Read gitonga Ezekiyeli 23 Bible Online

Ezekiyeli 23 - gitonga bible

Ezekiyeli 23

¹PFHUMU Nungungulu a di nyi embela, khuye:

²“Mwamana wa muthu, Gu manegide vanyamayi vavili nya sanana sa mayi moyo.”

³“Avo va khade maphuphulu tigoni ga Egipito, va dzi bedzedzela wubhayini gukhugela wumbirini gwawe. Va dzumela gu ganywa ganywa mavele, ni gu ghohetedwa wukendzi wawe.”

⁴“Malina yawe a diri aya: Uye nya koma khu Owolani, uye nya nandra khu Owolibhani; avo va diri vagadzi vangu, va nyi velegede sanana nya sikhwathana ni sagadzyana. Owolani, khu Samariya, Owolibhani, khu Jerusalema.”

⁵“Owolani a dzi bedzedzede wubhayini na nga gu nyi lumba; uye a di tala khu gu navela sibhayi saye a gu Vaasiriya, vaakelane vaye,

⁶na va ambade guambala nya livala la damboni, vafumeli ni valamuli, vatshavbo avo nya vakhileli nya dzikavalu, madzaha ni maambalelo nya gufanane.”

⁷“Uye a di dzi ningela kha nga liphuphulu ga vama vatshavbo nya wumburi nya Vaasiriya, a di dzi nyenyezisa khu sifananiso sa moyo ni moyo nya vama vale a nga bani a va dogorela.”

⁸“Uye kha nga diga wuphuphulu a wu phedego tigoni ga Egipito, gikhati nya wumbiri waye, vama va di lala naye, va ghohetela wunyamayi nya wukendzi waye, ni gu dzi tsakisa khuye.”

⁹“Khu kotani nya isoso, eni nyi mu ningede mandzani nya sibhayi saye, nya Vaasiriya, vale uye a va haladzidego ngudzu.”

¹⁰“Avo va di mu tshulela guambala gwaye, va mu diga nari wumbwiri, va di dzega sanana saye nya sikhwathana nesi nya sagadzyana gumogo naye, vaya va songa khu matshari. Uye a di mana ndruma nya guvivbe vbakari ga vanyamayi. Khavbo avbo, a di ningwa tsayiso.”

¹¹“Nandra waye Owolibhani, na si wone isoso, gunavela nya wubhayi waye, wu di vbindra wa koma waye.”

¹²“Uye nuye a di haladzana ngudzu ni Vaasiriya, vafumeli ni dzindruna, vaakelane vaye, na va ambade gipani nya guenele, vatshavbo nari madzaha ni vakhileli nya dzikavalu.”

¹³“Nyi di wona nya gukheni uye nuye a dzi nyenyeziside; vatshavbo va di landra ndzila mweyo.”

¹⁴“Aholu Owolibhani a di engedzela wuphuphulu waye, kholu a di wona vama na va lovidwe ndzarini, sithombe nya gufuvile nya Vakalidhiya,

¹⁵na va hungide mabhandri siwununi gwawe, na va ambade sihugu nya mavalavala mihungoni gwawe; vatshavbo va di gu fanana ni dzindruna dzi thangelago ni dzikareta dza Bhabhiloni, sivelegwa sa Kalidhiya.”

¹⁶“Avbo uye a va wonidego, a di va dogorela ngudzu, a rumela myango yaye yiya Kalidhiya.”

¹⁷“Khavbo avbo, Vabhabhiloni va dita va ta mu vbweta va hengela malawu naye, gunavelani gwaye, va di mu nyenyezisa. Hwane nya gu bani a nyenyezisidwe khavo, uye a di hambana navo na guvbisega.”

¹⁸“Khu guralo, a di simama wuphuphuluni gwaye nyamba siha, a yeyedza wumbwiri waye, eni nyi di hidzimela hwindzo naye na nya sa tsaka, nya nga idzo nyi nga hambanago khidzo ni koma waye.”

¹⁹“Aholu, uye a di engedzela wubhayi waye, na gu alakanya gikhati nya wumbiri waye, avbo a nga bani a gu gira wuphuphulu tigoni ga Egipito.”

²⁰“A di haladzana ngudzu ni sibhayi saye, iso wuwama wawe wu nga bani na wu gu fanana ni wa dziburu ni wudogodogo wawe nya gufanane ni dzikavalu.”

²¹“Kharati, uwe Owolibhani u engedzide gambe gu gira horo nya nga uwo u wu giridego tigoni ga Egipito nu ngari mbiri, vama va di bani va gu ganya ganya dzithonvu nya mavele, va ghohetela wukendzi wago.”

²²Khu guralo, Mune PFHUMU Nungungulu a ngu ganela kharati, khuye: “Uwe Owolibha, sibhayi sago sile si nga gu swira, nyi na si gira si gu wugela si gu dwanisa khu maphuvbo yatshavbo;

²³sibhayi sakone khu Vabhabhiloni ni Vakalidhiya vatshavbo, vama va Pekodhi, va Sowa ni va Kowa, gumogo ni Vaasiriya vatshavbo, madzaha nya gumbure, vafumeli, manganagana ni dzatshavbo dzindruna nya dzinyimbi, ni vathu nya guthavisege, vatshavbo na va khilede dzikavalu.

²⁴Avo va nata gu dwanisa na vari ni matshari, dzikareta ni dzingalava, gumogo ni gidzemo nya vathu; va na ta fola khu yatshavbo maphuvbo na vari ni sitshangu nya sikhongolo niso nya sidugwana, na va ambade sihugu nya sikete. Eni nyi na gu ningela gwawe gasi va gu lamula, avo va na gulamula gukhedza khu nayo wawe.

