Read gitonga Ezekiyeli 32 Bible Online

Ezekiyeli 32 - gitonga bible

Ezekiyeli 32

¹Khu litshigu nya guhegule, nya ngima nya likhumi na mivili, nya mwaga nya likhumi na mivili, PFHUMU Nungungulu a di nyi embela, khuye:

²“Mwamana wa muthu, emba ndzimo nya gililo nya gulile Faro, mufumeli wa Egipito, u mu embela esi, khuwe: U di gu fanana ni ginghalana vbakari nya mayigo, narigu uwe wa gu fanana ni ngona ya mitsongoni, u hambelago mitsongoni gwago, u ghunvungago mati khu migondro yago; u nyenyezisa mitsongo.

³Mune PFHUMU Nungungulu a ngu ganela kharati, khuye: Nyi na gu resela gidzemo nya mayigo nya mangi, nyi thesa ligoga langu, avo va na gu ndrindrela vbavbandze.

⁴Nyi na gu dzudzuga vbavbandze; nyi gu rinya khabini, sinyoni satshavbo sa damboni si nata mbaka vbatshani gwago, ni sirengo sa tigoni gwatshavbo si nata khura khu nyama yago.

⁵Girumbi gyago nya guhine nyi na gi vega vbatshani nya sigomo, nyi tadza mikova khu marambo yago.

⁶Nyi na fafazela mafu khu novba wago, dzindzilani gwatshavbo, kala musigomoni, musitsongwanani gu na tala khu nyama yago.

⁷ Avbo nyi na gu mbembisago, nyi na fenengedza damboni khu gidema, nyi tshima dzinyeledzi dzaye; nyi tshira lidambo khu mapfhi, ni ngima kha wu na wenengedza gambe.

⁸Nyi na tshima dzinyeledzi dzatshavbo dzi wenengedzago Ndzadzini, gambe nyi na resa gidema tigoni gwago, a ngu ganela Mune PFHUMU Nungungulu.

⁹Nyi na khuvegisa myonyo ya vathu nya mahundzu nya mangi va pilega hwambo, avbo nyi na gu vbagelago nyi gu yisa mayigoni, nya gu uwe gima khwa nga mati.

¹⁰Nyi na gira gukheni vathu nya mayigo nya mangi va samale khu gu gu wona, ni vafumeli vawe va na ndrendremela khu gu wona esi si na gu gu dugelelago, gikhati li na vbindrago litshari langu khu mbeli gwawe; litshigu nya gukhungumudwe gwago vatshavbo va na thuruga va ndrendremela khu hwanga, muthu ni muthu a tsetsa womi waye.

¹¹Khu guralo, Mune PFHUMU Nungungulu, a ngu ganela kharati, khuye: U nata sasedwa khu mufumeli wa Bhabhiloni.

¹²Nyi na thesa gidzemo nya vathu vago va thegela mandzani nya dzindrena nya mayigo nya gutale nya dzihanyi; avo va na vbedza matshandza ya Egipito, ni gidzemo gyaye gyatshavbo gi na mbembiswa.

¹³Nyi na fuvisa sifuyo sago satshavbo si gimbila gimbilago bambe nya mati nya gutale; ayo ma na gumba wunvudzwa gambe khu ngondro nya muthu, ambari guwunvudzwa khu sitsendro nya sirengo.

¹⁴Khu guralo, nyi na diga mati yago ma tenga; nyi na gira mitsongo yaye yi khulunga kha nga mafura, a ngu ganela Mune PFHUMU Nungungulu.

¹⁵Avbo nyi na pfhungumulago litigo la Egipito ni gu sigula mafuni satshavbo si guromo umo, ni avbo nyi na fuvisago vavbanyi vaye, khavbo avbo va na dzitigo gukhavo Eni kheni PFHUMU Nungungulu.

¹⁶Eyi khu ndzimo nya gililo yi na gu embeledwago khu vanyamayi nya mayigo; gasi gu lidwa litigo la Egipito ni gidzemo nya vathu vaye vatshavbo.” A ngu ganela Mune PFHUMU Nungungulu.

¹⁷Khu litshigu nya likhumi na livbandre nya ngima nya guhegule nya mwaga nya likhumi na mivili, PFHUMU Nungungulu a di nyi embela, khuye:

¹⁸“Mwamana wa muthu, emba ndzimo u lila khu gidzemo gya Egipito u va reledza phalani nya vafi avo gumogo ni vathu nya dzitshivba nya mambe mafumbo, gasi va relela guetani nya mafu, gumogo ni vale va relelago phalani nya vafi.

