Read gitonga Ezekiyeli 20 Bible Online

Ezekiyeli 20 - gitonga bible

Ezekiyeli 20

¹Khu litshigu nya likhumi, nya ngima nya livbandre, nya mwaga nya livbandre na mivili, nya guvbagedwe va yiswa wugumbini, madhota nya gukari ya Israyeli, ma dita wudzisa ga PFHUMU Nungungulu, va khala mbeli gwangu.

²Khavbo avbo, PFHUMU Nungungulu a di nyi embela, khuye:

³Mwamana wa muthu, ganela ni va na Israyeli u va embela kharati, khuwe: Mune PFHUMU Nungungulu, a ngu ganela kharati, khuye: Enu mu dzude mu ta nyi wudzisa iso nyi si golago, gani? Nyi ngu sambanya khu guvbanya gwangu kheni, kha nyi na mi dzumedzisa guta nyi wudzisani. A ngu ganela Mune PFHUMU Nungungulu.

⁴Uwe mwamana wa muthu u na va lamula? U na va lamula, gani? Va dundrugise mithumo nya gunyenyeze yi giridwego khu vababe vawe,

⁵u va embela, khuwe: Mune PFHUMU Nungungulu a ngu ganela, khuye: Litshigu nyi hathidego Israyeli, nyi sambanyide na nyi khusedzide mandza vbatshani nya situgulwana nya linyangwa la Jakobe, nyi dzi yeyedza gwawe tigoni ga Egipito. Na nyi khusedzide mandza, nyi di va embela, kheni: Eni kheni PFHUMU Nungungulu wanu.

⁶ Ga litshigu lile nyi sambanyide gwawe gukheni nyi na va dusa tigoni ga Egipito, nyi va yisa ga litigo nyi va hathedego, litigo li gogago mahwe ni wulombe, li mburidego guvbindra mayigo yatshavbo.

⁷Khavbo avbo, nyi di va embela kheni, moyo ni moyo a na dige gukhedzisela silo nya guvivbe, gambe mu nga dzi nyenyezisi khu sifananiso sa Egipito. Eni kheni PFHUMU Nungungulu wanu.

⁸Aholu avo va di nyi kanyisa, va si dzumeli gu nyi yingisa; mwalo a nga dzumela gu diga sifananiso nya gunyenyeze sa Egipito; khu guralo, eni nyi di va embela kheni nyi na guhula vbatshani gwawe likhulo langu, gasi gu landrisa khorodza yangu gwawe tigoni ga Egipito.

⁹Aholu khu lihaladzo nya lina langu, kha nya dzumela gukheni lina langu li nyenyeziswa, li gu wonwa khu mayigo va vbanyidego umo ni mahoni ga vale nyi dzi wonegisidego gwawe, gasi gu va dusa tigoni ga Egipito.

¹⁰Kotani nya isoso, nyi va duside tigoni ga Egipito nyi va yisa giwulani.

¹¹Nyi va ningide sileletelo sangu, nyi va gira vati milayo yangu, khu guralo, uye a na yi landrisago, a na vbanya khiyo.

¹² Nyi va ningide gambe dzisabhadho dzangu, dzi khale kha nga giyeyedzo vbakari gwawe, gasi va kodze guti gu gukhavo eni kheni PFHUMU Nungungulu, nyi va agisago.

¹³Aholu va na Israyeli va nyi kanyiside giwulani, va si landrisi sileletelo sangu, va hambana ni milayo yangu, gasi khu gu yi landrisa, va di hadza guvbanyiswa khiyo; gambe, va nyenyeziside dzisabhadho dzangu; khu guralo, nyi va embede gukheni nyi na guhula likhulo langu vbatshani gwawe, gasi nyi va mbembisa giwulani.

¹⁴Aholu khu lihaladzo nya lina langu, kha nya dzina kheni lina langu li nyenyeziswa na li gu wonwa khu mayigo, a gu vathu va nyi wonidego na nyi va dusa khu tigoni ga Egipito.

¹⁵Ambari khu guralo, na vari giwulani, nyi khusedzide mandza nyi sambanya gambe gukheni, kha nyi na nga va yisa ga litigo nyi va ningidego, litigo li gogago mahwe ni wulombe, li mburidego guvbindra mayigo yatshavbo,

¹⁶kholu avo va bombide milayo yangu, kha va thuma gukhedza khu sileletelo sangu, va nyenyeziside dzisabhadho dzangu. Kholu myonyo yawe yi di namarede ga sifananiso sawe.

