Read gitonga Jeremiya 5 Bible Online

Jeremiya 5 - gitonga bible

Jeremiya 5

¹Dzundrulugelani dzindzilani gwatshavbo ga Jerusalema, mu khedzani mitendrelani mu ta nyi embela mwendro saye mu na mana muthu moyo basi a tsakelago gululama ni gu gira ugo a gu lisine. Khavbo avbo, eni nyi na tsetselela Jerusalema.

²Ambari sawe va gu ganela, khavo: “Hi ngu sambanya khu lina la PFHUMU Nungungulu a vbanyago.” Va gu sambanya malipha.

³Uwe PFHUMU Nungungulu, maho yago kha ma khedzi wule a girago ndruda, gani? U va bayiside, kha vapwa guvbisa; U va mbembiside, kha va dzina gu vbindrugedza; gambe va di bangisa mihungo yawe guvbindra giwindri; kha va nga dzina gu wuya eno gwago.

⁴Aholu eni nyi di alakanya gukheni: Avo sisiwana basi; sipumbu, kha va yiti ndzila ya PFHUMU Nungungulu; niso si godwago khu Nungungulu wawe.

⁵Nyi na hongola ga vathangeli nyi ya bhula navo; kholu avo va ngu yiti ndzila ya PFHUMU Nungungulu, ni nayo wa Nungungulu wawe; aholu avo vatshavbo va di fanyide kanga ni gu kavila dzitshinga.

⁶Khu guralo, nghala yi na duga khu khabini yi ta va songa, lisolwa la giwulani li na va vbadzulela, madhoropa yawe ma na holeledwa khu likhamba; moyo wawe a gu duga a na vbadzuledwa; kholu va di engedzela guvivba nya sighoho sawe, va mu pfhurarela gikhati nya gutale.

⁷Nyi na dzi kodza kharini gu gu divalela na nyi gu wona esi? Kholu sanana sago si nyi digide, va sambanya khu avo va gu siri vanungungulu; hwane nya gubani nyi mi ningide siningwa nya gutale, kha mwa tumbega, mu di tadzani migondro dzinyumbani nya maphuphulu mu ya tshangana iyoyo;

⁸va di fanana ni dzikavalu nya vamatune dzi nonidego, na dzi gu dogorela edzi nya migadzi, muthu ni muthu a emba khu gu dogorela mwangadzi wa muakelane waye.

⁹PFHUMU Nungungulu a ngu wudzisa kharati, khuye: “Ina nyi ngu dzi kodza gumba tsayisa silo sesi, gani?” Ina kha nyi yeli gu dzi phodzela ga litigo nya nga eli, gani?

¹⁰Litani mabhiyo yaye mu ma khungumula, aholu, mu nga ma pfhungumuleli muphelo; duselani matamo yaye, kholu ayo kha ma lumbi PFHUMU Nungungulu.

¹¹Kholu nyumba ya Israyeli ni ya Judha dzi di nyi wugela, a ngu ganela PFHUMU Nungungulu.

¹²Va di ganedza PFHUMU Nungungulu, khavo: “Gima kha hi na dugeledwa khu libango; gima kha hi na sasedwa khu matshari, ambari gufa khu ndzala.

¹³Esi va ganelago vaprofeti liphuvbo basi li vbindrago, kholu khandri magana yawe.”

¹⁴Khu guralo, PFHUMU Nungungulu nya Tshivba Yatshavbo a ngu ganela kharati, khuye: “Kha nga olu mu ganedego isoso, eni nyi na vbindrugedza magana yangu ma khala nilo ni vathu vava nyi na va gira dzikhuni ni nilo va na gu vbiswago khuwo.”

¹⁵PFHUMU Nungungulu a ngu ganela, khuye: Wonani nya gukhenu nyi na mi resela litigo la hwindzo, ga linyumba la na Israyeli li ta mi sasela; vathu vakone va na ni tshivba nari gale na varomo na va gu ganela lidimi u si litigo ambari gu li ganela.

¹⁶Likana nya kwama nya matshari yaye, la gu fanana ni likana nya lithowo li hamidego, ni vathu vaye vatshavbo dzindrena.

¹⁷Va nata hodza dzimbewu dzago ni guhodza gwago, va hodza madzaha yago ni dzimbiri dzago; va na hodza dzinvuta ni dzimombe dzago; va na ghohetela gambe marembwe yanu nya mikandzu nayo nya miuvha; va khungumulela khu matshari madhoropa yago nya makhokhola u ma tumbago.

¹⁸Ambari khu kharato, PFHUMU Nungungulu a ngu ganela, khuye: “Khu matshigu yoyo kha nyi na mu mbembisa muphelo.”

¹⁹Aholu va gu wudzisa, khavo: “Khu ginani PFHUMU Nungungulu wathu, a hi giredego silo satshavbo sesi?” Khavbo avbo, va hakheni, khenu: Kha nga olu enu mu nyi digidego mu ya thumela vambe vanungungulu nya va nya mayigo, tigoni gwanu, kharato nugo, mu naya thumela va nya mayigo ga litigo li gu siri lanu.

²⁰Tivisani isoso nyumbani ga Jakobe ni gu si pwadza nyumbani ga Judha, khenu:

²¹ “Olu yingisani esi enu vathunu nya mapemi ni gumbana mapimo, mu gu na ni maho, aholu mu si woni; ni dzindzeve gambe kha mu yingisi.”

²² PFHUMU Nungungulu a ngu ganela, khuye: Ina kha mu nyi thavi, gani? Ina kha mu ndrendremeli mbeli gwangu, gani? Kholu kheni nyi nga girago vbingano nya linene khu mafu, vbingano nya gukala gupindruga nyamba ndragwa. Ambari ma gu khusega mavimbi yaye li dzuma linene kha wu na ndragwa.

²³Vathu vava va bangide mihungo ni gu ganedza; va ndreyide mbeli gwangu va nyi pfhurarela.

²⁴Kha va alakanya khu myonyoni gwawe, khavo: Hongoleni hi ninga githawo PFHUMU Nungungulu wathu, Uye gikhati nya guenele a hi wiselago ndzadzi nya nango nya gu yale ni gu vidzwa dzimbewu, a vegidego dzisemana nya guvbwere dzi gumba vbindra.

²⁵Guvivba gwanu gu ngu ndreyisa silo sesi, ni sighoho sanu si ngu hidzimisa makategwa hwindzo nanu.

²⁶Kholu vbakari nya vathu vangu gu tade khu vathu nya guvivbedwe khu myonyo, va riyago milaphwi, kha nga wule a sotago sinyoni, va gu thawuludza dzikhoga va mola vathu.

²⁷Dzinyumba dzawe dzi tade khu wukanganyisi, kha nga gikayela nya gutale khu sinyoni si modwego, khu kotani nya isoso va engedzelago gu khala sitetema.

²⁸Va enide, khu gu hodza gwadi, wuvivbi wawe wu vbindride pimo; kha va lamuli khu nongameto mahungu ya dzikhulungu; ambari gu vhikela fanelo nya sisiwana.

²⁹Ina kha nyi yeli gu tsayisa silo sesi, gani? A ngu ganela PFHUMU Nungungulu; ina kha nyi yeli gu dzi phodzela ga vathu nya nga ava, gani?

³⁰Silo nya guthise ni manyala si dugeledego tigoni momu:

³¹Vaprofeti va di profeta malipha, ni vaphasi nya mhamba va di fuma khu gugola gwawe; gambe khiso si vbwetwago khu vathu vangu. Khu guralo, mu na rini litshigu gu na vbohago mahegiso nya silo sesi?