Read gitonga Ezekiyeli 24 Bible Online

Ezekiyeli 24 - gitonga bible

Ezekiyeli 24

¹Khu litshigu nya likhumi, nya ngima nya likhumi, nya mwaga nya livbandre na mina, PFHUMU Nungungulu a di nyi embela, khuye:

² “Mwamana wa muthu, lova lina nya litshigu leli, litshigu la muhuno; kholu mufumeli wa Bhabhiloni a ngu hidzimela guta dhumela Jerusalema, khu litshigu leli.

³Ganela ga litigo leli nya guyeyise gipimaniso gimwegyo, u va embela, khuwe: Mune PFHUMU Nungungulu, a ngu ganela kharati, khuye: Tshelega khali gasi yi vila; yi tshelege, u yi thela mati.

⁴Thela sitsuwu nya nyama, sitsuwu nya sadi nya mawundru ni magata. Yi tadze khu marambo nya yadi;

⁵Dzega nyama nya gifuyo nya gyadi nya gunone gya tshambini. Thela dzikhuni vbavbatshi nya khali, gasi gu phula marambo; ma na vile gwadi mati, si vidzwa satshavbo.”

⁶Khu guralo, Mune PFHUMU Nungungulu, a ngu ganela kharati, khuye: “Libango ga lidhoropa li vbaladzago novba, libango ga khali yi tadego khu ndzilo, ndzilo yakone yi na gumba duga! Dusa khu khalini sitsuwu, gimwegyo khu gimwegyo, nyamba si hathela.

⁷ Kholu novba a wu vbaladzidego womo vbakari gwaye; uye a wu vbaladzide vbagiwindritunu nya gutiye; kha wu vbaladza vbavbatshi, gasi gu wu futela khu mafu.

⁸Gasi gu gugumugisa likhulo langu nyi kala nyi phodza, nyi thede novba waye vbatshani nya giwindri nya gutiye, gasi wu si futedwi.”

⁹Khu guralo, Mune PFHUMU Nungungulu, a ngu ganela kharati, khuye: “Libango ga lidhoropa li vbaladzago novba Eni, nyi na li vasela nilo nya wungi.

¹⁰Wungedzela dzikhuni nya dzingi, u khondrisa nilo, u phule nyama, u yi pitela gwadi u gira mafandzara; mu vbisa marambo ma khala nguma.

¹¹Khu hwane u vega khali nya liphanga vbatshani nya magala nya nilo, gasi yi vbisa, kala sugu waye wu ngangamela, ni gunyenyeza gwaye gu nyivilige ni gu pfhurela gwaye gu vbiswa gu mwalalege.

¹²U thumide mahala; pfhurelo nya wukhongolo, kha wu dugi ambari wa gu vbiswa khu nilo.

¹³Ndzilo yoyo khu mithumo yago nya gunyenyeze; eni nyi zamide gu gu agisa, aholu khwa dzina gu agiswa, uwe gima khu na agiswa gambe gunyenyeza gwago, na li si gu vbeli likhulo langu avbo gwago.

¹⁴Eni PFHUMU Nungungulu nyi ganede. Olu gi vbohide gikhati nya gu nyi thuma. Kha nyi na bwelela hwane. Uwe u na lamudwa gukhedza khu mavbanyelo yago ni mithumo yago.” A ngu ganela Mune PFHUMU Nungungulu.

¹⁵PFHUMU Nungungulu a di nyi embela, khuye:

¹⁶“Mwamana wa muthu, khu githugedza nyi na gu dusela igyo gi godwago khu maho yago, aholu u nga soli ambari gulila, ambari gu vbaladza marongo.

¹⁷Hefemudzega huwe kape, u nga giri gililo khu vale va fudego; ambala gihugu gyago, u ambala ni silato migondroni gwago; u nga fenengedzi giledzu gyago, u nga hodzi guhodza ga vamalile.”

¹⁸Nyi di ganela ni vathu gu ngari dzimindru, khu madambo afa mwangadzi wangu; khu litshigu li landrelago, nyi di gira kha nga idzo Nungungulu a nyi rumidego khidzo.

¹⁹Khavbo avbo, vathu va di nyi wudzisa, khavo: “Uwe khu hi tshamuseli gukhuwe sa gu ganela ginani silo sesi u girago gwathu, na?”

²⁰Eni nyi di va phindrula, kheni: PFHUMU Nungungulu a di nyi embela, khuye:

²¹Embela vathu va Israyeli, khuwe: Mune PFHUMU Nungungulu a ngu ganela kharati, khuye: Nyi womo vbafuvbi ni gu nyenyezisa nyumba yangu nya miphaso, likhokhola mu dzi khusedzago khilo, li tsakisago maho yanu, gilo gi tangadzisago myonyo yanu. Sanana sanu nya sikhwathana nesi nya sagadzyana mu si tshidego iyoyo, si na songetedwa khu matshari.

²²Enu mu na girani esi nyi giridego. Kha mu na fenengedza siledzu sanu, gambe kha mu na dzumela gu hodza guhodza ga vamalile.

²³Mu na khala na mu ambade sihugu hungoni ni silato migondroni; kha mu na gira gililo ambari gulila, aholu mu na mbemba khu kota nya guvivbe gwanu, gambe mu na lilelana khu gyanu.

²⁴Ezekiyeli a na khala giwonelo gwawe; enu mu na gira kha nga edzi uye a giridego. Sa gu girega isoso, mu na dzitini nya gukhenu, eni kheni Mune PFHUMU Nungungulu.

²⁵Khu guralo, uwe mwamana wa muthu, ga litshigu eni nyi na va duselago likhokhola lawe, gunengela gwawe, wuzundzo wawe, igyo gi tsakisago maho yawe gumogo gambe ni sanana sawe nya sikhwathana, nesi nya sagadzyana, ligolo nya likhongolo nya womi wawe.

²⁶Ga litshigu lolo wule a vbulugago, a nata gu ninga gitiviso.

²⁷ “Ga litshigu lolo, likana lago li na tulega; u na ganela naye khu na nga khala gidudu. Khu guralo, uwe u na khala giwonelo nya gusamadzise gwawe, avo va na dziti gukhavo eni kheni PFHUMU Nungungulu.”