Read gitonga Ezekiyeli 31 Bible Online

Ezekiyeli 31 - gitonga bible

Ezekiyeli 31

¹Khu litshigu nya guhegule, nya ngima nya wuraru, nya mwaga nya likhumi na moyo, PFHUMU Nungungulu a di nyi embela, khuye:

²Mwamana wa muthu, ganela u embela Faro, mufumeli wa Egipito gumogo ni gidzemo gyaye, khuwe: “Wugulu wago wa gu fanana ni mani?”

³Wonani gukheni Asiriya a diri sena wa Libhanoni, nya matamo nya gumbure, nya mahagane nya yadi ma ningago mutsa, ni tshina nya gulaphe, dzitshoka dzago dzi di vboha kala mapfhini.

⁴Wu bugiswa khu mati, mitsongo nya guete yi ngu wu dandrisa, yi lapha guya vbatshani; sitsongwana saye si di gu goga khavbo wu nga bani wu yadwe avbo, sitsongwana si di gu theledzela misimbo yatshavbo ya thembweni.

⁵Khu guralo, uwo wu di dandra guvbindra misimbo yatshavbo ya khabini, wu thela matamo nya gutale, ni matamo yaye, ma di lapha ni gudandra ngudzu khu kotani nya gumane mati nya mangi.

⁶Sinyoni satshavbo sa damboni si di vbaha sihaga sawe matamoni gwaye, sirengo satshavbo sa khabini si di gu velegela vbavbatshi nya matamo yaye, ni mayigo yatshavbo nya makhongolo ma di vbahide mutsani gwaye.

⁷Wu diri ni wumburi nya gukhugege, matamo yaye, ma di nava ngudzu, kholu mikhamba yaye yi di gu relela kala matini nya gutale.

⁸ Misena ya thembweni ga Nungungulu khandri a diri valala gwaye; mipinyu, yi di si fanani ni matamo yaye, ni mindziri, yi di si fanani ni mathungedwa yaye; wu diri mwalo ni simbo moyo thembweni ga Nungungulu wu nga bani wu fanana naye khu gumbura.

⁹Kheni nyi wu giridego wu mbura ni gu manega ni matamo nya mangi; misimbo yatshavbo ya Edheni, yi nga bani yi romo thembweni ga Nungungulu, yi di wu girela lidiwo.

¹⁰Khu guralo, PFHUMU Nungungulu a ngu ganela kharati, khuye: Kha nga olu uwo wu nga lapha ngudzu, dzitshokha nya matamo yaye dzi kuha mapfhi, wu tala khu matshandza khu kotani nya wukhongolo waye,

¹¹khu lisine, eni nyi na wu ningela mandzani ga mufumeli nya litigo nya tshivba ngudzu, gasi wu tshaniswe gukhedza khu guvivba wu giridego.

¹²Va nya mayigo, vathu nya dzihanyi ngudzu, va di wu pila va wu dzudzuga vbavbatshi; matamo yaye ma di thega sigomoni ni mikovani gwatshavbo; ni mathungedwa yaye, ma di vbadzuledwa ma thegela mitsongoni yatshavbo ya tigoni; mayigo yatshavbo ma di duga mutsani gwaye ma wu diga wonga.

¹³Sinyoni satshavbo sa damboni si na vbaha sihaga sawe marumbini gwaye, ni sirengo sa khabini si na khala vbavbatshi nya matamo yaye.

¹⁴Khu guralo, mwalo ni simbo moyo wu guromo vbafuvbi ni mati wu na dzi khusedzago khu kotani nya gulaphe gwaye, ambari gu khusedza dzitshoka dzaye vbakari nya matamo ya mapfhini. Mwalo wumbe simbo nya gutheledzedwe gwadi a na vbohago ga giyemo gyogyo; kholu yatshavbo yi vegisedwe guya gufani, yi na relela phalani nya vafi, gumogo ni vathu vafago, avo va relelago thowoni.

¹⁵Mune PFHUMU Nungungulu, a ngu ganela kharati, khuye: Litshigu simbo wu reledego phalani nya vafi, nyi rumide gu gira gililo khu kotani gwaye, nyi wu fenengedzide khu mati ma guromo vbavbatshi nya mafu, nyi futela mitsongo yaye, ni mati yaye nya mangi ma di tsagatela; khu kotani yaye, nyi fenengedzide litigo la Libhanoni khu gidema, ni misimbo yatshavbo ya khabini yi difa yi banga khu kotani gwaye.

¹⁶Nyi giride mayigo ma ndrendremela khu gudzuma nya gupfhungumudwe gwaye, gikhati nyi mu giridego a relela thowoni gumogo ni avo va relelago phalani nya vafi. Khavbo avbo, misimbo yatshavbo ya Edheni, iyo yi mburidego ngudzu ya Libhanoni, ni misimbo yatshavbo yi selago mati, yi diya tangala guetani nya mafu.

¹⁷Vatshavbo va nga bani va vbanyela mutsani gwaye, ni avo a nga bani na gupwanana navo vbakari nya mayigo, a diya dzingwa gumogo navo a patana ni avo va nga songwago khu matshari.

¹⁸Uwe gasi gu fanana ni mani khu wuzundzo ni wugulu vbakari nya misimbo ya Edheni, na? Khu guralo, u na relela gumogo ni misimbo ya Edheni guetani nya mafu; vbakari nya avo nyamba hana wugwera, u na mbemba gumogo ni vale va songetedwego khu matshari. Wonani oyu khu Faro gumogo ni gidzemo gyaye gyatshavbo, a ngu ganela PFHUMU Nungungulu.