Read gitonga Ezekiyeli 25 Bible Online

Ezekiyeli 25 - gitonga bible

Ezekiyeli 25

¹PFHUMU Nungungulu a di nyi embela, khuye:

²“Mwamana wa muthu, thendregedza khovbe u khedza va na Amoni, u va profeta, khuwe:

³Yingisani magana ya Mune PFHUMU Nungungulu. Mune PFHUMU Nungungulu a ngu ganela kharati, khuye: Kha nga mu ganedego, khenu: Khavbo gwadi! Gikhati yi nyenyezisidwego Nyumba yangu nya miphaso, mayelano khu litigo la Israyeli, gikhati li nga khungumudwago, ni gikhati litigo la Judha li nga yiswa wugumbini,

⁴wona nya gukhuwe nyi na va ningela ga mufumo wa vathu va Khugadambo. Avo va nata gira mazumbo yawe ni gu ghwimba mitshatsha yawe vbakari gwanu; va na hodza mihandro yanu ni gu sela mahwe yanu.

⁵Nyi na gira Rabha gu khala libhiyo nya dzingameriya, va na Amoni va khala liphandro nya dzinvuta. Khavbo mu na dzitigo gukhenu Eni kheni PFHUMU Nungungulu.

⁶Kholu, Mune PFHUMU Nungungulu a ngu ganela kharati, khuye: Kha nga olu enu mu khwakhwathedego mandza ni gu kinga vbavbatshi khu migondro, monyo na wu tsaka khu guvivba gwatshavbo nya guwugele Israyeli,

⁷wonani nya gukhenu, nyi na khusa libogo langu nyi mi wugela ni gu mi ningela mu phangwa khu va nya mayigo. Nyi na mi mbembisa vbakari nya mayigo ni gu mi mbembisa vbakari nya vathu, nyi na mi vbedzani mwatshavbo, mu na dzitini gukhenu Eni, kheni PFHUMU Nungungulu.”

⁸Mune PFHUMU Nungungulu, a ngu ganela kharati, khuye: “Kha nga olu Mowabhi ni Seyiri va ganedego gukhavo: Wonani, litigo la Judha li khadego kha nga mambe mayigo yatshavbo.

⁹Khu guralo, nyi na tula phuvbo mwedo nya masotshwa ya Mowabhi, guphela khu madhoropa yaye ya mivbinganoni, Bheti-Jesimoti, Bhahali-Meyomi ni Kiriyatayimi, a gu wuzundzo wa tigoni momo.

¹⁰Nyi na ningela Mowabhi ni va na Amoni ga mufumo wa vathu va Khugadambo. Va na Amoni kha va na nga alakanywa gambe vbakari nya mayigo.

¹¹ Mowabhi nyi na mu resela tsayiso. Khavbo va na dzitigo gukhavo Eni kheni PFHUMU Nungungulu.”

¹²Mune PFHUMU Nungungulu, a ngu ganela kharati, khuye: “Kha nga olu Edhomi a nga phodzago ga litigo la Judha, khu kotani nya isoso, a dzi resede nandru nya wukhongolo khu gu dzi phodzela.

¹³Khu guralo, Mune PFHUMU Nungungulu, a ngu ganela kharati, khuye: Nyi na khusedza libogo langu nyi wugela Edhomi, nyi na songetela masotshwa yaye ni sirengo saye. Nyi na va sasela gukhugela Temani kala Dhedhani, avo va na songetedwa khu matshari.

¹⁴ Eni nyi na phodza ga Edhomi, khu mandza ya Israyeli, a gu vathu vangu, Israyeli a na lamula Edhomi gukhedza khidzo nyi gorogidego khidzo ni likhulo langu; va na Edhomi va na liti likhulo langu,” a ngu ganela Mune PFHUMU Nungungulu.

¹⁵Mune PFHUMU Nungungulu, a ngu ganela kharati, khuye: “Kha nga olu Vafilistiya va nga gira magirelo yaya nya guphodze nari ni wuvivbi monyoni gwaye, va khungumula Judha khu livengo nyamba vbela;

¹⁶khu guralo, Mune PFHUMU Nungungulu, a ngu ganela kharati, khuye: Nyi womo vbafuvbi ni gu khusedza libogo langu nyi wugela Vafilistiya. Nyi na mbembisa Vakereti ni gu mbembisa vale va nga tshalago siwoni.

¹⁷ Nyi na thuma gwawe gu phodza nya gukhongolo, gambe nyi na va tsayisa khu likhulo langu. Khu guralo, gikhati nyi na phodzago gwawe, khavbo va na dzitigo gukhavo Eni kheni PFHUMU Nungungulu.”