Read gitonga Ezekiyeli 18 Bible Online

Ezekiyeli 18 - gitonga bible

Ezekiyeli 18

¹PFHUMU Nungungulu a di nyi embela, khuye:

² Ginani mu gi manago, enu mu ganelago mavingu yaya khu mahungu nya litigo la Israyeli, khenu: “Vababe va hodzide dziuvha nya dzimbihu, magwaha nya sanana ma ngu khuyugela?”

³Nyi ngu sambanya khu guvbanya gwangu, a ngu ganela Mune PFHUMU Nungungulu khuye, enu kha mu na ganela gambe khu livingu lolo tigoni ga Israyeli.

⁴Wonani nya gukhenu mihefemulo yatshavbo ya gu lumba eni; hefemulo wa babe gumogo ni wa gyanana ya gu lumba eni. Wule a nga ghohago khuye a nafago.

⁵Nyi na fananisa khu muthu a gu bani a lulamide, a girago nayo ni lisine,

⁶a si hodzeligo malangani nya miphaso ya sigomoni, ambari gu khusa maho yaye a khedza sifananiso sa va na Israyeli. Kha nyenyezisi mwangadzi wa muakelane waye, ambari gu bhaya ni nyamayi a guromo gikhatini nya guwone matshigu yaye nya ngima.

⁷Kha tshanisi muthu, gambe a gu bweledza iso a dzegidego khu gu fiyari, khabi savane, gambe a gu ninga guhodza vandzale, a ninga guambala vale va gu ni wuhagadzo.

⁸Kha lombisi dzitsapawu khu gu vbweta bhindzu, ambari guvbweta gu dzi velegisa, a ngu himbedzela mandza yaye gu gira silo nya guvivbe, a gu gira wulamuli nya gululame vbakari nya muthu ni muthu.

⁹ Uye a gu thuma gukhedza khu sileletelo sangu, a yingisa milayo yangu khu gutumbega. Muthu yoyo lulamide; khu lisine a na vbanya, a ngu ganela Mune PFHUMU Nungungulu.

¹⁰“Uye a gu velega gyanana nya mbafa, ni gu songa vathu, mwendro gu girela ndriyaye gimwegyo nya silo sesi,

¹¹a si landrisigo dzindzila dza babe waye, aholu a hodzela malangani nya miphaso ma manegelago sigomoni, a nyenyezisa mwangadzi wa muakelane waye.

¹²A tshanisa sisiwana ni vahamugi, a gira wuvafa, a si bweledzi esi a fiyaridego. A khozela sifananiso ni gu gira mithumo nya guvivbe.

¹³A fiyarisa na gu lirela bhindzu ni guvelegisa. Muthu nya nga yoyo, a ngu yela guvbanya, gani? Ahihi, kha na vbanya! Khu kotani nya mithumo yatshavbo yoyo nya guvivbe, khu lisine a nafa, uye mune kamwe a na rwala nandru nya gufe gwaye.”

¹⁴Wonani nya gukhenu, gyanana gyogyo, gya gu velega gyanana gi wona sighoho satshavbo a giridego babe waye, ambari na gi si wone, gi si giri silo nya nga isoso,

¹⁵gi si hodzeli musigomoni ambari gu khusedza maho gi khedza sifananiso sa va na Israyeli. Gi si nyenyezisi mwangadzi wa muakelane waye,

¹⁶gi si tshanisi muthu, gi bweledza iso gi fiyaridego, gi si giri wuvafa, aholu gi ninga guhodza vandzale ni gu ninga guambala vale va gu ni wuhagadzo.

¹⁷Gi himbedzela mandza yaye gu gira guvivba, gi si fiyarisi khu gu vbweta bhindzu, gi gira gululama gwangu, gi landrisa sileletelo sangu, gyanana gyogyo, kha gi na ngafa khu kotani nya guvivbe ga babe waye; khu lisine gi na vbanya.

