Read gitonga Jeremiya 46 Bible Online

Jeremiya 46 - gitonga bible

Jeremiya 46

¹Aya khu magana PFHUMU Nungungulu a nga tivisago Jeremiya, mayelano khu va nya mayigo.

²Khu mahungu ya Egipito, khu nyimbi ya Faro-Neko, mufumeli wa Egipito, a nga bani na khade bambe nya tsongo wa Ewufrate, dhoropani ga Karakemesi, avbo a nga palago Nabhukodhonosori, mufumeli wa Bhabhiloni, khu mwaga nya wu na nya gufume ga Jowakimi, mwamana wa Josiya, mufumeli wa Judha, khuye:

³Dongiselani sitshangu, enu vakhongolo ni sanana, muya nyimbitunu!

⁴Thelani sighwabhata dzikavalu mu khilele, enu vakhileli mu folani! Lodzani matshari ni gu ambala sihugu! Ambalani sivhikelo sanu vbakhanatunu.

⁵Gasi ginani nyi gi wonago? Vatshavbo va gu khala hwanga, dzindrena dzawe dza gu thava dzi tutuma, nyamba khedza hwane, maphuvbo yatshavbo gupwala nyenganyenga basi, a ngu ganela PFHUMU Nungungulu.

⁶Muthu nya mazambo kha kodzi guthava, ndrena niyo kha yi na vbuluga! Khu Wuronga nya tsongo wa Ewufrate, va di tshunganela va thega.

⁷Gasi ginani egi gi gugumugago gu fanana ni tsongo wa Nilo, gi khulungago gu fanana ni mitsongo nya yikhongolo?

⁸Egipito a gu gugumuga a fanana ni tsongo wa Nilo, mati yaye ma gu goga nga mitsongo, a ganela, khuye: “Nyi na gugumuga nyi fenengedza litigo, nyi na khungumula lidhoropa ni vatshavbo va vbanyago umo.

⁹Enu dzikavalu, kirigani! Enu dzikareta nya nyimbi thelani mazambo! Thangani mbeli enu dzindrena, enu vama Vaetiyopiya, ni enu va Pute, mu pharidego sitshangu, Validhiya, mu kodzago gu phara wulaho, mu khwandra siholoma.”

¹⁰Kholu eli khilo litshigu li lumbago Mune, PFHUMU Nungungulu nya Tshivba Yatshavbo. A na bani nari litshigu nya guphodze, a dzi phodzela ga valala vaye; matshari ma na sasela kala ma kodwa, ma na leva khu novba wawe; kholu PFHUMU Nungungulu nya Tshivba Yatshavbo, a na ni phaso nya mhamba tigoni ga Wuronga, bambe nya tsongo wa Ewufrate.

¹¹Gwela Gileyadhi, uwe likendzi, nya nyamahegyane wa Egipito, u naya mana umo mafura nya gutole; wa gu dzi garadza khu gu vbweta mirendre nya gutale; gambe kha yi na gu hawulugisa.

¹²Mayigo yatshavbo ma pwide dzitshoni dzago, dzihuwa dzago dzi pwade tigoni gwatshavbo, ndrena yago yi dzi tshunganiside ni ndrena yikwawe, dzi thega gumogo dzatshavbo.

¹³ Avbo Nabhukodhonosori, mufumeli wa Bhabhiloni, a nga vbweta guta ata sasela litigo la Egipito, PFHUMU Nungungulu a di rumela magana yaya ga Jeremiya, khuye:

¹⁴Huwelelani esi tigoni ga Egipito ni gu pwadza Migidholi; mu huwelela gambe Menfisi ni Tafenisi, ganelani, khenu: Khugani mu dzi dongisele, kholu matshari momo ma sasela vaakelane vanu.

¹⁵Khu ginani gu nga khungumudwa ndrena yago, nungungulu wago nya tshivba? Kha dzi kodza gu simama gu ema, kholu khungumudwe khu PFHUMU Nungungulu.

¹⁶Nya vangi va gu tshunganela va thega, moyo a thega vbatshani ga mumbe, va embeledzelana, khavo: Hongoleni hi wuge hi bwelele ga va na gyathu tigoni gwathu nya mavelego, hi thava matshari ma hi saselago.

¹⁷Va womba huwa, khavo: Faro, mufumeli wa Egipito, a gu gulumela basi, vbindredwe khu gikhati gyaye.

¹⁸Nyi ngu sambanya khu guvbanya gwangu, a ngu ganela mufumeli, lina laye a gu uye PFHUMU Nungungulu nya Tshivba Yatshavbo, uye a nata nga gigomo gya Tabhori vbatshani nya sigomo, nga gigomo gya Karimelo bambe nya linene.

¹⁹Uwe nyamahegyane u vbanyago Egipito, dongisela mirwalo gasi guya wugumbini, kholu lidhoropa la Menfisi li na khungumudwa li khala marumbi nyamba khadwa gambe khu muthu.

²⁰Egipito, a gu fanana ni gimombyana nya wumburi, aholu, li nguta libhawa khu rongatunu li ta mu hodza.

²¹Masotshwa nya guthodwe vbakari gwaye, ma gu tsakisa nga simombyana nya gunone; ayo nayo, ma bwelede khu gu tutuma ma tandrega gu mu vhikela, kha ma tiya, kholu litshigu lawe nya gumbembiswe li vbohide, gumogo ni gikhati nya tsayiso wawe.

²²Lito la Egipito la gu fanana ni lito nya nyoga ya gu bani yi thava, kholu, valala va ngu hidzimela vbafuvbi gwawe khu tshivba. Va mu tela ni sibhewula kha nga vathu va kokago misimbo.

²³PFHUMU Nungungulu a ngu ganela, khuye: “Va di hagata magabi yawe ambari ma nga bani ma khumide, kholu avo vangi guvbindra mbasa tengo wawe kha wu valedwi khu muthu;

²⁴nyamahegyane wa Egipito, a na thega dzitshoni, a na ningedwa mandzani ga litigo la Wuronga.”

²⁵PFHUMU Nungungulu nya Tshivba Yatshavbo, Nungungulu wa Israyeli, a ngu ganela, khuye: Nyi na tsayisa Amoni wa No, Faro ni Egipito, vanungungulu vaye ni vafumeli vaye; nyi na tsayisa uye mune Faro ni vale va mu tumbago.

²⁶ Nyi na va ningela mandzani ga vale va vbwetago gu va songa, mandzani ga Nabhukodhonosori, mufumeli wa Bhabhiloni, ni ga dzindruna dzaye. Aholu, khu hwane nya isoso, vathu vaye va na wuya vata vbaha gambe tigoni ga Egipito, a ngu ganela PFHUMU Nungungulu.

²⁷Gasi uwe, githumi gyangu Jakobe, u nga thavi, u nga khali hwanga, uwe Israyeli, kholu nyi na gu vbulugisa nyi gu wuyisa khu mayigoni yoyo ya hwindzo, ni livelego lago khu tigoni nya wugumbi; Jakobe a nata vbanyedza nyaluphye khu gurula, na tangade nyamba thurugiswa khu muthu.

²⁸ PFHUMU Nungungulu a ngu ganela, khuye: U nga thavi, uwe githumi gyangu Jakobe, kholu eni nyi nago, nyi na mbembisa mayigo yatshavbo umo nyi nga gu phalalegiselago umo, gasi uwe, kha nyi na gu mbembisa, nyi na gu tsayisa khu lipimo kha nyi na gu diga nyamba gu tsayisa khu tshivba.