Read gitonga Ezekiyeli 19 Bible Online

Ezekiyeli 19 - gitonga bible

Ezekiyeli 19

¹Wombani huwa mu lilela vafumeli va Israyeli,

²mu ganela, khenu: “Khu mani mayime wago? Nghala nya ngadzi yi lade vbakari nya dzinghala nya vamatune, yi mamisa singhalana saye na si yi randrede.

³ Gimwegyo nya singhalana saye, gi di dandra gi khala nghala nya tshivba. Gi di hevbulela gusota; gi di vbadzulela vathu.

⁴Mayigo na ma pwide gu ganedwa khiyo, va di yi vbweta kala vaya yi mola phalani gwaye, va yi pola thonvu va thela khalo, va yi yisa tigoni ga Egipito.

⁵Avbo yi nga wona, gukhiyo, esi yi nga bani yi si lindrela kha sa girega, yi di hatha gimbe nya singhalana saye, yi gi gira nghala nya tshivba.

⁶Iyo yi di legalega vbakari nya dzinghala, khu guralo, yi di dandra yi khala nghala nya tshivba, yi hevbulela gusota, yi di vbadzulela vathu.

⁷Yi di khungumula makhokhola ya valala, ni dzinyumba nya wufumu ni madhoropa yawe, gutsekatseka mafu ni satshavbo si nga bani si guromo umo, khu gupwa gubhonga gwaye.

⁸Khavbo avbo, mayigo nya vaakelane ma di yi dhumela, va yi dembela khu ligoga gasi gu yi mola, iyo yi di modwa khu naphwi, va nga bani va wu dembide.

⁹Va di yi ndrindra khu khalo waye, va yi thela gikayelani, va yi yisa ga mufumeli wa Bhabhiloni; va di yi khothela makhokholani, gasi gu si pwali gambe lito laye sigomoni sa Israyeli.

¹⁰Mayi waye a diri kha nga uvha wu yadwego vbafuvbi ni mati; wu thelago matamo nya mangi, ni gu ninga mihandro nya yingi, kholu gu diri ni mati nya mangi.

¹¹Matamo yaye ma di tiyide gasi gu gira ndronga ya mufumeli, uwo wu di dandra ngudzu wu vbindra matamo, wu di wonwa gulapha gwaye ni matamo yaye nya mangi.

¹²Aholu wu di sigudwa khu tshivba nya likhulo, wu theswa kala vbavbatshi, phuvbo ya Khugadambo yi di wu wunisa, mihandro yi di dusedwa, ma di fanyega ni gubanga matamo yaye nya gutiye, ma dagarela khu nilo.

¹³Olu yi di yadwa giwulani, umo nya mafu nya lipfule ni gihala.

¹⁴Khumo nya lihale limwedo nya matamo yaye, gu di duga nilo wu vbisa mihandro yaye, gwaye kha gwa tshala ni litamo limwedo nya gutiye; li gu ilo li yelago gu gira ndronga ya mufumeli. Igyogyo khigyo gililo, gi na khala nga gililo kala nolu.”