¹⁸Aholu babe waye, khuye a nafago khu kotani nya guvivba a gu giridego, kholu tshaniside ni guba dzithomba dza vandriyaye, ni gu gira ugo nyamba yela vbakari ga vathu vaye.

¹⁹Aholu, mu na wudzisani, khenu: “Khu ginani gyanana gi gumba bela nandruni ga babe waye?” Kholu gyanana gi giride ugo gu gu gwadi ni gululama, gambe gi diri ni githawo ni gu yingisa sileletelo sangu satshavbo, khu kotani nya isoso, igyo khu lisine gina vbanya.

²⁰“Muthu a ghohago khuye a yelago gufa; gyanana gima kha gi na nga khala mune nya gighoho gya muvelegi waye, ambari muvelegi nuye kha na mana nandru khu gighoho gya mwanaye. Muthu nya gululame a na hakha gululama gu mu lumbago, uye nyamba lulama a na tsayiswa khu gumba lulama gwaye.”

²¹Aholu, muthu nya guvivbedwe khu monyo a gu vbindrugedza mavbanyelo, a diga sighoho saye satshavbo a si giridego, a yingisa sileletelo, a gira gululama ni gu landrisa nayo wangu, khu lisine a na vbanya.

²²Kha gu na alakanywa ni gimwegyo nya sighoho satshavbo a giridego; khu kotani nya gululama a giridego, uye a na vbanya.

²³Ina kamwe mwa gu alakanya gukhenu, nyi ngu tsaka khu gu wona muthu nya guvivbedwe khu monyo na gufa, gani? A ngu wudzisa Mune PFHUMU Nungungulu. Igyo eni nyi gi vbwetago khu gu a vbindrugedza mavbanyelo, a diga dzindzila dzaye nya guvivbe, gasi a vbanye.

²⁴Aholu, muthu nya gululame, a gu diga gululama gwaye, a gira gighoho nya gufanane ni sile si giridwego khu va nya guvivbedwa khu myonyo, a ngu yela guvbanya, gani? Ni moyo nya mithumo yaye nya gululame kha yi na alakanywa! Khu kotani nya gumba tumbega gwaye ni sighoho a si giridego, a nafa khiso.

²⁵Khu guralo, enu mwa gu ganela, khenu: “Ndzila ya Pfhumu kha ya lulama.” Yingisa, uwe ndranga ya Israyeli. Ina ndzila yangu kha ya lulama, gani? Khandri dzindzila dzanu dzi ngamba lulama, gani?

²⁶Muthu nya gululame a gu ndreya gululamani gwaye a gira gighoho, uye a nafa khigyo; A nafa khu kotani nya gighoho a giridego.

²⁷Aholu muthu nya guvivbedwe khu monyo, a gu hambana ni guvivba gwaye, a gira ugo gu lulamidego ni nayo, uye a na vbulugisa womi waye a vbanya.

²⁸A gu sambanya gu diga guvivba gwatshavbo a giridego, uye khu lisine a na vbanya kha nafa.

²⁹Khu satshavbo, va na Israyeli va gu ganela, khavo: “Ndzila ya Pfhumu kha ya lulama.” “Enu va na Israyeli, dzindzila dzangu khidzo dzi ngamba lulama, mwendro khidzo dzanu dzi ngamba lulama, gani?”

³⁰Khu guralo, enu va na Israyeli, eni nyi na mi lamula, moyo ni moyo gukhedza khu dzindzila dzaye. A ngu ganela Mune, PFHUMU Nungungulu. Dzi layeni mu hambana ni guvivba gwanu gwatshavbo, gasi gighoho gi si khali givangelo nya gu mu tshunganise.

³¹Dzudzugani hwindzo guvivba gwatshavbo mu gu giridego, ambalani monyo ni hefemulo nya wuphya; kholu, khu ginani mu dzi vangelago lufu, enu va na Israyeli?

³² Kholu, eni kha nyi tsakiswi khu gufa ga muthu. Dzi layeni mu na vbanya! A ngu ganela Mune PFHUMU Nungungulu.