Read gitonga Jeremiya 52 Bible Online

Jeremiya 52 - gitonga bible

Jeremiya 52

¹Zedhekiya a diri ni magumavili na moyo myaga gikhati a nga phela gufuma, fumide likhumi na moyo myaga dhoropani ga Jerusalema; lina la mayi waye a diri uye Hamutali, nyamahegyane wa Jeremiya, wa Libhina.

²Uye nuye ghohede PFHUMU Nungungulu kha nga idzo a giridego khidzo Jowakimi.

³Khu kotani nya isoso, PFHUMU Nungungulu a di vbisega khu Jerusalema ni Judha, kala a va dusa mbeli gwaye; Zedhekiya a di wugela mufumeli wa Bhabhiloni.

⁴ Khu mwaga nya livbandre na wu na nya mufumo waye, khu litshigu nya likhumi nya ngima nya likhumi, Nabhukodhonosori, mufumeli wa Bhabhiloni, a dita ni masotshwa yaye yatshavbo ata dhumela lidhoropa la Jerusalema, vata vbaha makhokhola va li randrela latshavbo.

⁵Lidhoropa li di randredwa kala mwaga nya likhumi na moyo nya gufume ga Zedhekiya.

⁶Khu litshigu nya livbandre na mana nya ngima nya wu na, gu di manega ndzala nya yikhongolo dhoropani, avbo vathu vatshavbo va tigoni va nga hamugago gilo nya guhodze,

⁷ khu guralo, gu di podwa libhiyo nya lidhoropa gu manega gihogo, vama vatshavbo nya nyimbi va di duga va thava ni vbawutshigutunu, khu ndzila yi guromo khu vbakari nya mabhiyo ya mavili vbafuvbi ni lithembwe nya senge la mufumeli, kholu Vakalidhiya va di gu randrede lidhoropa khu maphuvbo yatshavbo. Avo va nga thavago va di bela khu ndzila yi thononago panini.

⁸Aholu masotshwa nya Vakalidhiya ma di va lundra khu hwane va ya va mana mapanini ga Jeriko. Khavbo avbo, masotshwa ya Zedhekiya, ma di phalalega ma mu tshiya ekha.

⁹A di mola Zedhekiya va mu yisa ga mufumeli wa Bhabhiloni dhoropani ga Ribala, tigoni gwa Hamati, avbo uye a nga ya mu lamula a mu rwega nandru.

¹⁰Mufumeli wa Bhabhiloni a di songa sanana sa Zedhekiya si pidwa dzithamo na gu si wona, gumogo ni dzindruna dza Judha, dhoropani ga Ribala.

¹¹ Khu hwane a di rumela gukhuye Zedhekiya a rumbudwe maho, a mu hunga khu makhetshe mavili nya sugu; a mu rumela Bhabhiloni a mu khothela pasoni kala litshigu nya gufe gwaye.

¹²Khu litshigu nya likhumi, nya ngima nya livbandre, khu mwaga nya likhumi na livbandre na wu na nya gufume ga Nabhukodhonosori, mufumeli wa Bhabhiloni, Nebhuzaradhani, muthangeli nya vaemeledzi ni githumi gya mufumeli wa Bhabhiloni, a dita Jerusalema;

¹³ a ta vbisa Nyumba ya PFHUMU Nungungulu, nyumba ya mufumeli, dzinyumba dzatshavbo dza dhoropani ga Jerusalema gumogo ni dzinyumba dza vathu vatshavbo nya guthavisege.

¹⁴Khu hwane nya isoso masotshwa nya Vakalidhiya ma nga bani ma gu bangaladza muthangeli nya vaemeledzi, ma di khungumula mabhiyo yatshavbo nya gubhiye Jerusalema.

¹⁵Nebhuzaradhani, muthangeli nya vaemeledzi, a di vbagela vathu vatshavbo va nga bani va tshade dhoropani, vambe vakone va nga bani vari sisiwana gumogo ni vale va nga bani va dzi ningede ga mufumeli wa Bhabhiloni, ni vameseri nya guvate ni guvbaha, a va yisa Bhabhiloni.

¹⁶Aholu, Nebhuzaradhani, muthangeli nya vaemeledzi, a di tshide gimbe gipandre nya vathu nya sisiwana gasi gu khala valimi ni vaphuli nya vbinyu.

¹⁷Vakalidhiya va di kokelela madingo nya sugu nya giluvelo, ma khala khu sipandre, ma nga bani ma emisidwe Nyumbani gwa PFHUMU Nungungulu, sirandro ni yiphwa nya sugu; va dzega sugu watshavbo va wu yisa Bhabhiloni.

¹⁸Va di phanga gambe ni dzikhali, mikho, migala, mafosola, dzimbiya ni simbe sombo si wumbidwego khu sugu va nga bani va si thumisa umo nya wukhozeli.