¹⁹Khu mani u mu palago khu wumburi? Relela phalani u ya dzingwa gumogo ni va nya gumba hana wugwera.

²⁰Avo va na thegela vbakari nya vale va songetedwego khu matshari. Matshari ma dongisedwe; mu mbembiseni gumogo gidzemo nya vathu vaye.

²¹Avo nya tshivba ngudzu vbakari nya dzindrena, gumogo ni vale va mu phasedzelago, va na mu wombela huwa khu khisikheyi, khavo: Avo va relede, vaya dzingwa gumogo ni va nya gumba hana wugwera, va songetedwego khu matshari.

²²Asiriya womo vbale gumogo ni vathu vaye vatshavbo; na randredwe khu marowo nya vafi vaye vatshavbo, avo va songetedwego khu matshari.

²³Marowo yaye momo guetani nya liphala, ni masotshwa yaye ma nga songwago ma mbambamede wubambe nya lithowo. Vatshavbo vale va nga bani va thusedzela vathu tigoni nya vathu va vbanyago, va di songetedwa khu matshari.

²⁴Elamo womo nuye vbale gumogo ni vathu vaye, na va randrede lithowo laye; vatshavbo va di songwa khu matshari. Vatshavbo va nga bani va thusedzela vathu tigoni, va relede phalani va sa hana wugwera. Va rwala dzitshoni dzawe gumogo ni vale va relelago thowoni nya vafi.

²⁵Va mu dongisede lidawu vbakari nya vafi, a randredwa khu marowo nya vathu vaye. Vatshavbo kha va hana wugwera, va songetedwe khu matshari, kholu na va nga gu vbanya va di gu thusedzela vathu khu dzihanyi; khu guralo va ngu rwala dzitshoni gumogo ni vale va relelago phalani; va lala gumogo ni avo va songidwego.

²⁶Meseki ni Tubhali vomo navo vbale, gumogo ni gidzemo gyawe gyatshavbo; na va randredwe khu marowo yawe. Vatshavbo kha va hana wugwera, va songidwe khu kotani va nga thela hwanga tigoni khu dzihanyi.

²⁷Kha va dzingwa gumogo ni dzimbe dzindrena dza gale, dza vbakari ga avo nyamba hana wugwera dzi ngafa, dzi dzingwa ni matshari yawe nya nyimbi, ma nga vegwago mihungoni gwawe. Guvivba gwawe gomo vbatshani nya marambo yawe, ambari wughevenga wu giridwego khu dzindrena dzodzo wu nga phalalegago tigoni gwatshavbo.

²⁸Uwe nuwe, Egipito, u na mbembiswa u dzingwa vbakari ga va nyamba hana wugwera, u na mbemba gumogo ni avo va na songwago khu matshari.

²⁹Edhomi nuye womo vbale, vafumeli vaye ni vathangeli vaye vatshavbo, avo, ambari va nga bani vari ni tshivba, va di vegwa gumogo ni avo va nga songetedwa khu matshari; avo va lade gumogo ni va nyamba hana wugwera, vale va relelago phalani nya vafi.

³⁰Vathangeli vatshavbo va Wuronga ni vavbanyi va Sidhoni, vomo navo vbale, va reledego gumogo ni vale va songidwego, na va tade khu dzitshoni nya dzihanyi va dzi giridego khu tshivba va nga bani vari nayo; va ngu lala gumogo ni va nyamba hana wugwera, ni vale va songidwego khu matshari, va di rwala dzitshoni dzawe gumogo ni vale va relelago phalani nya vafi.

³¹Faro a na si wona gambe a na dzi tangadzisa khu guvbela ga vathu vaye vatshavbo; uye mune Faro gumogo ni masotshwa yaye, va na mbemba vbakari nya vale va songidwego khu matshari, a ngu ganela Mune PFHUMU Nungungulu.

³² “Kholu eni neni, nyi thede hwanga tigoni ga vathu va vbanyago; kholu Faro ni vathu vaye, a na lala vbakari ga va nyamba hana wugwera, ni avo va songidwego khu matshari, a ngu ganela Mune PFHUMU Nungungulu.”