Read gitonga Ezekiyeli 11 Bible Online

Ezekiyeli 11 - gitonga bible

Ezekiyeli 11

¹Khavbo avbo, Liphuvbo li di nyi khusedzela, li nyi yisa vbamwanyatunu wu manegelago khu phuvbo ga Khugadambo nya Nyumba ya PFHUMU Nungungulu. Vbale, vbanyangwatunu nya mwanya, gu diromo magumavili na livbandre vama, nyi di wona vbakari gwawe, Jazaniya, mwamana wa Azuri, gumogo ni Pelatiya, mwamana wa Bhenaya, vathangeli nya vathu.

²A di nyi embela, khuye: “Mwamana wa muthu, ava khu vama vale va kutsedzelago gu girwa guvivba ni gu ninga wusingalagadzi nya gunyenyeze dhoropani momu.

³Avo vari, khavo: Gu si gu vbohi gikhati nya gu hi dzi garadze khu guvbaha dzinyumba; lidhoropa leli khali, ethu hi nyama yi guromo ndrani gwaye.

⁴Uwe mwamana wa muthu, ganela navo; va profete.”

⁵Khavbo avbo, Liphuvbo la PFHUMU Nungungulu li dita gwangu li ta nyi embela, khilo: PFHUMU Nungungulu a ngu ganela kharati, khuye: Khiso mu ganelago, enu va na Israyeli, aholu eni nyi ngu siti iso mu si pimisago khu myonyoni gwanu.

⁶Mu songetede vathu nya vangi dhoropani momu, gambe mu tadzide dzindzila dzaye khu sirumbi.

⁷Khu guralo, Mune PFHUMU Nungungulu a ngu ganela kharati, khuye: “Sirumbi mu mbambamisedego dzindzilani nyama, lidhoropa leli khali; aholu eni nyi na mi tutumisa khumo.

⁸Enu mu na ni hwanga ni matshari, aholu eni nyi na mi resela matshari, a ngu ganela Mune PFHUMU Nungungulu.

⁹Eni nyi na mi dusa dhoropani momu nyi mi ningela mandzani ga va nya mayigo, nyi na thuma thumo wangu nya gu mi lamuleni.

¹⁰Mu na songwani khu matshari, eni nyi na mi lamula mivbinganoni ga Israyeli. Mu na dzitini gukhenu eni kheni PFHUMU Nungungulu.

¹¹Lidhoropa leli kha li na nga khala khali gwanu, a nenu kha mu na nga khala nyama ndrani gwaye; eni nyi na mi lamula mivbinganoni ga Israyeli.

¹²Mu na dziti nya gukhenu kheni PFHUMU Nungungulu, kholu kha mwa thuma gukhedza khu sileletelo sangu, ambari gu yingisa milayo yangu; gambe mu sayiside sileletelo nya mayigo nya vaakelane vanu.”

¹³Gikhati eni nyi nga bani nyi profeta, Pelatiya, mwamana wa Bhenaya, a difa. Khavbo avbo, nyi di khidzima nyi kuha mafu khu khovbe, nyi lila khu lito nya gukhugege, kheni: “Ah! Mune PFHUMU Nungungulu! Ina u na mbembisa mitshaledwa yatshavbo ya Israyeli, gani?”

¹⁴PFHUMU Nungungulu a di nyi embela, khuye:

¹⁵Mwamana wa muthu, vandriyago, valongo vago nya lisine ni ndranga yatshavbo ya Israyeli, vatshavbo khu vale va nga ganedwa khu vavbanyi va Jerusalema, khavo: Khugani mu hongola hwindzo ni PFHUMU Nungungulu, kholu litigo leli a hi ningide gu khala thomba yathu.

¹⁶Khu guralo, va embele, khuwe: Mune PFHUMU Nungungulu, a ngu ganela kharati, khuye: “Ambari eni nyi va rumidego gu hongola mayigoni ya hwindzo ngudzu, ambari nyi va phalalegisa vbakari nya mayigo, khu gikhatinyana, nyi na khala nyumba nya miphaso, ga mayigo va yisidwego umo.”

¹⁷Khu guralo, va embele, khuwe: Mune, PFHUMU Nungungulu a ngu ganela kharati, khuye: Eni nyi na mi tombanisa vbakari nya mayigo, nyi mi wuyisa khu mayigoni mu phalalegidego umo, nyi mi ninga litigo la Israyeli.

¹⁸Gikhati va vbohago tigoni momo, va na duse sifananiso satshavbo nya guvivbe, ni gu diga gukhozela sifananiso.

¹⁹Nyi na thela gwawe monyo moyo basi, nyi va thela liphuvbo nya liphya; nyi na dusa gwawe monyo nya giwindri, nyi thela monyo nya nyama.

²⁰ Satshavbo soso gasi va kodza gu landrisa silayelo sangu ni gu vegisa milayo yangu, va wuya va yi thuma; avo va na khala vathu vangu, Eni nyi na khala Nungungulu wawe.

²¹“Aholu vale myonyo yawe yi golago silo nya gunyenyeze, nyi na va bweledzela khu guvivba va giridego, a ngu ganela Mune PFHUMU Nungungulu.”

²²Khu guralo, dzikerubhimi ni marodha khu phuvbo, dzi di khusa mambapi yawe, ni wudhumo wa Nungungulu wa Israyeli, wu diri nadzo.

²³ Wudhumo wa PFHUMU Nungungulu wu di khuga khu dhoropani wu ya ema vbatshani nya gigomo gi manegelago khu Khugadambo nya lidhoropa.

²⁴Khavbo avbo, Liphuvbo la Nungungulu li di nyi khusa, khu giwoniso li nyi yisa ga avo va nga bani va vbagedwe va yiswa Bhabhiloni. Khavbo avbo, gi di vbela giwoniso nyi nga bani nyi gi wona.

²⁵Nyi diya embeledzela vale va vbagedwego satshavbo iso PFHUMU Nungungulu a nyi yeyedzidego.