¹⁹Muthangeli nya vaemeledzi a di phanga gambe ni dzimbiya nya guvbisele umo libani, dzikhali, dzimeza nya dzikandriya, mikho ni sikombe; satshavbo sombo sesi si di wumbidwe khu ndralama nya guhutwe ni parata nya gukhedzige.

²⁰Aholu madingo ya mavili ni ginamelo nya gikhongolo ni likhumi na dzimbili dzimombe nya sugu dzi nga bani dziri vbavbatshi nya ginamelo si nga rumedwago gu girwa khu Solomoni gasi si khala Nyumbani ga PFHUMU Nungungulu, sombo satshavbo sesi nya sugu si diri tengo nyamba saywa kholu kha wa nga pimwa vbagikalotunu.

²¹Madingo, limwedo ni limwedo li diri ni pimo nya likhumi na livbandre na miraru mikono gulapha, guanama gwaye gu di vbwetega ngodzi nya gulaphe likhumi na mavili mikono gasi li dzuwuluge gugula gwaye yi diri tanga nya nyala dzina, ndrani gwaye gi diri liphanga.

²²Ma diri ni mihungo nya sugu khu vbatshani gwaye, gulapha nya hungo ni hungo wu diri ni livbandre mikono; gihuto ni sihenge; satshavbo si diri nya sugu, lidingo nya wuvili li di gu fanana ni gihenge.

²³ Lidingo ni lidingo li diri ni livbandre na mana magumi ni livbandre na gimwegyo sihenge, si nga bani si wonega khu vbavbatshi; gambe satshavbo si di gu enedza lizana.

²⁴Muthangeli nya vaemeledzi, khu hwane nya isoso a di mola nuye Seraya, muphasi nya khongolo nya mhamba ni Sofoniya gyandza gyaye gumogo ni vasayisi vararu nya myanya.

²⁵Nebhuzaradhani a di hongola gambe dhoropani aya mola thenwa moyo a nga bani ari muthangeli nya vathu nya nyimbi, ni livbandre na vavili vama va nga bani vari madhota ya mufumeli, va nga manwago dhoropani, gumogo ni mulovi wa muthangeli nya nyimbi, thumo waye a nga bani ari wa gu thola vama nya guhongole nyimbitunu, ni livbandre na limwedo magumi vama va tigoni va nga modwago vbakari nya lidhoropa.

²⁶Nebhuzaradhani, muthangeli nya vaemeledzi, a di va mola a va rumela Ribala, ga mufumeli wa Bhabhiloni.

²⁷Mufumeli wa Bhabhiloni a di ya va songa dhoropani ga Ribala, umo nya gipandre gya Hamati; khu guralo, Judha a di vbagedwa a yiswa hwindzo ni tigoni gwaye.

²⁸Owu khu tengo nya vama va yisidwego wugumbitunu khu Nabhukodhonosori khu mwaga nya livbandre na wuvili nya gufume gwaye, a gu owu: Magumararu mazana ni magumavili na vararu (3.023) vama va Judha.

²⁹Khu mwaga nya likhumi na livbandre na miraru nya gufume ga Nabhukodhonosori, vbagede livbandre na mararu mazana ni magumararu na vavili vathu (832) va Jerusalema.

³⁰Khu mwaga nya magumavili na wuraru nya gufume gwa Nabhukodhonosori, Nebhuzaradhani, muthangeli nya vaemeledzi, vbagede livbandre na mavili mazana ni magumana na livbandre (745) vathu vbakari nya Vajudha. Gu va pata vatshavbo va gu enedza magumana ni livbandre na limwedo mazana (4.600).

³¹Khu mwaga nya magumararu na livbandre na mivili nya gu vbagedwe ga Jowakimi, mufumeli wa Judha, khu litshigu nya magumavili na mavili nya ngima nya likhumi na wuvili, Evhili-Merodhaki, mufumeli wa Bhabhiloni, khu mwaga nya guhegule nya gufume gwaye, a di tsetselela Jowakimi, mufumeli wa Judha, a rumela gu a duswe khu pasoni.

³²A di ganela naye khu wuhindzi, a mu ninga gikhalo nya gukhugege, guvbindra vafumeli vakwawe a nga bani ari navo Bhabhiloni.

³³A di mu tshula dzingandzu nya wubotshwa waye, a di hodza vbamezatunu gumogo ni mufumeli, matshigu yatshavbo nya guvbanye gwaye.

³⁴Guvbanyani gwaye gwatshavbo, Jowakimi a di hakha khu mandzani ga mufumeli wa Bhabhiloni, satshavbo iso a nga bani a gu si dilela, matshigu yatshavbo nya guvbanye gwaye, kala litshigu nya gufe gwaye.