Read gitonga Jeremiya 28 Bible Online

Jeremiya 28 - gitonga bible

Jeremiya 28

¹ Khu mwaga wa moyo, guphelani nya gufume ga Zedhekiya, mufumeli wa Judha, khu ngima nya livbandre, nya mwaga nya wu na, Hananiya, mwamana wa Azuri, muprofeti wa Gibheyamu, a dita nyi embela Nyumbani ga PFHUMU Nungungulu, mbeli ga vaphasi nya mhamba ni vathu vatshavbo, na va gu sipwa, khuye:

²“PFHUMU Nungungulu nya Tshivba Yatshavbo, Nungungulu wa Israyeli a ngu ganela kharati, khuye: Nyi fanyide kanga wa mufumeli wa Bhabhiloni.

³Hwane nya gu bani na gu vbindride myaga mivili, nyi na wuya gambe ga wulanga wowu, nyi resa sombo satshavbo sa Nyumbani gwa PFHUMU Nungungulu, iso si nga dzegwago khu Nabhukodhonosori, mufumeli wa Bhabhiloni a hongola naso.

⁴Nyi na wuyisa gambe wulangani wowu Jekoniya, mwamana wa Jowakimi, mufumeli wa Judha, ni vatshavbo va na Judha va vbagedwego va yiswa wugumbini Bhabhiloni; kholu nyi na funya kanga wa mufumeli wa Bhabhiloni.” A ngu ganela PFHUMU Nungungulu.

⁵Khavbo avbo, muprofeti Jeremiya, a di phindrula muprofeti Hananiya, nari mbeli ga vaphasi nya mhamba ni gidzemo gi nga bani gi tshanganide Nyumbani ga PFHUMU Nungungulu:

⁶Khu guralo, muprofeti Jeremiya a di khuye: Amen! Si na girege; PFHUMU Nungungulu a na gire kha nga idzo a ganedego khidzo; a na tiyise PFHUMU Nungungulu magana yago, ayo u ma ganedego, Uye a na bweledze sombo satshavbo si phangidwego Nyumbani ga PFHUMU Nungungulu gumogo ni vathu vatshavbo va vbagedwego va yiswa wugumbini tigoni ga Bhabhiloni.

⁷Aholu tula ndzeve u yingise magana nyi gu embelago uwe gumogo ni vathu vatshavbo, kheni:

⁸Vaprofeti va vbindridego hwane gwangu ni uwe, va ganede ga mayigo nya gutale ni ga mifumo nya yikhongolo, va di ganela khu dzinyimbi, dzimhango, mitungu ni ndzala.

⁹Gambe muprofeti a gu profeta khuye, gu na manega gurula, magana yaye ma tadzisega, khavbo a gupwani lisine, rumidwe khu PFHUMU Nungungulu.

¹⁰Khavbo avbo, muprofeti Hananiya a di dzega kanga wu nga bani wuri thamoni ga muprofeti Jeremiya, a wu fanyeledzela;

¹¹a ganela mbeli nya vathu vatshavbo, khuye: “PFHUMU Nungungulu a ngu ganela kharati, khuye: Gu na girega kharato, hwane nya myaga mivili, nyi na bani nyi fanyide kanga wa Nabhukodhonosori, mufumeli wa Bhabhiloni a wu rwegidego dzithamoni nya mayigo yatshavbo.” Khu guralo, muprofeti Jeremiya a di khuga a hongola.

¹²Hwane nya gu bani muprofeti Hananiya na fanyide kanga wa thamoni ga Jeremiya, PFHUMU Nungungulu a di ganela ni Jeremiya, khuye:

¹³“Indra, u ya embela Hananiya, khuwe: PFHUMU Nungungulu a ngu ganela kharati, khuye: U fanyide kanga nya simbo, aholu, vbatshani nya uwo nyi na gira nya dzisimbi.

¹⁴Kholu PFHUMU Nungungulu nya Tshivba Yatshavbo, Nungungulu wa Israyeli, a ngu ganela kharati, khuye: Vatshavbo vathu vava nyi na va rwega kanga nya dzisimbi dzithamoni gwawe. Gasi va thumela Nabhukodhonosori, mufumeli wa Bhabhiloni; nyi mu ninga gambe ni tshivba nya gufumele sirengo sa khabini.”

¹⁵Muprofeti Jeremiya a di embela muprofeti Hananiya, khuye: “Hananiya, olu yingisa malito yangu: Uwe khwa rumedwa khu PFHUMU Nungungulu, uwe wa gu pengisa vathu va khodwa khu malipha yago.

¹⁶Khu guralo, PFHUMU Nungungulu a ngu ganela kharati, khuye: Wona nya gukhuwe Eni nyi na gu dusa mafuni, u nafa ndrani nya mwaga yoyu, kholu u profetide malipha u wugela PFHUMU Nungungulu.”

¹⁷Muprofeti Hananiya a difa khu ngima nya livbandre na wuvili, nya mwaga wowo.