Read gitonga Jeremiya 44 Bible Online

Jeremiya 44 - gitonga bible

Jeremiya 44

¹Aya khu magana ya PFHUMU Nungungulu ma ganedwego khu muprofeti Jeremiya ga Vajudha vatshavbo va nga bani vari tigoni ga Egipito, na va vbahide Migidholi, Tafinisi, Menfisi ni tigoni gwa Patrosi, khuye:

²“Pfhumu nya Tshivba Yatshavbo, Nungungulu wa Israyeli, a ngu ganela kharati, khuye: Enu mu si wone idzo nyi nga tsayisago khidzo Jerusalema gumogo ni madhoropa yatshavbo ya na Judha; ayo ma khade muhuno marumbi nyamba khadwa gambe khu muthu;

³khu kotani nya wuvivbi va giridego va wusa likhulo langu, khu gu vbisela libani ni gu khozela vambe vanungungulu, va si vatigo, avo ambari vababe vawe va ngamba vati.

⁴Gukhugela guhegulani nyi mi rumedeni vaprofeti, a gu sithumi sangu guta mi kawuka gukheni, mu nga giri silo nya gunyenyeze kholu Eni kha nyi si goli.

⁵Aholu, avo kha va nyi yingisa, ambari gu phuphuta ndzeve yawe va vbindrugedza mavbanyelo nya guvivbe, mwendro gu diga gu vbisela libani vambe vanungungulu nyamba phasa gilo.

⁶Kotani nya isoso, nyi di guhula likhulo ni khorodza [13] yangu si ta vbisa madhoropa ya Judha gumogo ni dzindzila dza Jerusalema; muhuno ma khade marumbi ni giwula nyambana muthu kha nga mu si wonago.”

⁷Gasi olu, PFHUMU Nungungulu nya Tshivba Yatshavbo, Nungungulu wa Israyeli, a ngu ganela kharati, khuye: “Khu ginani mu dzi vangelago libango leli mwabune, kala gufa vbakari gwanu vama, vanyamayi, sanana, niso sa beleni; gu si tshali ni moyo nya guvbanye?

⁸Khu ginani mu wusago likhulo langu khiso mu girago, nya guvbisele libani vambe vanungungulu tigoni ga Egipito, umo mu dzudego guta vbanya umo? Khu ginani mu dzi vangedego lufu, avbo mayigo yatshavbo ma mi wonago kha nga gilo nya gihegiso ni givalo mbeli gwawe.

⁹Gasi mu di divaledwa khu sighoho si giridwego khu vababe vanu, ni guvivba gu giridwego khu vafumeli va Judha, ni guvivba ga vanyamayi nugo ga vagadzi vanu va gu giridego tigoni gwa Judha ni dzindzilani dza Jerusalema, gani?

¹⁰Kala na muhuno mu si gu dzi layi, ambari gu yeyedza githawo ni gu landrisa nayo ni sileletelo nyi si vegidego mbeli gwanu ni ga vababe vanu.”

¹¹Khu guralo, PFHUMU Nungungulu nya Tshivba Yatshavbo, Nungungulu wa Israyeli, a ngu ganela kharati, khuye: “Nyi na thendregedza khovbe yangu nyi mi pfhurarela, nyi mbembisa va na Judha vatshavbo.

¹²Nyi na dzega mitshaledwa ya na Judha, avo va fungidego guya luvela tigoni ga Egipito; vatshavbo va na sasedwa vafa khu matshari ni ndzala tigoni ga Egipito; gu nafa sanana ni vakhongolo, va na khala gilo nya gisamadziso ni gihegiso.

¹³Nyi na tsayisa vatshavbo avo va khalago tigoni ga Egipito, khu matshari, ndzala ni mitungu, nga idzo nyi nga tsayisago khidzo lidhoropa la Jerusalema.

¹⁴Avbo nya gu, mwalo na moyo nya mitshaledwa ya na Judha a na vbulugago nya avo va na guya vbanyago tigoni ga Egipito kha nga valuveli; mwalo ni moyo a na gu wuyago tigoni gwawe ga Judha, ambari a nga bani ari gu suva gwawe; va na wuya basi vadugwana va na gu vbulugago.”

¹⁵Khavbo avbo, vama vatshavbo va nga bani va dziti nya gukhavo vagadzi vawe va ngu vbisela libani vambe vanungungulu, ni vanyamayi vatshavbo va nga bani varomo vbale, ni gidzemo gyatshavbo nya vathu va nga bani va vbanya tigoni ga Egipito, gipandre gya Patrosi, va di phindrula Jeremiya, khavo:

¹⁶“Magana u hi embelago nya gukhuwe ma guta khu ga PFHUMU Nungungulu, ethu gima kha hi na gu yingisa!

