Read gitonga Ezekiyeli 2 Bible Online

Ezekiyeli 2 - gitonga bible

Ezekiyeli 2

¹Uye a di nyi embela, khuye: “Mwamana wa muthu, khuga u eme, kholu eni nyi na ganela nago”

²Na nga guganela, Liphuvbo li di bela gwangu, nyi khuga nyi ema, nyi pwa lito la uye a nga bani na gu ganela ni eni.

³Uye a di nyi embela, khuye: “Mwamana wa muthu, nyi ngu gu rumela ga va na Israyeli, vathu nya guyeyise, va nyi wugedego; avo gumogo ni vababe vawe, kala na muhuno va nga gu nyi wugela.

⁴Ga vathu nyi na gu rumelago, va bangide mihungo ni guyeyisa. U na ya va embela, khuwe: Mune, PFHUMU Nungungulu, a ngu ganela kharati.

⁵Avo gani va ngu gu yingisa, gani kha va gu yingisi, kholu vathu nya guyeyise, aholu va na dziti nya gukhavo a di romo muprofeti vbakari gwawe.

⁶Uwe, mwamana wa muthu, u nga thavi, ambari gu khala hwanga khu magana yawe. Ambari va gu khala nga likhabi ni miba avbo gwago, uwe vbanya vbakari nya dzihume. U nga tedwi khu hwanga khiso va na ganelago, ambari gu thuruga khu gu va wona, kholu avo vathu nya guyeyise.

⁷Aholu uwe, u na va embela magana yangu, ambari va gu dzumela gu yingisa, mwendro gumba dzumela gu yingisa, kholu avo vathu nya guyeyise.

⁸Aholu uwe mwamana wa muthu, upwa esi nyi gu embelago. U nga khali nuwe muthu nya guyeyise kha nga vathu vale; tula likana u hodza iso nyi gu ningago.”

⁹ Nyi di khusa maho nyi khedza, nyi di wona mandza na ma thawuludzidwe eno gwangu, na ma pharide tshimbo nya libhuku.

¹⁰Uye a di li thawuludza mbeli gwangu. Ilo li di lovidwe ndrani ni vbavbandze; gu di lovidwe magana nya gililo, wuvi ni gudilela.