Read gitonga Jeremiya 47 Bible Online

Jeremiya 47 - gitonga bible

Jeremiya 47

¹Aya khu magana PFHUMU Nungungulu a ma tivisidego ga muprofeti Jeremiya, khu kotani ya Vafilisitiya, Faro nasi gu saseli lidhoropa la Gaza.

²PFHUMU Nungungulu a ngu ganela kharati, khuye: “Wonani nya gukhenu mati ma khugago khu Wuronga, ma gu goga nga tsongo wu tutumago, wu langaladza litigo latshavbo ni satshavbo si guromo umo, ma na taledwa madhoropa ni vavbanyi vaye. Vathu va na womba dzihuwa, ni vatshavbo vavbanyi va mafuni va na lila,

³khu kotani nya sikingo nya samba nya dzikavalu, ni ligwaha nya gututume nya dzikareta ni gudzuma nya dzirodha dzaye. Vavelegi kha va na wuya guta dzega sanana sawe, kholu mawogo yawe ma na rereka;

⁴kholu litshigu nya gumbembiswe Vafilisitiya vatshavbo li vbohide, li segela ni ndzila madhoropa ya Tiro ni Sidhoni, ni mayigo yatshavbo ma tshadego ma mu phasedzelago. PFHUMU Nungungulu a na mbembisa Vafilisitiya va tshadego gidwani gya Kafitori.

⁵Vavbanyi va dhoropani ga Gaza va gayide ndzudzu, Asikalomi mwalo lito, mbembide gumogo ni mitshaledwa ya kovani gwaye. Kala lini nu ngu dzi hendrelela givili gyago?

⁶Yowe! U na degula lini Uwe Litshari la PFHUMU Nungungulu? Bwelela u ya dzi tshomega gikhwesoni gwago, u hegisa gu songa.

⁷ U na degula kharini, olu PFHUMU Nungungulu a gu leletedego, gu ya sasela Asikalomi gumogo ni vathu va vbanyago bambe nya linene?”