Read gitonga Gililo 5 Bible Online

Gililo 5 - gitonga bible

Gililo 5

¹PFHUMU Nungungulu, alakanya iso si hi dugeledego. Khedza u wona dzitshoni hi gu nadzo.

²Thomba yathu yomo mandzani ga va nya mayigo, dzinyumba dzathu dzi ningedwe vavbindri nya ndzila.

³Hi sigulungu nyambana babe, vamayi vathu vomo nga dzinoni

⁴Ambari ni mati hi selago gumogo ni dzikhuni hi dzi thumisago; satshavbo ha gu livba.

⁵Vasanisi vathu va gu hi sokhovedza, khu mirwalo nya gulemele, ambari na hi garade kha va hi digi hi hefemula.

⁶Hi dzi ningede ga Vagipiti ni ga Vaasiriya, gasi va hi phasa khu gu hi ninga guhodza.

⁷Vababe vathu va ghohide, aholu avo va fude; olu ethu hi ngu rwala nandru wawe.

⁸Olu ha gu fumwa khu dzikhumbi hi si mani ni muthu nya gu hi tshule mandzani gwawe.

⁹Guhodza ha gu gu mana khu gu ningela womi wathu, hi vhikisana ni matshari giwulani.

¹⁰Tshonge yathu ya guvbisa nga gikho, khu kotani nya wuvi nya ndzala.

¹¹Va pfinyide vanyamayi va Siyoni, ni vanyamahegyane va Judha.

¹²Vathangeli va hungidwe mawogo va vbayegwa; ni vakhongolo nya vathu kha va nga gu ningwa githawo.

¹³Madzaha ma gu gurumedzwa gu tshindra sivbila, sanana si dhedherekela ni dzinyandra nya dzikhuni.

¹⁴Madhota kha ma khali gambe dzinyangwani; ni madzaha kha ma embeleli gambe dzindzimo.

¹⁵Myonyoni gwathu gu mwalo gambe gutsaka; guhana gwathu gu vbindrugedzide gu khala gililo.

¹⁶Gihugu gyathu nya wufumu gi thegide! Libango lakone, kholu hi nga ghoha!

¹⁷Myonyo yathu yi tade khu wuvi, maho yathu ma tade khu marongo.

¹⁸Kholu gigomo gya Siyoni gi sasedwe gi khala marumbi, gwa gu gimbilagimbila umo migehe.

¹⁹Aholu, Uwe PFHUMU Nungungulu, u ngu vbanya kala gupindruga, ni wufumu wago, wu na gimbila khu mimela ni mimelana.

²⁰Ina u na hi divala gikhati gyatshavbo, gani? Ni gu hi pfhurarela khu gikhati nya gingi, gani?

²¹PFHUMU Nungungulu, hi wuyise iyo gwago gasi hi khale vathu va wuyago khu lisine. Hi khodza guta vbanya nga matshigu ya gale.

²²Ina kamwe u hi digede muphelo, gani? Ina u ngari ni likhulo ngudzu khethu, gani?