Read gitonga Ezekiyeli 21 Bible Online

Ezekiyeli 21 - gitonga bible

Ezekiyeli 21

¹PFHUMU Nungungulu a di nyi embela, khuye:

²“Mwamana wa muthu, thendregedza u khedza Jerusalema, u ganela khu malanga nya miphaso. U profeta khu litigo la Israyeli.”

³U va embela, khuwe: PFHUMU Nungungulu a ngu ganela kharati, khuye: Wona gukhuwe nyi na gu wugela. Nyi na homola litshari langu nyi mbembisa vbakari gwago uye nya gululame ni uye nya guvivbedwe khu monyo.

⁴Kha nga olu nyi na gu mbembisa vbakari gwago uye nya gululame ni va nya guvivbedwa khu monyo, litshari langu nyi na li dusa khu giwununi li bayisa watshavbo a vbanyago, gukhugela Marandzi kala Wuronga.

⁵Vathu vatshavbo va na dziti gukhavo eni nyi duside litshari langu khu giwununi; gima kha li na bwelela gambe wulangani gwaye.

⁶Khu guralo, uwe mwamana wa muthu, lila; phela gulila khu wuvi na va gu wona, kha nga khwatshi wu di pandrega monyo wago.

⁷“Gikhati va na gu wudzisago, gukhavo: Wa gu lilela ginani? U na va hakha, khuwe: Kotani nya mahungu maphya matago. Gikhati matago myonyo yatshavbo yi na titivala, mandza yatshavbo ma na hogolega, hefemulo watshavbo wu na titivala khu rerema, ni dzikhungumudzi dzatshavbo dzi na khala kha nga mati; wonani gukhenu si nguta, gambe si na girega; a ngu ganela PFHUMU Nungungulu.”

⁸PFHUMU Nungungulu a di nyi embela, khuye:

⁹“Mwamana wa muthu, profeta u ganela, khuwe: Pfhumu a ngu ganela kharati, khuye: Litshari, litshari li lodzidwe li bwelo li khedziga;

¹⁰li lodzidwe gasi gu sasela, li khedzigisidwe gasi gu wenengedza nga gulasa! Ina hi na nengela, gani? Ndronga ya mwamana wangu khiyo yi kanyisago misimbo yatshavbo.

¹¹Litshari li lodzidwe, gasi gu, li thumiswa khu mandza ilo li lodzidwe bwelo khavbo li khedziga, gasi gu vegwa mandzani ga musongi.

¹²Womba huwa ni gu dilela, uwe mwamana wa muthu, kholu, ilo li na songetela vathu vangu, ni dzindruna dzatshavbo dza Israyeli. Avo, gumogo ni vathu vangu va ningedwe gasi gu songwa khu matshari; khu guralo, lila u dzi veta nyonga yago.

¹³Kholu gulingwa gu nata; ginani gi na giregago ga ndronga yi nga bani yi kanyisa dzimbe, ya gumba simama yi wonega? A ngu ganela PFHUMU Nungungulu.

¹⁴Khu guralo, uwe gyanana gya muthu, profeta u khwakhwata mandza; kholu litshari li na pila guvili mwendro guraru, litshari li vangago lufu, gu songa nya gusasele nya guthise, eli li songago vathu khu maphuvbo yatshavbo.

¹⁵Gasi myonyo yi titivale ni gu engedzela gutshunganela va thega, vbafuvbi ni dzinyangwa dzawe nyi vegide litshari nya gusonge. Oh! Ilo li giridwe gasi gukhedziga kha nga gulasa gasi gu sasela.

¹⁶Uwe litshari, thendregedza khu tshivba yatshavbo u khedza nyamudye, thendregedza u khedza nyambade, ni evbini khovbe yago yi khedzago iyo.

¹⁷Eni neni nyi na khwakhwata mandza yangu, gasi nyi hefemudza likhulo langu; eni PFHUMU Nungungulu, nyi ganede.”