¹⁷Nyi di va khedza nyi va pwela wusiwana, kha nya va pfhungumula ambari gu va mbembisa giwulani.

¹⁸Aholu nyi di embela sanana sawe giwulani, kheni: Mu nga yingisi sileletelo sa vavelegi vanu, gambe mu nga dzi nyenyezisi khu sifananiso sawe.

¹⁹Eni kheni PFHUMU Nungungulu wanu; landrisani sileletelo sangu, mu sayisa milayo yangu ni gu yi thuma.

²⁰Agisani dzisabhadho dzangu, gasi idzo dzi khale giyeyedzo vbakari gwanu. Khu guralo, mu na dzitini gukhenu eni kheni PFHUMU Nungungulu wanu.

²¹Aholu sanana niso si di nyi wugela, si si landrisi sileletelo sangu, ambari gu sayisa milayo yangu, iyo va nga vbweta gu vbanyiswa khiyo, avo va nyenyeziside dzisabhadho dzangu; khu kotani nya isoso nyi nga ganela kheni nyi na guhula likhulo langu vbatshani gwawe giwulani, nyi wusa khorodza yangu.

²²Aholu kha nya si gira, nyi di neredza mandza yangu, khu kotani nya lihaladzo nya lina langu, gasi nyi si li nyenyezisi ga mayigo ma nyi wonidego na nyi gu va dusa khu tigoni ga Egipito.

²³Nyi di khusedza mandza, gambe nyi sambanya avbo gwawe giwulani gukheni nyi na va phalalegisa vbakari nya mayigo ni gu va legalegisa mayigoni nya valombo;

²⁴kholu kha va sayisa milayo yangu, aholu va di nyenya sileletelo sangu ni gu nyenyezisa dzisabhadho dzangu, maho yawe ma dogorela sifananiso sa vavelegi vawe.

²⁵Khu kotani nya isoso, nyi va ningide sileletelo nyamba sadi, ni milayo yi gumba va ninga guvbanya;

²⁶nyi di va diga va dzi nyenyezisa khu kotani nya miningelo yawe, ni gu gira miphaso nya guvbiswe sanana nya matiwula, gasi nyi va thela hwanga, va kodza gu nyiti gukhavo eni kheni PFHUMU Nungungulu.

²⁷Khu guralo, uwe mwamana wa muthu, ganela u embela va na Israyeli, khuwe: Mune PFHUMU Nungungulu a ngu ganela kharati, khuye: Kha nga vababe vanu navo va nyi vadego, va nga hambana ni eni.

²⁸Kholu avbo nyi nga va resago ga litigo nyi va tumbiside gu va ninga, gikhati va nga wona vbale gigomo nya gulaphe, mwendro simbo nya khongolo, va di ya gira avbo miphaso yawe, va di gira miningelo yi nga bani yi wusa likhulo langu, va di gu bikela libani ni miningelo yawe nya mawadwa.

²⁹Khavbo avbo, nyi di va wudzisa, kheni: Giluvelo muni gile gigomotunu yoyo mu hongolago? Lina laye gya gu ranwa pwani i Bhama kala na muhuno.[2]

³⁰Khu guralo, ganela u embela va na Israyeli, khuwe: Mune, PFHUMU Nungungulu a ngu ganela kharati, khuye: Ina enu khandri mwa gu dzi nyenyezisa gu fanana ni edzi va dzi nyenyezisidego khidzo vababe vanu, gani? Khandri mwa gu namarela ga sifananiso sawe nya gunyenyeze, gani?

³¹Gikhati mu ningelago miningelo yanu, ni miphaso nya guvbise niloni sanana sanu, ina khandri mwa gu simama gu dzi nyenyezisa khu sifananiso sanu satshavbo, kala muhuno, gani? Ina eni nyi na mi dzumedzisa enu va na Israyeli, gukheni nyi wudziseni, gani? Nyi ngu sambanya khu guvbanya gwangu, gukheni: Kha nyi na mi diga mu nyi wudzisa, a ngu ganela Mune PFHUMU Nungungulu.

³²Enu mwa gu ganela, khenu: Ha guvbweta gu gira nethu kha nga vathu nya mayigo yatshavbo, va dzi girelago vanungungulu nya misimbo ni siwindri. Aholu isoso mu si pimisago, gima kha si na nga girega.

³³Nyi ngu sambanya khu guvbanya gwangu, a ngu ganela Mune PFHUMU Nungungulu, nyi na mi fumela khu gyandza nya tshivba ni libogo langu nya gukhugege, ni likhulo nyi guhudego, nyi na fuma vbakari gwanu.

