Read gitonga Jeremiya 48 Bible Online

Jeremiya 48 - gitonga bible

Jeremiya 48

¹Khu mahungu ya Mowabhi, PFHUMU Nungungulu nya Tshivba Yatshavbo, Nungungulu wa Israyeli, a ngu ganela kharati, khuye: “Libango ga va na Nebhu, kholu lidhoropa lawe li khungumudwe.” Va na Kiriyatayimi, va padwe va modwa; likhokhola lawe li khungumudwe li thedwa dzitshoni.

²Wudhumo wa Mowabhi wu vbede; khu Hesibhoni, valala va di luga gikungo nya gu mu dwanise, khavo: Hongoleni hi fuvise vathu vava, litigo lawe li si vegwi gambe tengoni nya mayigo. Uwe nuwe Madimeni, kha wu na ganela gilo; kholu nyimbi yi ngu landra khu hwane gwago.

³Gupwala dzihuwa dza Horonayimi, khidzo: Gusasedwa, ni gumbembiswa nya gukhongolo!

⁴Mowabhi thegide! Gupwala dzihuwa nya sanana saye.

⁵Dzindzilani nya guhongole Luwiti gu pwala miketo nya gulile; khu mireleloni ya Horonayimi gu pwala dzihuwa nya wuvi, khu kotani nya gumbembiswe.

⁶Tutumani, mu dzi vbanyisa; tutumani kha nga magukhu ya giwulani.

⁷Kholu, kha nga u tumbago sigiro sago ni dzithomba dzago, uwe nuwe u na wandrwa. Kemosi u na vbagedwa u yiswa wugumbitunu, gumogo ni vaphasi nya mhamba ni vathangeli vago.

⁸Kholu musaseli a nata sasela madhoropa yatshavbo; li mwalo ni limwedo li na vbulugago, mikova yi na guledzedwa ni lipani li na ghohetedwa, kholu PFHUMU Nungungulu ganede.

⁹Ningani dzimbapi Mowabhi, kholu a gu vbuvba a na duga, kholu madhoropa yaye ma na khala giwula, mwalo a na gu khalago umo.

¹⁰“A na vadwe muthu wule a girago mihuni thumoni wa PFHUMU Nungungulu!” A na vadwe muthu wule a si vbaladzigo novba wa valala khu litshari laye!

¹¹Mowabhi gukhugela wudzahani gwaye a di vbanya gurulani, khade nga wadwa nya dziuvha wu vegwago ni gisese gyaye nyamba hutwa, gima wa sa thedwa ga gimbe gyombo, ambari gu yiswa wugumbini; khu guralo, gutshamba gwaye gu di simama, ni gunungela gwaye kha gwa vbindrugedza.

¹²Khu guralo, wonani ma nguta matshigu, a ngu ganela PFHUMU Nungungulu: Nyi na rumelago vavbaladzeli va nata wegedzago va vbaladza dzikhali dzawe, va pandrelela ni maphiso yakone.

¹³Mowabhi a na thedwa dzitshoni khu nungungulu waye Kemosi, kha nga Israyeli a nga thedwago dzitshoni khu Bheteli, a gu nungungulu waye a nga bani a gu mu tumba.

¹⁴Mwa gu ganela kharini mu gukhenu: “Ethu hi dzi ndrena ni vathu nya tshivba nya gudwane nyimbi?”

¹⁵Va na Mowabhi va sasedwe va vbela, ni madhoropa yawe ma ngu khungumudwa; madzaha yawe nya yadi ma ngu ya gusongwatunu; a ngu ganela Mufumeli, lina laye a gu uye PFHUMU Nungungulu nya Tshivba Yatshavbo.

¹⁶Gupadwa ga Mowabhi gomo vbafuvbi; libango laye li nguta khu guvbiredza.

¹⁷Pwelani gisiro Mowabhi, ni enu mwatshavbo vaakelane vaye ni enu mwatshavbo mu litigo lina laye; ganelani, khenu: “Li fanyegide kharini lipitso leli nya tshivba, ndronga nya wudhumo!”

¹⁸Tshiga khu vbagikhalotunu gwago nya wudhumo, u khala mafuni nya gihala, uwe nyamahegyane u vbahidego tigoni ga Dhibhoni, kholu musaseli wa Mowabhi a ngu hidzimela avbo gwago guta gu dhumela ni gu khungumula makhokhola yago.

¹⁹Enu mu khalago tigoni ga Aroweri, emani vbakari nya ndzila mu wona; mu wudzisa vale va tutumago va thava nyimbi, khenu: “Gasi ginani gi dugeledego?”

²⁰Mowabhi tade khu dzitshoni, kholu pfhungumudwe! Laledzani na mu gu lila! Mu embela Arinoni khenu Mowabhi khungumudwe.

²¹Gulamudwa nugo gu dzude khu tigoni ga panini, gu dzude ga Hinomi, ga Jasa ni Mefahati,

²²ga Dhibhoni, ga Nebhu, ni ga Bheti-Dhibhalatayimi,

²³ga Kiriyatayimi, ni Bheti-Gamuli ni Bheti-Meyomi,

²⁴ga Keriyoti ni Bhozira ni ga madhoropa yatshavbo ya Mowabhi, ya hwindzo ni ya vbafuvbi.

²⁵Mowabhi pidwe dzikheho a vbela tshivba, a ngu ganela PFHUMU Nungungulu.