¹⁸PFHUMU Nungungulu a di nyi embela, khuye:

¹⁹“Olu, uwe mwamana wa muthu, vega mawonelo nya dzindzila dzimbili, avbo li na gutago khavbo litshari la mufumeli wa Bhabhiloni; dza dzimbili dzi na duga khu litigo la limwedo; vega ga idzo giwonegiso nya giyeyedzo, si vege nyangwani nya ndzila nya gubele dhoropani.

²⁰Yeyedza ndzila yi na vbohisago litshari dhoropani ga Rabha, tigoni ga va na Amoni, ni yimbe yi na vbohisago dhoropani ga Jerusalema, likhokholani la va na Judha.

²¹Kholu mufumeli wa Bhabhiloni, a na ema vbamahandzakanyatunu, maphelotunu nya dzindzila dza dzimbili, gasi gu gira nyatumbatumbane; a na lodza siholoma saye, a wudzisa vanungungulu nya malipha, ni gu khedza mabindri nya sirengo nya miphaso.

²²Khu nyamudye gwaye gu na manega nyatumbatumbane mayelano khu Jerusalema, gasi gu ruma mitshini nya gukhungumule mabhiyo, gasi gu dusa magana nya guleletele gu songa, gu khusedza malito nya gunengele, gasi gu ninga nayo mitshini yi gulela malimba, ni guwungedzela mafu ma gira sigomo, gasi gu emisa mabhiyo.

²³Isoso si na gira mahoni gwawe kha nga nyatumbatumbane nyamba phasa gilo, kholu avo va sambanyisidwe khu gifungo vbakari gwawe; aholu uye a na alakanya guvivba, gasi va modwe.

²⁴Khu guralo, Mune PFHUMU Nungungulu a ngu ganela kharati, khuye: Olu mu nyi alakanyisidego guvivba gwanu, gu tugulega gunyenyeza gwanu, gutumbuluga sighoho sanu, khu mithumo yanu yatshavbo mu girago, kha nga olu mu si alakanyago, mu na rwegwa nandru khu kotani nya isoso.

²⁵Uwe muthangeli wewe wa Israyeli, muthu nya guvivbedwe khu monyo ni gumba thava Nungungulu, litshigu lago li nguta, ni gikhati nya tsayiso wago nya mahegiso gi ngu vboha;

²⁶Mune PFHUMU Nungungulu a ngu ganela kharati, khuye: Tshula dzingandzu dzago ni gihugu nya wufumu; kholu olu khandridzosaye ni gale; gu na khusedzwa va nya gusolega, gutshiswa vbavbatshi va nya matshandza.

²⁷Gupfhungumudwa! Gupfhungumudwa basi! Nyi na vbindrugedza lidhoropa li khala marumbi, ilo kha li na nga wusedzwa gambe, kala a vboha uye li mu lumbago khu lisine; khuye nyi na mu ningago.

²⁸Uwe mwamana wa muthu, profeta u ganela, khuwe: PFHUMU Nungungulu a ngu ganela kharati khu sanana sa Amoni ni gutsorodzela gwawe, khuye: Litshari, litshari li homodwe khu giwununi, li pharwa khu mandza, li lodzidwe gasi gu sasela, li lodzidwe li khedziga gasi gu mbembisa, ni gu khedziga kha nga gulasa;

²⁹gasi li vegwa thamoni ga va nya gu dzi nyenyezisa ni va nya guvivbedwa khu myonyo, avo litshigu lawe ni gikhati nya tsayiso wawe nya guhegise gi vbohidego, na va gu gu wonisa siwoniso nyamba phasa gilo, ni gu sasuledza malipha.

³⁰Bweledza litshari lago u li khwetedza gikhwesoni gwaye. Kholu nyi naya gu lamulela wulangani u wumbidwego avbo, ni tigoni gwago nya mavelego.

³¹Nyi na vbaladza vbatshani gwago likhulo langu, ni khorodza yangu yi na khondra kha nga nilo, nyi na gu ningela mandzani ga vathu nya dzihanyi, va olovedego gu sasela.

³² U na khala dzikhuni nya nilo, novba wago, wu na vbaladzwa vbakari nya litigo, gima khu na alakanywa gambe; kholu eni, PFHUMU Nungungulu, kheni nyi ganedego.”