³⁴Nyi na mi wuyisa khu vbakari nya vathu, nyi mi tombanisa khu vbakari nya mayigo mu phalalegedego umo, khu mandza ni libogo nya tshivba, ni likhulo langu.

³⁵Nyi na mi yisani giwulani, hwindzo ni mayigo yoyo, avbovbo, nyi na mi lamula khovbe ni khovbe.

³⁶Kha nga edzi nyi lamudego khidzo vababe vanu giwulani gya Egipito, nyi na mi lamula nenu kharato. A ngu ganela Mune PFHUMU Nungungulu.

³⁷Nyi na mi gira mu vbindre khu vbavbatshi nya ndronga yangu, nyi mi gurumedza gu landrisa gidzumeledzwano gyangu.

³⁸Nyi na kasa vbakari gwanu vale va nyi kanyisago ni gu nyi wugela. Nyi va dusa tigoni mule va vbanyago umo, aholu kha va na wuya tigoni ga Israyeli. Khavbo mu na dzitigo gukhenu, eni kheni PFHUMU Nungungulu.

³⁹Gasi khu enu va na Israyeli, Mune PFHUMU Nungungulu, a ngu ganela kharati, khuye: Moyo ni moyo nya enu, a na simame guya khozela sifananiso saye, kholu kha mu dzini gu nyi yingisa; aholu mu nga nyenyezisi lina langu nya guage khu miningelo ni sifananiso sanu.

⁴⁰Kholu, gigomoni gwangu nya gukatege, gigomo nya gulaphe gya Israyeli, a ngu ganela Mune PFHUMU Nungungulu, vbale ndranga yatshavbo ya Israyeli yi na nyi khozela, avbo eni nyi naya va hakha. Gambe, nyi naya va gurumedza gu nyi ninga miphaso ni miningelo yawe nya yadi nya mihandro nya guhegule, gumogo ni silo sawe satshavbo nya guage.

⁴¹Khu hwane nya gu na nyi mi wuyiside khu mayigoni mu nga bani mu phalalegede umo, nyi mi tombanisa nyaluphye, nyi na hakha khu gutsaka miphaso yanu nya guvbiswe, mahoni ga mayigo yatshavbo, mu na nyiti gukhenu eni nyi agide.

⁴²Enu mu na nyiti gukhenu eni kheni PFHUMU Nungungulu, gikhati nyi na va wuyisago tigoni ga Israyeli, litigo nyi sambanyidego, na nyi khusedzide mandza, gu ninga vababe vanu.

⁴³Avbovbo mu naya alakanya dzindzila dzanu ni mithumo yanu yatshavbo iyo mu dzi nyenyezisidego khiyo, mu napwa wuvi enu vamune kamwe khu iso mu giridego.

⁴⁴Mu na nyiti gukhenu Eni kheni PFHUMU Nungungulu, gikhati nyi mi girelago esi khu lihaladzo nya lina langu, nasiri khu gugola dzindzila dzanu nya guvivbe, mithumo yanu nya gunyenyeze, ni mithumo yanu nya wukanganyisi, enu va na Israyeli; a ngu ganela Mune PFHUMU Nungungulu.

⁴⁵PFHUMU Nungungulu a di nyi embela, khuye:

⁴⁶Mwamana wa muthu, thendregedza u khedza phuvbo ga Marandzi; ganela magana yago u embela va Marandzi, u embela gambe ni likhabi la Marandzi.

⁴⁷Embela likhabi la Marandzi, khuwe: Yingisa magana ya PFHUMU Nungungulu u mu embela, khuwe: Mune PFHUMU Nungungulu, a ngu ganela kharati, khuye: Nyi womo vbafuvbi ni gu guvbisa khu nilo, yi dagarela kharati misimbo yago yatshavbo, nya gunagane ambari iyo nya gubange. Malavbelavbe nya guvbise kha ma na tshimwa, ma na vbisa dzikhovbe dzatshavbo, gukhugela Marandzi kala Wuronga.

⁴⁸Mu na wona gukhenu Eni PFHUMU Nungungulu nyi wu khondriside, aholu kha wu na tshimega.

⁴⁹Khavbo avbo, eni nyi di, kheni: “Oh! Mune PFHUMU Nungungulu! Vathu vava vari, khavo: Ina muthu yoyu khandri muganeli nya sipimaniso, gani?”