Read gitonga Jeremiya 26 Bible Online

Jeremiya 26 - gitonga bible

Jeremiya 26

¹ Gphelani nya mufumo wa Jowakimi, mwamana wa Josiya, mufumeli wa Judha, gu dita magana ya PFHUMU Nungungulu ga Jeremiya, khayo:

²PFHUMU Nungungulu a ngu ganela kharati, khuye: Ema likupakupani nya Nyumba ya PFHUMU Nungungulu, u embela madhoropa yatshavbo ya Judha matago mata khozela Nyumbani ga PFHUMU Nungungulu, u va embela magana yatshavbo nyi gu rumidego gukheni u va tivisa; u nga tshiyi ni limwedo nya ayo.

³A gu dzina saye va na ma yingisa va vbindrugedza mavbanyelo, muthu ni muthu a ndreya ndzilani gwaye nya guwegele, gasi eni neni nyi kodza gu diga makungo nya tsayiso nyi va dongisedego gu va resela, khu kotani nya sigiro sawe nya guvivbe.

⁴Khu guralo, va embele, khuwe: PFHUMU Nungungulu a ngu ganela kharati, khuye: Mwa gumba nyi yingisa ni gumba gimbila khu nayo wangu, nyi wu vegidego mbeli gwanu,

⁵mwa gumba yingisa gambe magana ya sithumi sangu, vaprofeti, a gu avo nyi mi rumelago gikhati gyatshavbo, gambe kala ni olu mu si va yingisago,

⁶ khu guralo, nyumba yeyi nyi na yi gira yi fanana ni Silo, ni lidhoropa leli nyi na li vbindrugedza li khala givalo ga mayigo yatshavbo ya mafuni.

⁷Vaphasi nya mhamba, vaprofeti ni vathu vatshavbo va dipwa magana yaya a nga bani na gu ganela Jeremiya Nyumbani ga PFHUMU Nungungulu.

⁸Avbo Jeremiya a nga vbedzago gu ganela satshavbo iso a nga bani na gu leletedwe khu PFHUMU Nungungulu, a gu si ganela a embela vathu, vaphasi nya mhamba, vaprofeti ni vathu vatshavbo va di mola Jeremiya, va ganela, khavo: “Khu lisine u nafa!

⁹Khu ginani u profetago khu lina la PFHUMU Nungungulu, khuwe: Ndranga yeyi yi na fanana ni Silo, ni lidhoropa leli li na khala marumbi nyamba khadwa khu vathu?” Vathu vatshavbo va nga bani vari Nyumbani ga Nungungulu va di randrela Jeremiya.

¹⁰Avbo manganagana ya tigoni ga Judha ma ngapwago magana yaya, va di khuga khu ndrangani ga mufumeli va gwela Nyumbani ga PFHUMU Nungungulu va ya khala vbanyangwatunu yi ranwago gupwani: “Nyangwa nya Yiphya ya PFHUMU Nungungulu.”

¹¹Khavbo avbo, vaphasi nya mhamba ni vaprofeti va di embeledzela manganagana ni vathu vatshavbo, khavo: “Muthu yoyu fanede gufa, kholu a profetide guvivba a wugela lidhoropa leli, kha nga mu si pwidego khu dzindzeve dzanu.”

¹²Jeremiya a di embela manganagana yatshavbo ni vathu vatshavbo, khuye: “PFHUMU Nungungulu a nyi rumede gu profeta khu mahungu nya nyumba yeyi ni lidhoropa leli, khu magana yatshavbo yaya mu ma pwidego.”

¹³Gasi olu, vbindrugedzani mavbanyelo yanu ni sigiro sanu mu yingisani lito la PFHUMU Nungungulu wanu; khavbo uye a na gu bweledzago tsayiso a wu ganedego khu kotani yanu.

¹⁴Gasi eni kheni oyu, nyi womo mandzani gwanu; girani kheni iso mu si wonago na siri sadi na si lulamide khu eni.

¹⁵Gambe dzitini gwadi nya gukhenu, mwa gu nyi songa, mu na bani mu vbaladzide novba wu gu mwalo nandru vbatshani gwanu, vbatshani nya lidhoropa leli ni vbatshani nya vavbanyi vaye; kholu PFHUMU Nungungulu a nyi rumede guta mi pwadzelani dzindzeveni gwanu yatshavbo magana yaya.

¹⁶Khavbo avbo, manganagana ni vathu vatshavbo, gumogo ni vaphasi nya mhamba ni vaprofeti va di ganela, khavo: “Muthu yoyu mwalo nandru nya guyele gu songwa, ganede ga ethu, khu lina la PFHUMU Nungungulu wathu.”

¹⁷Ma di khuga nayo madhota nya gukari ya tigoni va embela tshangano watshavbo nya vathu, khavo:

¹⁸ Na nga gu fuma Ezekhiya, mufumeli wa Judha, muprofeti Mikeya wa Morasi, a hi profetide a ganela ga vathu vatshavbo va Judha, khuye: PFHUMU Nungungulu nya Tshivba Yatshavbo ganede kharati, khuye: Siyoni a na limwa nga lithembwe, Jerusalema a na vbindrugedza a khala litala nya marumbi, lina nya Nyumba ya Nungungulu li vbindrugedza li khala gigomo gi bhiyidwego khu likhabi.

¹⁹Ina Ezekhiya, mufumeli wa Judha, gumogo ni vathu vatshavbo va na Judha va mu songide, gani? Ina uye kha nga ninga githawo PFHUMU Nungungulu, ina kha va lomba gasi PFHUMU Nungungulu a va pwela wuhindzi khu gu va divalela ga tsayiso a nga bani a va dongisede, gani? Aholu ethu ha gu vbweta gu dzi thelela ginani libango khu gu songa muthu yoyo, na?

²⁰Gu diromo gambe mumbe muprofeti, lina laye a di ranwa gupwani khu Uriya, mwamana wa Simaya, wa Kiriyati-Jeyarimi, a di ganela nuye khu lina la PFHUMU Nungungulu khu kotani ya Jerusalema ni litigo la Judha, khu magana nya gufanane ni ya Jeremiya.

²¹Mufumeli Jowakimi na pwide magana yaya ya Uriya uye gumogo ni dzindrena dzaye dzatshavbo ni manganagana yatshavbo, mufumeli a di vbweta dzindzila nya gu mu songe; aholu avbo Uriya a ngapwago esi, a di tala khu hwanga a thavela tigoni ga Egipito.

²²Aholu mufumeli Jowakimi, a di rumela Elinatani, mwamana wa Akibhori, ni vambe vama va mu landra tigoni ga Egipito.

²³Va ya mu mola va wuya naye, vata mu ningela ga mufumeli Jowakimi, uye a di rumela gu va mu songa khu litshari, girumbi gyaye gi dzudzugwa phalani nya sirumbi nya singi.

²⁴Ayikamo, mwamana wa Safani, khuye a nga vbulugisago muprofeti Jeremiya gu songwa khu gidzemo.