Read gitonga Jeremiya 39 Bible Online

Jeremiya 39 - gitonga bible

Jeremiya 39

¹Khu mwaga nya livbandre na wu na nya gufume ga Zedhekiya, khu ngima nya likhumi, a dita Nabhukodhonosori, mufumeli wa Bhabhiloni, gumogo ni masotshwa yaye yatshavbo, ata dhumela Jerusalema ni gu li randrela.

²Khu litshigu nya livbandre na mana, nya ngima nya wu na, nya mwaga nya likhumi na moyo nya gufume ga Zedhekiya, gu di tudwa gihogo vbalibhiyotunu nya lidhoropa.

³Vathangeli vatshavbo nya nyimbi ya mufumeli wa Bhabhiloni, va di bela va ya ema Vbamwanyatunu wa Vbakari, a diri ava: Nerigali-Sarezeri, Sangari-Nebho, Sarisekimi, Rabhi-Sarisi, Nerigali-Sarezeri, Rabhi-Magi ni dzimbe dzindruna dza mufumeli wa Bhabhiloni.[12]

⁴Zedhekiya, mufumeli wa Judha, gumogo ni masotshwa yaye yatshavbo, na va gu wona esi si dugelelago, va di tutuma, va duga dhoropani ni vbakari nya wutshigu, khu ndzila nya lithembwe la mufumeli khu mwanya wa vbakari ni vbakari nya mabhiyo mavili; va dzega ndzila nya guhongole Rabha.

⁵Aholu masotshwa nya Vakalidhiya ma di va lundra; ma ya mana Zedhekiya panini gwa Jeriko. Va mu mola, va mu yisa ga Nabhukodhonosori, mufumeli wa Bhabhiloni, a nga bani nari Ribala, tigoni ga Hamati avbo a nga ya lamuledwa avbo khu mufumeli wa Bhabhiloni.

⁶Mufumeli wa Bhabhiloni a di rumela gu songwa sanana sa Zedhekiya dhoropani ga Ribala na gu si wona; a rumela gu songwa gambe vathangeli va Judha.

⁷Khu hwane, a di rumela gu poledwa maho Zedhekiya va mu hunga khu makhetshe mavili nya sugu va mu yisa Bhabhiloni.

⁸Vakalidhiya va di vbisa nyumba ya mufumeli gumogo ni dzinyumba dza vathu, va khungumulela gambe mabhiyo ya Jerusalema.

⁹Vathu vatshavbo va nga tshalago dhoropani, gumogo ni vayeyisi va nga bani va dzi ningede gwaye ni mitshaledwa nya vathu, Nebhuzaradhani, muthangeli nya dzighadhi, a di va vbagela a va yisa wugumbitunu Bhabhiloni.

¹⁰Aholu vale nya sisiwana vbakari nya vathu va nga bani vari mwalo thomba, Nebhuzaradhani, muthangeli nya dzighadhi a di va diga va khala tigoni ga Judha. Khu matshigu yale, a di va ninga gu sayisa marembwe nya miuvha ni malime.

¹¹Aholu Nabhukodhonosori, mufumeli wa Bhabhiloni, a di ningide nayo Nebhuzaradhani muthangeli nya dzighadhi, mayelano khu Jeremiya, khuye:

¹²“Gimbila uya mu dzega, gambe mu sayise gwadi; u nga mu tshanisi, aholu gira iso a na gu gu lombago.”

¹³Khu magirelo yoyo, Nebhuzaradhani, muthangeli nya dzighadhi, a di ruma Nebhusazibhani, Rabhi-Sarisi, Nerigali-Sarezeri, Rabhi-Magi gumogo ni dzindruna dzatshavbo dza mufumeli wa Bhabhiloni.

¹⁴Va di rumela gu ya duswa Jeremiya umo nya likupakupa la dzighadhi va mu ningela ga Gedhaliya, mwamana wa Ayikamo, mwamana wa Safani, gasi a mu dzege a mu yisa nyumbani gwaye nya wufumu. Khu magirelo yoyo, Jeremiya a di simama gu khala vbakari ga vathu vaye.

¹⁵Jeremiya, na ngari pasoni nya likupakupa nya dzighadhi, PFHUMU Nungungulu a di mu rumede magana yaya, khuye:

¹⁶“Indra uya tivisa Ebhedhi-Meleki, Muetiyopi, khuwe: PFHUMU Nungungulu nya Tshivba Yatshavbo, Nungungulu wa Israyeli, a ngu ganela kharati, khuye: Wona, nyi na landrisa magana yangu vbatshani nya lidhoropa leli nasiri khu wuwadi, aholu khu wuvivbi; si na girega mahoni gwago ga litshigu lile kamwe.

¹⁷Khu guralo, Eni nyi na gu vbulugisa ga litshigu lile, khu na thegela mandzani ga vathu vale u va thavago; a ngu ganela PFHUMU Nungungulu.

¹⁸Kholu Eni khu lisine nyi na gu vhikela; khu na songwa khu litshari, aholu u na vbanyisa womi wago, kholu u tumbide Eni,” a ngu ganela PFHUMU Nungungulu.