Read gitonga Ezekiyeli 3 Bible Online

Ezekiyeli 3 - gitonga bible

Ezekiyeli 3

¹A di engedza a nyi embela, khuye: “Mwamana wa muthu, dzega libhuku leli u li hodza, khu hwane u ya ganela ni va na Israyeli.”

²Nyi di tula likana, uye a di nyi ninga libhuku nyi li hodza.

³A di engedza gambe, khuye: “Mwamana wa muthu, hodza libhuku leli nyi gu ningago, tadza girumbu gyago khilo.” Khavbo avbo, eni nyi di li hodza, li di lombela kanani gwangu nga wulombe.

⁴Khu hwane a di nyi embela, khuye: “Mwamana wa muthu, olu indra ga va na Israyeli, u ya va embela magana yangu.

⁵Kholu uwe khandri wa gu rumedwa ga vathu nyamba tidwa, mwendro lidimi nya gugaradze gu lipwa, aholu ga vathu va Israyeli;

⁶khandri ga vathu nya vangi va ganelago lidimi nyamba lipwa, iso va ganelago si gu garadzela gu si pima; kholu nari gupwani nyi di gu rumela gwawe, avo va di hadza guya gu yingisa.

⁷Aholu va na Israyeli kha va na nga gu yingisa, kholu avo kha va dzini gu nyi yingisa; kholu vathu vatshavbo va Israyeli, va bangide mihungo ni guvivbedwa khu myonyo.

⁸Khu guralo, nyi na gu gira muthu nya gutiye ni gubanga hungo nga avo.

⁹Nyi na bangisa khovbe yago kha nga giwindri, u tiya kha nga dhayimane. U nga khali hwanga khu avo, gambe u nga thurugi khu gu va wona, ambari olu a gu vathu nya guyeyise.”

¹⁰A engedza gambe, khuye: Mwamana wa muthu, yingisa gwadi u vegedza monyoni gwago magana yatshavbo nyi na gu embelago.

¹¹Olu, indra ga va na gyanu, va vbagedwego vaya wugumbitunu, u ya ganela navo kharati, khuwe: “Gani va na gu yingisa, gani kha va yingisi, va embele, khuwe: Mune, PFHUMU Nungungulu, a ngu ganela kharato!”

¹²Khu hwane, Liphuvbo li di nyi khusa, nyi dipwa lito nya gukhugege khu hwane gwangu na li gu, khilo: “Wu na rungudzwe wudhumo wa PFHUMU Nungungulu, gukhugela wulangani gwaye!”

¹³Nyi dipwa ligwaha nya mambapi nya sivangwa nya guvbanye na ma gu khuhana, hwane gwawe gu di pwala ligwaha nya likhongolo nya marodha!

¹⁴Khavbo avbo, Liphuvbo li di nyi dusa khu vbale, hefemulo wangu na wu tade khu guvbisega ni likhulo, aholu gyandza nya tshivba gya PFHUMU Nungungulu gi diri ni eni.

¹⁵Nyi di hongola ga vale va vbagedwego va nga bani va vbanyela Teli-Abhibhi, vbafuvbi ni tsongo wa Kebhari; nyi diya khala navo gipimo nya livbandre na mavili matshigu nyamba ganela gilo, khu gu vbisega khiso nyi nga sipwa ni gu si wona!

¹⁶Na gu vbindride livbandre na mavili matshigu, PFHUMU Nungungulu a di rumela magana avbo gwangu, khuye:

¹⁷“Mwamana wa muthu, eni nyi gu giride mukhedziseli ga vathu va Israyeli; khu guralo, yingisa magana nyi gu embelago, uya va kawuka khayo.”

¹⁸Nya gu embela muthu nya guvivbedwe khu monyo, kheni: “Khu lisine u nafa, uwe u si mu kawuki ambari gu mu gurumedza gu diga dzindzila dzaye nya guvivbe, gasi guvbulugisa womi waye; muthu wule a nafa khu wuvivbi waye, aholu uwe u na bani uri ni nandru khu gufa gwaye.”

¹⁹Aholu, uwe wa gu kawuka muthu nya guvivbedwe khu monyo, uye a si digi mithumo ni dzindzila dzaye nya guwegele, uye a nafa khu guvivba gwaye, aholu uwe u na vbulugisa hefemulo wago.

²⁰Khu magirelo ya mamowo, muthu nya gululame a digago gu gira gululama gwaye, a gira guvivba, eni nya gu vega mbeli gwaye giwindri nya gu mu tshunganise, uye a nafa; kholu khwa mu kawuka khu gighoho a ghohidego. Mithumo yaye nya gululame kha yi na alakanywa, khu guralo, eni nyi na hengula novba waye avbo gwago.

²¹ Aholu, wa gu kawuka muthu nya gululame a si giri guvivba, khu lisine uye a na vbanya kholu a nga dzumela gukawukwa, gasi uwe u na vbulugisa hefemulo wago.

²²Vbale gyandza gya PFHUMU Nungungulu gi diromo gwangu, a di nyi embela, khuye: “Khuga u hongola panini, nyi nata ganela nago iyoyo.”

²³Khavbo avbo, nyi di khuga nyi hongola panini. Iyoyo wu diromo wudhumo wa PFHUMU Nungungulu, gu fanana ni uwo nyi nga wu wona vbafuvbi ni tsongo wa Kebhari. Nyi di thega vbavbatshi khu khovbe,

²⁴aholu Liphuvbo li di bela gwangu, nyi di wuga nyi ema. Uye a di nyi embela, khuye: Indra gaya u ya dzi khothela nyumbani gwago.

²⁵Khu guralo, uwe mwamana wa muthu, u na hungwa khu dzingodzi; u khothedwa, khu na kodza gu duga, u hongola vbakari nya vathu.

²⁶Lidimi lago nyi na li dandramedzisa vbatshani nya likana lago, u na khala gidudu u si kodzi gu va kawuka, kholu a gu vathu nya guyeyise.

²⁷Aholu, gikhati nyi ganelago nago, nyi na tula likana lago u va embela, khuwe: PFHUMU Nungungulu a ngu ganela kharati, khuye: Nyi na ni magana nyi vbwetago gu mi embela. Uye a dzinago gu yingisa, a na yingise; uye a si dzinigo gu yingisa a na bombe, kholu avo vathu nya gukanyise.