²⁶Mu leviseni, kholu a dzi khusedzide mbeli ga PFHUMU Nungungulu, Mowabhi, a na puluwundre magoseni gwaye, uye a na khala gilo nya gihegiso.

²⁷Gasi wa gu wona Israyeli a di siri gilo nya gihegiso avbo gwago, gani? Ina uye a di manwa wuvafani, gani? Khu ginani u hegago gikhati gyatshavbo va ganelago khuye?

²⁸Dugani madhoropani mu ya khala musiwindrini, enu mu vbanyago Mowabhi! Girani nga matuva ma vbahago sihaga sawe myanyani nya dziphago.

²⁹Hi pwide na gu ganedwa khu matshandza ya Mowabhi, gu dzi khusedza gwaye ni gu vega vbavbatshi vambe vathu, khu matshandza ya monyoni gwaye.

³⁰Eni kamwe, nyi ngu liti likhulo laye, a ngu ganela PFHUMU Nungungulu, aholu isoso khandri sa gilo, ni malipha yaye kha ma na phasa gilo.

³¹Khu guralo, nyi na lila khu litigo la Mowabhi, nyi na womba huwa khu kotani nya litigo latshavbo la Mowabhi, kholu vathu va Kiri-Heresi va na wombeledzela dzihuwa.

³²Nga idzo nyi lilelago khidzo Jazeri, nyi na gu lilela nuwe kharato, lithembwe la Sibina; matamo yago ma navide ma tsemakanya yiphwa, ma vboha kala phwani ga Jazeri; [14] aholu musaseli phangide mihandro yago nya maronga ni gikhati nya guvbwere dziuvha.

³³Dzindzimo ni mikulungwane, kha dzi nga gu pwala gambe tigoni nya gunone ga Mowabhi, nyi bangiside miphongolo yi thedwago umo vbinyu; mwalo gambe a na gu gamago dziuvha khu litsako, gwa gu manega ndzimo, yi na bani yiri ya gililo.

³⁴Gu pwade huwa khu Hesibhoni, yi pwala kala tigoni gwa Eleyali ni Jasa; huwa yaye yi pwade gukhugela Zowari kala Horonayimi, ni Egilati-Selisiya; kholu ni mati ya Nimerimi, ma na banga.

³⁵Nyi na fuvisa va na Mowabhi, a ngu ganela PFHUMU Nungungulu vale va gwelago musigomoni gasi guya gira dzimhamba ni gu vbisela libani vanungungulu vawe.

³⁶Khu guralo, monyo wangu, wu na dzuma kha nga sengele khu kotani ya Mowabhi, wu na dzuma gambe kha nga misengele; khu kotani ya vathu va Kiri-Heresi, kholu thomba va nga bani va yi hengeledzede yi luzide.

³⁷Kholu mihungoni gwawe gu na vbaludwa ni siledzo sawe si na vidwa; va na thedwa dzimbanga mandzani gwawe, siwununi gwawe gu fenengedzidwe khu silendra.

³⁸Vbatshani nya dzilangwe nya dzinyumba dza Mowabhi gumogo ni dzindzilani gwaye, gu pwala dzihuwa, kholu Mowabhi, nyi mu pandride kha nga kanvu nyamba phasa gilo! A ngu ganela PFHUMU Nungungulu.

³⁹Nga wonani idzo a khungumudwego khidzo Mowabhi! Dzitshoni basi ni gililo! Khu gu wona idzo a thegidego khidzo khu nyagihwane! Mowabhi khade gilo nya guthise ni gihegiso, vbakari nya vaakelane vaye!

⁴⁰Kholu PFHUMU Nungungulu, a ngu ganela kharati, khuye: Wonani nya gukhenu nala wa Mowabhi, a nata na gu vbuvba nga lighama, a ta mbaka vbatshani gwaye.

⁴¹Madhoropa yawe ma na phangwa, ma wandrwa makhokhola yawe; khu litshigu lolo, myonyo nya dzindrena dza Mowabhi, yi na fanana ni monyo nya nyamayi a lumwago.

⁴²Litigo la Mowabhi li na fuviswa, kholu va wugede PFHUMU Nungungulu.

⁴³Hwanga, liphala ni milaphwi si mi lirede enu vavbanyi va Mowabhi, a ngu ganela PFHUMU Nungungulu.

⁴⁴Uye a khalago hwanga a thava, a na thegela phalani, ni uye a na dugago khu phalani, a na modwa khu naphwi. Kholu nyi na resa avbo gwaye navbo ga Mowabhi, mwaga nya tsayiso waye, a ngu ganela PFHUMU Nungungulu.

⁴⁵Vale va nga bani va tutuma, va di vbela tshivba va ema mutsani ga Hesibhoni, aholu, nilo wu di duga khu Hesibhoni, ni malavbelavbe, ma dugede vbakari ga Seyoni; wu dagaredzisa ndzari ya Mowabhi ni mihungo nya vathu nya gugole mayunga.

⁴⁶Libango gwanu enu va na Mowabhi! Enu va na Khemosi, mu vbohedwe khu litshigu lanu nya mahegiso! Sanana sanu nya sikhwathana nesi nya vanyamahegyane, si na yiswa wugumbini.

⁴⁷ PFHUMU Nungungulu a ngu ganela, khuye: Khu guhegisani, nyi na wuyisa vatshavbo va vbagedwego va na Mowabhi. Ogu khu gu hegisa nya gulamudwe ga Mowabhi.