Read gitonga Gililo 4 Bible Online

Gililo 4 - gitonga bible

Gililo 4

¹Alef Gasi yi pfhurede kharini ndralama! Ndralama yi hutidwego yi pfhurede kharini! Siwindri sa wulangani nya miphaso si mbambamede umo nya mahandzakanya yatshavbo nya dzindzila! Bet

²Madzaha nya gugolege ya Siyoni, nya wumburi nga ndralama yi hutidwego, olu ma gu fanana ni sombo nya libumba, i thumo wa muwumbi! Guimel

³Ambari masolwa ma ngu sayisa sanana sawe ma si mamisa; aholu nyamahegyane wa tigoni gwathu vivbide monyo a fanana ni sivaga sa giwulani. Dalet

⁴Migolo nya sanana sa beleni yi bangide khu kotani nya lidora. Sanana sa gu lomba guhodza aholu mwalo a si ningago. He

⁵Avo va nga bani va hodza mafura, va gu thega dzindzilani khu ndzala. Avo va nga dandriswa khu dzingandzu nya siwunguwungu, olu va gu galagasela matalani. Vau

⁶ Tsayiso wa nyamahegyane wa tigoni gwathu wa gu vbindra tsayiso wa Sodhoma, gikhati a nga pfhungumudwa khu githugedza na siri khu tshivba nya mandza nya vathu; aholu khu gyandza gya Nungungulu. Zain

⁷Vathangeli vawe va di khedziga guvbindra thondrwane, va di agide guvbindra mahwe, sivili sawe si di fuvila nga giwunguwungu va bwelo khavbo va khalega gwadi nga giwindri nya safira. Heti

⁸Aholu, muhuno dzikhovbe dzawe dzi sivbade nga magala. Muthu a gu va mana ndzilani kha vati. Tshonge yawe yi khwenyede ni marambo ma banga nga simbo. Tet

⁹Avo va nga songwago khu matshari va kategide guvbindra avo va ngafa khu ndzala; kholu va gu saniseka khu gu hamuga guhodza gwa mahangeni. Yod

¹⁰ Ambari vanyamayi va nga bani vari ni lihaladzo, va phude sanana sawe va hodza gikhatini nya gukhungumudwe lidhoropa la tigoni gwathu, Caf

¹¹PFHUMU Nungungulu vbohide mahegiso nya likhulo laye, vbaladzide likhulo laye, rothide nilo Siyoni wu nga vbisago siseketelo nya madingo yaye. Lamed

¹²Vafumeli va mafuni, gumogo ni vathu va tigoni, kha va nga khodwa gilo gukhavo, nala ni mutshanisi va nga tshuka va bela dzinyangwani gwa Jerusalema. Mem

¹³Libango leli, li vangidwe khu sighoho sa vaprofeti ni sihoso sa vaphasi vawe nya mhamba, va gu avo va songidego vathu nya gululame, va vbaladza novba wawe dhoropani. Nuni

¹⁴Va di legalega mudzindzilani kha nga sikhumu na va phorode khu novba, avbo gu ngamba manega ni moyo nya gutiyele gu kuha dzingandzu dzawe. Samec

¹⁵Va di embedwa gupwani: Khugani avba! Vathu nya gunyenyeze! Khugani mu nga hi khuhi. Va di thava va legalega ni mayigo, va nya mayigo va va embela, khavo: “Vathu vava va nga khali gambe vbakari gwathu.” Pheni

¹⁶PFHUMU Nungungulu uye abune a va phalalegiside kha theli gambe kota khavo. Vaphasi nya mhamba va nga ningwi gambe githawo ambari sikhosane si nga pwedwi gisiro. Ayimi

¹⁷Maho yathu ma di fuvila khu gu vbweta giphaso hi si gi woni, hi garala khu gu khedzisela vathu va si kodzigo guta hi vbulugisa. Sade

¹⁸Valala va gu demba ni migondro yathu gasi hi tandrega gu gimbila dzindzilani. Matshigu yathu, ma ngu hidzimela kholu, guvbanya gwathu gu ngu vboha mahegiso. Qof

¹⁹Avo va hi lundrago va na ni mazambo guvbindra maghama ya damboni, va di hi tutumisa sigomoni va hi demba khu milaphwi giwulani. Resi

²⁰Gihathwa gya PFHUMU Nungungulu uye a gu muvbanyisi wathu, modwe a thegela mavbalani gwawe; uye hi nga bani hi ganela gwaye khethu: “Hi na sihala mutsani nya dzimbapi dzaye, vbakari ga va nya mayigo.” Sini

²¹Tsaka u nengela uwe nyamahegyane wa Edhomi, u vbanyago mayigoni gwa Uzi! Aholu enu nenu mu na sela gikombe nya likhulo la Pfhumu mu na leva mu gimbila wumbwiri nyamba ambala gilo. Tau

²²Tsayiso wago uwe nyamahegyane wa Siyoni, wu vbohide mahegiso. PFHUMU Nungungulu kha na gu vbagela gambe uya wugumbitunu. Gasi uwe nyamahegyane wa Edhomi, Pfhumu a na gu tsayisa khu kotani nya sighoho sago, Uye a na funungula sighoho sago si wonwa khu vathu.