Read gitonga Ezekiyeli 26 Bible Online

Ezekiyeli 26 - gitonga bible

Ezekiyeli 26

¹Khu mwaga nya likhumi na moyo, khu litshigu nya guhegule nya ngima, PFHUMU Nungungulu a di ganela ni eni a nyi embela, khuye:

²“Mwamana wa muthu, Kha nga olu Tiro a ganedego khu Jerusalema, khuye: Khavbo gwadi! Nyangwa ya va nya mayigo, yi khungumudwe, nyi tuledwe; nyi khala gitetema kholu yi khungumudwego,

³Khu guralo, Mune PFHUMU Nungungulu, a ngu ganela kharati, khuye: Wonani nya gukhuwe Nyi na wugela uwe Tiro nyi dwana nago, nyi na rumela mayigo nya mangi gasi ma ta gu dwanisa; va nata kha nga linene gikhati li khusago mavimbi yaye.

⁴Ayo ma na khungumula mabhiyo ya Tiro, gambe va na theselela makhokhola yaye; eni nyi na vbiyela kudzudzwane waye, nyi gira khuwo giwindri nya gutiye.

⁵Vbakari nya linene, gu na khala wulanga nya guladzele dzikhoga nya gugoge; kholu, Eni nyi si tiviside. A ngu ganela Mune PFHUMU Nungungulu. Uye a na khala phango wa va nya mayigo.

⁶Sanana saye nya vanyamahegyane, si tshadego mahangeni, si na sasedwa khu matshari; va na dziti gukhavo Eni kheni PFHUMU Nungungulu.

⁷Khu guralo, Mune PFHUMU Nungungulu, a ngu ganela kharati, khuye: “Gwago uwe Tiro, nyi na rumela gukhugela phuvbo ga Wuronga, mufumeli wa Bhabhiloni, Nabhukodhonosori, mufumeli nya vafumeli, nari ni dzikavalu ni dzikareta, ni vakhileli nya dzikavalu, gumogo ni masotshwa nya mangi.”

⁸Uye a na sasela khu matshari sanana sago nya vanyamahegyane si guromo madhoropani ya tigoni; a na gu girela libhiyo; a na wungedzela mafu ma khala gigomo gasi gu gira likhokhola ni gu gu khusedzela sitshangu.

⁹Uye a na khungumula mabhiyo yago khu mitshini yaye nya nyimbi, a na thesela makhokhola yago khu mabhewula.

¹⁰A na gu fenengedza khu kudzudzwane khu gutala nya dzikavalu dzaye, mabhiyo yago ma na tsekatseka khu sikingo nya vakhileli nya dzikavalu, ni ligwaha nya dzikareta ni dzimovha, gikhati uye a na belago khu myanya yago mwendro khu dzinyangwa nya lidhoropa nya gukari li gu bani li podwe gihogo.

¹¹Sitsendro nya dzikavalu dzaye, si na gandredzela dzindzilani gwago gwatshavbo; uye a na songetela vathu vago khu matshari, ni madingo yago nya gutiye, ma na theseledwa vbavbatshi.

¹²Va na wandra dzithomba dzago, va phanga ni wugwewo wago, va na khungumula mabhiyo yago, va pfhungumulela ni dzinyumba dzago nya gumbure va dzi dzudzuga phwani, gumogo ni siwindri sago, mapulango ni ndzilo, vaya si rinya matini.

¹³ Nyi na fuvisa dzindzimo dzago nya litsako, ni gudzuma nya sitendre gima kha gu na pwala gambe.

¹⁴Nyi na gu gira u khala giwindri nya gutiye, u na khala wulanga wu khalegidego gasi gu ladza dzikhoga nya gugoge;” gima khu na vbahedzwa gambe, kholu Eni, Mune PFHUMU Nungungulu, nyi ganede; a ngu ganela Mune PFHUMU Nungungulu.

¹⁵Mune PFHUMU Nungungulu, a ngu ganela kharati ga Tiro, khuye: “Ina mayigo ya bambe nya yiphwa, kha ma na tsekatseka khu gudzuma nya gukhungumudwe gwago, gikhati gu na bayisedwago ni gu songetedwa nya guthise, gani?

¹⁶Khu guralo, vafumeli vatshavbo va bambe nya yiphwa, va na tshiga khu vbasikhalotunu gwawe nya wufumu, va na funungula sifenengelo sawe, va tshula dzingandzu dzawe nya mavalavala; va na taledwa khu hwanga, va khala vbavbatshi na va ndrendremela gikhati gyatshavbo; khu kotani yago, va na thuruga.

¹⁷Va na lila khu dzindzimo, va ganela, khavo: U mbembiside kharini, uwe litigo nya vathu nya vangi ni lidhoropa nya ndruma, uwe matini nya linene u nga bani nuri ni tshivba; uwe gumogo ni vavbanyi vago, u nga bani u thusedzela vatshavbo va nga bani vata gwago!

¹⁸ Olu, sidwa si na tsekatseka litshiguni nya gumbembe gwago; sidwa si guromo linene, si na tsekatseka khu gusasedwa gwago.

¹⁹Kholu Mune PFHUMU Nungungulu, a ngu ganela kharati, khuye: “Gikhati nyi na gu gira lidhoropa li khala marumbi nyamba khadwa khu muthu, gikhati nyi na gu girelago nondrwa, u langaladzwa khu mati nya mangi.

²⁰Khavbo avbo, nyi na gu gira u relela gumogo ni avo va relelago phalani nya vafi, gasi guya bangaladzana ni vagale, nyi na gu gira u ya vbanya guetani nya mafu, malangani nya siwula sa gale gumogo ni avo va relelago phalani nya vafi, gasi u si khadwi gambe khu muthu; nyi na tiyisa wuzundzo tigoni nya avo va vbanyago.

²¹ “Nyi na gu yisa mahegiso nya guthise, gima khu na nga manega gambe. Va na guvbweta, gima kha va na gu mana gambe, a ngu ganela Mune PFHUMU Nungungulu.”