²⁵Nyi na hidzimisa gwago likhulo nya wufu wangu, avo na va gorogide, va na dziti ginani nya gu gu gire. Va na gu pila thonvu ni dzindzeve dzago, ni vathu va na tshalago va na songetedwa khu matshari. Va na dzega sanana sago nya sikhwathana nesi nya sagadzyana, avo va na tshalago va na dagarela khu nilo.

²⁶Va na gu tshulela guambala gwago ni gu gu wandrela sombo sago nya lisima u dzi mburiselago khiso.

²⁷Kharati nyi na vbedza mithumo yago nya manyala ni wubhayi u giridego tigoni ga Egipito. Uwe u na diga gukhedza khu wudogodogo silo soso, ambari gualakanya gambe tigoni ga Egipito.”

²⁸Mune PFHUMU Nungungulu a ngu ganela kharati, khuye: “Nyi womo guvbweta gu gu ningela mandzani ga vale uwe u va zondrago, ga vale u hambanidego navo khu gu swireka.

²⁹Avo va na gu tshanisa khu livengo, va gu wandrela ni satshavbo sile u si manidego khu gu thuma. Va na gu tshulela dzitshalu va gu diga nuri wumbwiri; gu na tugulega dzitshoni nya wubhayi wago, isoso si na gu dugela khu kotani nya wudogodogo ni wuphuphulu wago,

³⁰kholu uwe u haladzanide ngudzu ni va nya mayigo, u dzi nyenyezisa khu sifananiso sawe.

³¹Uwe u landride ndzila ya koma wago; khu kotani nya isoso, nyi na gu pharisa khokho yile a sedego khiyo koma wago.

³²Mune PFHUMU Nungungulu a ngu ganela kharati, khuye: Uwe u na sela khu khokho yile a sedego khiyo koma wago, khokho nya yikhongolo ni gueta; iyo yi na gira gihegiso ni gipoyilo, khu kotani nya idzo yi gu yikhongolo khidzo.

³³Uwe u na fumwa khu guleva ni wuvi, khu khokho yoyo nya sigaradzo ni gu mbembisa, a gu khokho ya koma wago Samariya.

³⁴Uwe u na yi sela, u midza ni giminya gyaye; khu hwane u na yi pandra; u dzi nyaretela mavele khu sindzengele saye; kholu eni nyi si tiviside, a ngu ganela Mune PFHUMU Nungungulu.”

³⁵Khu guralo, Mune PFHUMU Nungungulu a ngu ganela kharati, khuye: “Kha nga olu u nyi divadego, ni gu nyi pfhurarela, u na tsayiswa khu gunyenyeza ni wubhayi u giridego.”

³⁶PFHUMU Nungungulu a di engedza gambe a nyi embela, khuye: Mwamana wa muthu, Uwe u na lamula Owolani ni Owolibhani, gani? Khu guralo, va yeyedze mithumo yawe nya gunyenyeze.

³⁷Kholu avo va giride wubhayi, mandza yawe ma kunede khu novba; va bhayide ni sifananiso sawe; kala ni sanana sawe va nyi velegedego, va si vbiside niloni va phasela sifananiso.

³⁸Eni neni va nyi giride esi: Khu litshigu la limwedo va nyenyeziside nyumbani gwangu nya miphaso gumogo ni dzisabhadho dzangu.

³⁹Ga litshigu la limwedo va nga bani va gu phasela sanana sawe ga sifananiso sawe, avo va di gu bela nyumbani gwangu nya miphaso va gu nyenyezisa. Khiso va giridego nyumbani gwangu.

⁴⁰Avo va di ranisa vama nya gute khu mayigo ya hwindzo; va di rumedwa mwango, va dita va ta mana vanyamayi vava na va hambide, va dzi pendra ni maho ni gu dzi mburisela khu mikarara.

⁴¹Uwe u khade vbagikhalotunu nya masofa, mbeli gwagyo gu nga bani gu dongisedwe meza, u vegide libani ni mafura si nga bani si nyi lumba.

⁴²Khavbo gwaye gu di pwala lito nya vathu nya vangi na va tsakide; gwaye gu di ta tombana vama nya gukari nya guleve na va guta khu giwulani, va ta ambagisa maniya mawogoni ga vanyamayi ni gu va ambagisa sihugu nya lisima hungoni.

⁴³Khavbo avbo, eni nyi di ganela mayelano khu wule a khungumudwego khu wubhayi, kheni: Ina u nga na gu simama gubhaya navo, gani?

⁴⁴Avo va di lala naye. Va di lala ni vanyamayi vale nya wudogodogo, Owolani ni Owolibhani, gukhwatshi khu wule a lalago ni liphuphulu.

⁴⁵Aholu vama va lulamidego va na va rwega tsayiso wu lumbago vanyamayi va girago wubhayi ni gu vbaladza novba; kholu avo maphuphulu, mandzani gwawe gu tade khu novba.

⁴⁶Mune, PFHUMU Nungungulu a ngu ganela kharati, khuye: Nyi na va rumela gidzemo nya gingi, nyi va ningela pfilupfiluni ni guphangwani.

⁴⁷Gidzemo gi na va veta khu siwindri ni gu va thela dzimbanga khu matshari; va na songetela sanana sawe nya sikhwathana ni esi nya sagadzyana, va na vbisa khu nilo dzinyumba dzawe.

⁴⁸Kharati nyi na vbedza wudogodogo tigoni, gasi vanyamayi vatshavbo va hevbule khu avo, va si landriseli guvivba gwawe.

⁴⁹“Tsayiso nya wudogodogo wanu, wu na thegela vbatshani gwanu, mu na rwala sighoho nya sifananiso sanu; mu na dzitini nya gukhenu eni kheni Mune PFHUMU Nungungulu.”