Read gitonga Jeremiya 4 Bible Online

Jeremiya 4 - gitonga bible

Jeremiya 4

¹PFHUMU Nungungulu a ngu ganela, khuye: Wa gu vbindrugedza mavbanyelo uwe Israyeli, u na wuya avbo gwangu. Wa gu ndreyisa mbeli gwangu manyala yago, khu na legalega gambe,

²wa gu sambanya khu lina la PFHUMU Nungungulu a vbanyago, u gimbila khu ndzila ni lisine ni gululama, mayigo yatshavbo ma na kategiswa, gambe ma na zundzega khu kotani yago.

³ PFHUMU Nungungulu a ngu ganela kharati ga vathu va Judha ni Jerusalema, khuye: “Limani marembwe yanu nya maphya, gambe mu nga yali dzimbewu mibani.

⁴Khalani vathu va hanidego wugwera mahoni gwa PFHUMU Nungungulu, dusani guvivba gwa myonyoni gwanu enu vathu va Judha ni enu vavbanyi va Jerusalema, gasi mu sivbyi khu nilo nya likhulo langu, nyamba manega ni moyo nya gu wu tshime, khu kotani nya mithumo yanu nya guvivbe.

⁵Tivisani tigoni gwa Judha! Mu huwelela Jerusalema, khenu: Wombani pundru tigoni momu gwatshavbo! Khusani malito mu laledza mu ganela, khenu: Tombanani! Hongoleni hi thave hi tutumela madhoropani nya makhokhola!

⁶Ghwimbani ngavbya mu thonona Siyoni, thavani khu guvbiredza mu vbweta wulanga nya gusihale avbo! Kholu eni nyi ngu resa libango khu Wuronga, a gu gusasedwa nya gukhongolo ngudzu.”

⁷Nghala yi dugide khu phalani gwaye, ni musaseli nya mayigo womo ndzilani; khugide wulangani gwaye gasi guta sasela litigo lago. Madhoropa yago ma pfhungumudwe ma khala marumbi gu si khali muthu umomo.

⁸Khu guralo, ambalani silendra mu lila ni gu womba dzihuwa; kholu nilo nya likhulo la PFHUMU Nungungulu kha wa ndreya mbeli gwathu.

⁹Khu litshigu lolo, a ngu ganela PFHUMU Nungungulu, khuye: “Vafumeli ni dzindruna nya mufumo va na vbela tshivba; vaphasi nya mhamba va na pilega hwambo ni vaprofeti va na samala.”

¹⁰Khavbo avbo, eni nyi di ganela, kheni: “Ah! PFHUMU Nungungulu! Khu lisine U kanganyiside vathu vava gumogo ni Jerusalema, khuwe: Va na mana gurula; nga wona olu matshari ma va payago kala vbamonyotunu.”

¹¹Khu gikhati gyogyo, va na embedwa vathu vava ni Jerusalema, pwani: “Phuvbo nya guvbise ya musigomoni nya giwula yi na furugedza khu mudzindzilani dza nyamahegyane wa vathu vangu, nasiri gu vbevbera mwendro gu hetshetsha.” [4]

¹²Phuvbo yeyi nyi na yi resago yi na bani yiri ni tshivba ngudzu, gasi guta va lamula khiyo.

¹³Mupfhungumuli a nata kha nga lipfhi nya gingulu, dzikareta dzaye dzi nata kha nga gipupwane; dzikavalu dzaye dzi na vbuvba guvbindra maghama. Libango avbo gwathu, kholu hi ngu mbemba!

¹⁴Handza monyo wago uwe Jerusalema, diga gu gira guvivba, gasi u kodze gu mana guvbanya! Kala lini nu gu fundrela makungo nya guvivbe monyoni gwago?

¹⁵Kholu li ngu pwala lito khu dhoropani ga Dhani, li resago libango nya likhongolo li khugela sigomoni sa Efrayimi.

¹⁶Huwelelani esi ga mayigo, mu tivisani ga Jerusalema, khenu: “Libutho ya valala va nguta khu mayigoni ya hwindzo na va gu laledza khu lito nya gukhugege guta sasela madhoropa ya Judha.”

¹⁷Va ngu randrela Jerusalema, gu fanana ni vama va ghadhago thembweni, kholu vavbanyi vaye va nyi wugede. A ngu ganela PFHUMU Nungungulu.

¹⁸Mapimo ni mithumo yago khiso si gu reselago libango leli; idzo wu vavago khidzo tsayiso yoyu! Wa gu paya kala monyoni gwago!

¹⁹Yowe, libango langu! Monyo wangu guvbisega khu gupwa wuvi. Monyo wangu wu tade khu gikhuma, kha nyi kodzi gu hefemula! Aholu kha nyi na degula, kholu dzindzeveni gwangu gupwala ligwaha ni pundru nya nyimbi.

²⁰Gupwala gusasedwa vbatshani nya gusasedwe, litigo langu latshavbo li pfhungumudwe; khu githugedza gu di khungumudwa mitshatsha ni wuthavelo wangu.

²¹Kala lini nyi na gu wona ngavbya, ni gupwa lito nya gudzume nya mipundru, na?

²²Vathu vangu mapemi, olu kha va nyiti gambe; sanana nya sipumbu nyambana mapimo; va gu gengelela ngudzu gu gira guvivba, aholu va tandrega gu gira iso nya sadi.

²³Nyi di khedza mafuni, nyi gu wona na guri mwalo giwumbelo; nyi khedza ndzadzini, gu diri mwalo guwonegela.

²⁴Nyi di khedza sigomo, si di tsekatseka, ni sigomwana si di gu lengalenga.

²⁵Nyi di khedza, nyi si woni ni givangwa gimwegyo nya muthu, sinyoni satshavbo sa damboni si di vbuvbide.

²⁶Nyi di wona litigo nya gunone li vbindrugedza li khala giwula, madhoropa yaye yatshavbo ma di pfhungumudwe mbeli ga PFHUMU Nungungulu, khu kotani nya likhulo laye.

²⁷Kholu PFHUMU Nungungulu a ngu ganela kharati, khuye: Litigo latshavbo li na pfhungumudwa li khala giwula; aholu kha nyi na li mbembisela muphelo.

²⁸Khu guralo, mafuni gu na lidwa, ni ndzadzini gu na sivbala; kholu khiso nyi fungidego, kha nyi dzi layi ambari gu bwelela hwane.

²⁹Madhoropa yatshavbo ma na tutuma ma thava khu kotani nya ligwaha nya vakhileli nya dzikavalu ni vakhwandri nya siholoma, vathu vaye va na thava va ya sihala sipoponi ni dziphagoni; madhoropa yatshavbo ma na khala na mari marumbi nyamba khadwa khu muthu.

³⁰Gasi olu uwe Jerusalema, u tshadego wenga nuri marumbi, u na gira gambe ginani? Ambari u ambalago guambala nya giwunguwungu, u dzi mburisela khu siphatiphati nya ndralama, u engedzela gu pendra maho yago, ni gu tola mafura nya gunungele; sibhayi kha si gu khathaleli gambe, sa gu vbweta gu gu songa.

³¹Kholu nya gupwa lito nya miketo nya gufanane ni nyamayi a lumwago, miketo nya wuvi ya nyamayi nya tiwula. Lito la lidhoropa la Siyoni li lilago na li gu khusa mandza, khilo: Yowe! Nyi fude, hefemulo wangu wu vbede tshivba khu kotani nya vasaseli!