¹⁷Aholu, ethu hi na gira satshavbo iso hi hungidego gu gira, si gu esi: Gu vbisela libani Pfhumugadzi ya Ndzadzini, hi ningela gwaye miphaselo nya wadwa kha nga idzo hi nga bani hi gu gira ni vababe vathu, vafumeli ni manganagana yathu, madhoropani ya Judha ni dzindzilani dza Jerusalema; khu matshigu yoyo, ethu hi di gu mana guhodza nya gungi, hi di gimbila na hi tsakide nyamba garadzwa khu gilo.

¹⁸Aholu, gukhugela avbo hi nga emago gu vbisela libani Pfhumugadzi ya Ndzadzini ni gu mu ninga miningelo nya wadwa, kha hi ngu gu mana gambe gilo, ha gu sasedwa basi khu matshari ni gufa khu ndzala.”

¹⁹Vanyamayi va di engedza gu ganela, khavo: “Wa gu alakanya gukhuwe avbo hi nga bani hi gu vbisela libani ni gu gira miphaselo nya wadwa ga Pfhumugadzi ya Ndzadzini, ni gu gira sibaba nya gu mu khozele, gu diri silo nya gu si khugele nyamba tidwa khu vama vathu, gani?”

²⁰Khavbo avbo, Jeremiya a di phindrula vathu, vama ni vanyamayi ni vathu vatshavbo va nga ganelago khu ndzila yoyo, khuye:

²¹“Ina libani mu vbisidego enu ni vababe vanu, vafumeli vanu, manganagana yanu ni vathu vatshavbo va tigoni, madhoropani ga Judha ni makondroni ya Jerusalema, ina mwa gu pimisa gukhenu PFHUMU Nungungulu kha si alakanyi, a si divade, gani?

²²PFHUMU Nungungulu garade khu gu timisela mithumo yanu nya guvivbe ni manyala yatshavbo mu nga bani mu gira; khu guralo, litigo lanu li sasedwe li khala marumbi, li khala gisamadziso ni givalo, nyamba khadwa khu muthu, kha nga mu si wonago muhuno.

²³Libango leli, li mi thegede kholu enu mu di vbisela libani sifananiso, mu ghohela PFHUMU Nungungulu, mu si yingisi magana yaye, ni gu landrisa nayo ni sileletelo saye, kha nga mu si wonago muhuno.”

²⁴Jeremiya a di embela vathu ni vanyamayi vatshavbo, khuye: Upwani iso a ganelago PFHUMU Nungungulu, enu Vajudha mwatshavbo mu manegago tigoni ga Egipito.

²⁵Pfhumu nya Tshivba Yatshavbo, Nungungulu wa Israyeli, a ngu ganela kharati, khuye: Enu gumogo ni vagadzi vanu mu sambanyide khu magana yanu, mu bwelo khavbo mu gira khu mandza yanu, khenu: Khu lisine hi na tadzisa gisambanyo gyathu hi giridego, nya guvbisele libani Pfhumugadzi ya Ndzadzini ni gu ninga miningelo nya miphaso nya wadwa; ina kamwe, tadzisani ni gu tiyisa gifungo gyanu!

²⁶Ambari khu guralo, enu mwatshavbo Vajudha mu khalago tigoni ga Egipito, yingisani magana ya PFHUMU Nungungulu a gukhuye: Wonani nya gukhenu Eni, nyi ngu sambanya khu lina langu nya likhongolo, a ngu ganela PFHUMU Nungungulu khuye, tigoni gwatshavbo ga Egipito, gima kha na manega ni moyo nya Mujudha a na gu sambanyago gambe khu lina langu, khuye: Khu lina la PFHUMU Nungungulu a vbanyago.

²⁷Gikhati gyatshavbo nyi na va suvela dzimhango nasiri makategwa; Vajudha vatshavbo va vbanyago tigoni ga Egipito, va na mbembiswa khu matshari ni ndzala kala va vbela vatshavbo.

²⁸Vadugwana ngudzu avo va na gu vbulugago gu sasedwa khu matshari va wuya tigoni gwawe Judhiya; avo va na vbulugago nya va na Judha va nga bani va khade valuveli tigoni ga Egipito, va na dziti nya gukhavo magana ya mani ma tiyidego: Ayo yangu, mwendro yawe.

²⁹PFHUMU Nungungulu a ngu ganela, khuye: Eyi yi na bani yiri ndzila nya gu yeyedze ga enu nyi na gu mi tsayisago ga wulanga wowu, gasi mu dziti nya gukhenu magana yangu ma ngu tadzisega, khu gu wonani libango li na gu thegelago vbatshani gwanu.

³⁰ Wonani nya gukhenu, PFHUMU Nungungulu a ngu ganela, khuye: “Nyi na ningela Faro-Hofira, mufumeli wa Egipito, mandzani ga valala vaye ni ga vale va vbwetago gu mu songa, kha nga idzo nyi nga ningelago khidzo Zedhekiya, mufumeli wa Judha, mandzani ga Nabhukodhonosori, mufumeli wa Bhabhiloni, nala a nga bani a vbweta gu mu songa.”