane nya gu bani gu vbede livbandre na mavili magumi myaga, nyi na tsayisa mufumeli wa Bhabhiloni khu kotani nya sighoho saye gumogo ni vathu vaye, kha nga gambe ni litigo nya Vakalidhiya nyi na li vbindrugedza li khala marumbi nyamba vbela.

¹³Nyi na tadzisa tigoni mule magana yangu yatshavbo nyi ma ganedego khu kotani nya litigo leli ni satshavbo si lovidwego libhukuni momu, iso si nga profetwago khu Jeremiya khu mahungu nya mayigo yaya.

¹⁴Kholu Vabhabhiloni navo va na khoziswa khu mayigo nya mangi ni vafumeli nya vakhongolo; khu kharato nyi na va bweledzela gukhedza khu sigiro sawe ni gukhedza khu mithumo ya mandza yawe.”

¹⁵Kholu PFHUMU Nungungulu wa Israyeli, a nyi embede kharati, khuye: “Dzega mandzani gwangu gikombe gegi nya vbinyu gi tadego khu likhulo langu u ya sedza mayigo yatshavbo nyi na gu rumelago umo.

¹⁶Gasi ma sela, ma dhedhereka ni gu pepuga mapimo, khu kotani nya dzinyimbi nyi na gu dzi rumelago vbakari gwawe.”

¹⁷Nyi di hakha gikombe khu mandzani ga PFHUMU Nungungulu nyi ninga ma sela mayigo yatshavbo aya PFHUMU Nungungulu a nga nyi rumelago gwawe, a gu aya:

¹⁸Jerusalema, madhoropa ya Judha, vafumeli ni manganagana yawe, gasi nyi va gira marumbi, ni gisamadziso, gihegiso ni givalo kha nga mu si wonago muhuno;[10]

¹⁹ni Faro, mufumeli wa Egipito, madhota, manganagana gumogo ni vathu vaye;

²⁰ni vathu nya mafumbu nya guhambanelane va vbanyago umomo, ni vafumeli vatshavbo va tigoni ga Uzi, vafumeli va tigoni nya Vafilisitiya, va Asikaloni, va Gaza, va Ekoroni ni mitshaledwa ya Asidhodhi;

²¹va Edhomi wa Mowabhi ni ga sanana sa Amoni;

²²ga vafumeli vatshavbo va Tiro, ni vafumeli vatshavbo va Sidhoni, ni ga vafumeli va khisikheyi nya yiphwa;

²³va Dhedhani, va Tema, va Bhuzi ni vatshavbo va gayago mindzudzu dzibambe;

²⁴ni vatshavbo vafumeli va Arabhiya ni vafumeli vatshavbo nya guhambanelane va vbanyago mugiwulani;

²⁵ni vafumeli vatshavbo va Ziniri, ni vafumeli vatshavbo va Elamo ni vafumeli vatshavbo va Medhi;

²⁶ni vafumeli vatshavbo va Wuronga, va vbafuvbi ni va hwindzo, khu gulandrelana, ni mifumo yatshavbo ya tigoni yi guromo vbatshani nya mafu; khu hwane nya avo vatshavbo, a na sela mufumeli wa Bhabhiloni.

²⁷PFHUMU Nungungulu nya Tshivba Yatshavbo, Nungungulu wa Israyeli, a ngu ganela kharati, khuye: “U na va embela, khuwe: Selani mu leva, mu gosa; thegani mu si wugi gambe, khu kotani nya dzinyimbi nyi na gu dzi rumelago vbakari gwanu.

²⁸Va gu bomba gu sela khu mandzani gwago gikombe nyi va rumedego, u na va embela, khuwe: PFHUMU Nungungulu nya Tshivba Yatshavbo a ngu ganela kharati, khuye: Mu na gi sela khu gikolokolo!”

²⁹Wonani nya gukhenu nya gu phela khu gu tsayisa dhoropani mule gu ranwago khu lina langu; ina enu mu na digwa nyamba tsayiswani, gani? Ahihi, kha mu na vbuluga gilo, kholu nyi womo vbafuvbi ni gu resa dzinyimbi dzi ta sasela vathu vatshavbo va tigoni, a ngu ganela PFHUMU Nungungulu nya Tshivba Yatshavbo.

³⁰PFHUMU Nungungulu a di engedza a nyi embela, khuye: “Uwe u na va tivisa satshavbo silo sesi u va embela, khuwe: PFHUMU Nungungulu a na bhonga khu vbatshani ndzadzini gu pwala lito laye khu nyumbani gwaye nya guage; a bhongela vathu vaye khu tshivba, va womba huwa nya litsako nya nga la avo va gamago dziuvha ni ga vatshavbo vavbanyi va mafuni.

³¹Ligwaha li na pwala kala mahegiso nya litigo, kholu PFHUMU Nungungulu gorogede mayigo, a na lamula vathu vatshavbo, va nya guvivbedwa khu monyo a na va sasela khu matshari, a ngu ganela PFHUMU Nungungulu.”

³²PFHUMU Nungungulu nya Tshivba Yatshavbo, a ngu ganela kharati, khuye: Wonani libango leli li na thaphela khu litigo ni litigo, khu mahegiso nya litigo, gu na duga gingulu nya guthise.

³³Khu matshigu yoyo, sirumbi nya vathu va na ningedwago khu PFHUMU Nungungulu guveni va songwa, si na mbambamela gukhugela mahegiso kala mahegiso nya litigo; mwalo a na gu va dzingago ni gu va lila, si na tadza mafu kha nga mavivi.

³⁴Lilani enu vahavisi nya tshambi, ni gu womba dzihuwa; enu nenu vathangeli nya mitshambi, puluwundrani ngumani, kholu litshigu lanu nya gusongwe ni guphalalegiswa li vbohide, nyi na mi pandra mu thega nga kanvu nya lisima.

³⁵Vahavisi va na hamuga ni ndzila nya gupfowole khiyo, ni vamune mitshambi kha va na vbuluga.

³⁶Gu pwala dzihuwa nya vahavisi, ni dzihuwa dza vamune mitshambi! Kholu PFHUMU Nungungulu a ngu pfhungumula mikova yawe.

³⁷Mikova nya gunyuge nya wuhaviselo yi na sasedwa khu gu gugumuga nya likhulo la PFHUMU Nungungulu.

³⁸ A fanana ni nghala yi dugidego khu wulangani gwaye; kholu litigo lawe li vbindrugedzidwe li khala giwula, khu kotani nya gukhondre nya likhulo la PFHUMU Nungungulu.