Read gitonga Jeremiya 6 Bible Online

Jeremiya 6 - gitonga bible

Jeremiya 6

¹Enu sanana sa Bhejami, thavani vbakari ga Jerusalema; wombani pundru tigoni ga Tekowa, khusedzani giyeyedzo nya nilo tigoni ga Bheti-Hakerimi; kholu libango li nguta ni valala khu phuvbo ga Wuronga ni wusaseli nya wukhongolo.

²Nyamahegyane nya gumbure ni wukheta wa Siyoni, eni nyi na mu gira marumbi.

³Vahavisi va na havisa umomo mitshambi yawe; va na ghwimba umomo mitshatsha yawe; muthu ni muthu a na havisa wulangani gwaye.

⁴Khugani hi ya dwana nyimbi naye, hongoleni, hi na gwele olu na gu ngari mihani. Libango lathu, lidambo li ngu pfola wu ngu khala wutshigu.

⁵Khugani hi ya mu sasela wutshigu wowu, hi na ya khungumula dzinyumba dzawe nya wufumu.

⁶Kholu PFHUMU Nungungulu nya Tshivba Yatshavbo a ngu ganela, khuye: Pilani matamo nya misimbo yawe mu gira khayo laba nya gu bhiye Jerusalema. Kholu eli lidhoropa nya malipha, li tadego khu wukanganyisi.

⁷Wuvivbi waye wa gu fanana ni nambo wu dusago mati. Ilo nilo la gu dusa wuvivbi. Khiyo gwaye gupwala basi mayunga ni gupfhungumula; mbeli gwangu gikhati gyatshavbo nya gu wona basi wuvi ni silondra.

⁸Uwe Jerusalema dzi laye, gasi nyi si gu pfhurareli; ni gu pfhungumudwa u khala marumbi, litigo li si khadwigo khu muthu.

⁹PFHUMU Nungungulu nya Tshivba Yatshavbo a ngu ganela kharati, khuye: Roledzela mitshaledwa ya na Israyeli yi wuya khu mandzani gwago; kha nga mulimi a roledzelago esi si tshalago thembweni, kha va tshiyi gilo litamoni nya vhinya.

¹⁰Nyi na ganela ni gu fakaza ga mani gasi va kodza gu nyi yingisa? Wona nya gukhuwe dzindzeve dzawe dzi tshimegide, kha va yingisi; mahungu ya PFHUMU Nungungulu givalo avbo gwawe; kha va khathali khayo.

¹¹Khidzo kharato nyi tadego khu likhulo la PFHUMU Nungungulu; nyi garade kha nyi nga gu dzi kodza gu dzi phara. Nyi na li vbaladza likhulo lolo vbatshani ga sanana sawe si gimbilago dzindzilani numo nya mitshangano nya vathu vaphya; kholu vatshavbo mwama ni ngadzi va na modwa gumogo, vama nya vakhongolo ni avo va gumbidego, vatshavbo va na modwa.

¹²Dzinyumba dzawe dzi na ningedwa vambe vathu, va dzegedwa gambe ni marembwe ni vagadzi vawe, kholu nyi na thawuludza libogo langu nyi veta vavbanyi va tigoni momu, a ngu ganela PFHUMU Nungungulu,

¹³kholu gukhugela ga sanana kala vakhongolo, vatshavbo va gu vbweta gu ghanya. Vaprofeti ni vaphasi nya mhamba, vatshavbo sidambane.

¹⁴ Kha va khathali khu gu vbodzisa dzimbanga dza vathu vangu na va gu ganela, khavo: Satshavbo si ngu gimbila gwadi! Gomo gurula! Gurula! Aholu gurula na guri mwalo.

¹⁵ Ina va na dzipwa dzitshoni, khu gu bani va giride gihoso nyi gi nyenyago, gani? Ahihi! Avo va mwalo dzitshoni. Gambe kha va giti gilo gi va thelago dzitshoni; khu guralo, va na thega gumogo ni vambe, va mbembiswa muphelo litshigu nya gulamudwe. A ngu ganela PFHUMU Nungungulu.

¹⁶ PFHUMU Nungungulu a ngu ganela kharati, khuye: “Emani khu bambe nya ndzila mu wona, mu wudzisa khu sindzilana sa gale, mu wudzisani ndzila nya yadi, belani khiyo mu na ya mana gurula mihefemulo yanu. Aholu, mu di hakha, khenu: Kha hi na yi landra.”

¹⁷Nyi vegide gambe vawoneleli vbakari gwanu, nyi va embela, kheni: “Yingisani gudzuma nya pundru!” Aholu avo va di nyi hakha, khavo: Kha hi dzumeli gu gu yingisa.

¹⁸Khu guralo, yingisani enu mayigo, yingisani! Enu nenu tshangano wonani iso si na va dugelelago!

¹⁹Yingisa, uwe litigo! Wonani nya gukhenu nyi na resa libango vbatshani nya vathu vava, gasi va mane mihandro nya mapimo yawe nya guvivbe, kholu kha va yingisa magana yangu, va yeyiside gambe nayo wangu.

²⁰ Ma gu nyi phasa ginani mabani mu nyi reselago khu tigoni ga Sabha, ni mafura nya gunungele mu nyi reselago khu mayigoni ya hwindzo? Miphaso yanu nya guvbiswe ni dzimhamba dzanu kha dzi nyi nengedzisi.

²¹Khu guralo, PFHUMU Nungungulu a ngu ganela kharati, khuye: “Wona nya gukhuwe nyi na thela giphili mbeli ga vathu vava; va na tshunganela gu thega vavelegi gumogo ni sanana sawe; vaakelane gumogo ni dzipari va nafa.”

²²PFHUMU Nungungulu a ngu ganela kharati, khuye: “Wonani vathu vatago khu litigo la Wuronga, litigo nya likhongolo li na dugela mahegiso nya mafu.

²³Va nata na va somide malaho ni sighalala; avo vathu nya lunya ni gumbana gisiro; ligwaha lawe la gu dzuma kha nga libimbi nya linene; na va khilede dzikavalu, na va somide gu dwana nago uwe lidhoropa la Siyoni.”

²⁴Avbo hi nga pwa ndruma yawe, mawogo yathu ma di vbela tshivba hi gu saniseka khu wuvi wathu watshavbo, kha nga nyamayi a lumwago.

²⁵U nga dugi uya mahangeni ambari gu gimbila khu dzindzila, kholu nala a na ni litshari, malangani yatshavbo gu pwala dzihuwa.

²⁶Uwe nyamahegyane wa vathu vangu, ambala gilendra nya gililo, u puluwundra ngumani; womba huwa u lila ngudzu gukhwatshi, u di fedwa khu gyanana gya gimwegyo; kholu nala a na vboha khu githugedza ata hi sasela.

²⁷Gasi uwe Jeremiya, nyi gu vegide u khala mulingi nya vathu vangu, gasi uti mapimo ni mavbanyelo yawe.

²⁸Vatshavbo va bangide mihungo, sidambane; kholu avo va gu gimbila va phalalegisa milembo, myonyo yawe yi lemede kha nga sugu ni simbi.

²⁹Nilo wu vbiside khu tshivba, wu nyiviligisa thovhu; aholu munyegisi thumide mahala, kholu va nya guvivbedwa khu monyo, kha va duswa.

³⁰“Va na ranwa gupwani parata nyamba phasa gilo, kholu PFHUMU Nungungulu a va digide.”