Read gitonga Ezekiyeli 4 Bible Online

Ezekiyeli 4 - gitonga bible

Ezekiyeli 4

¹Olu, uwe mwamana wa muthu, dzega gitini, u gi vega mbeli gwago, u lova avbo gifananiso nya lidhoropa la Jerusalema.

²U gira giyeyedzo nya gukhuwe lidhoropa leli li randredwe khu valala; u wungedzela mafu nya gulite khavbo vbalikhokholatunu nya lidhoropa u vega mazumbo, u emisa gambe madingo nya gukhungumule khayo, ma dzundruluga lidhoropa.

³Dzega litindzalo nya dzisimbi, u li vega kha nga libhiyo nya dzisimbi, vbakari gwago ni lidhoropa, u li khedza; kharato li na bani li randredwe, gambe u na li randrela; isoso si na khala giyeyedzo ga va na Israyeli.

⁴Khu hwane nya ugo, u fanede gu lala khu limbambo lago la nyambade, u dzi rwega sighoho sa va na Israyeli; u na rwala guvivba gwawe gukhedza khu tengo nya matshigu u na vbedzago nu gu lade vbatshani gwaye.

⁵Kholu, nyi vegide gukheni tengo nya matshigu ma na fanane ni tengo nya myaga nya guvivbe gwawe, si tshamusago gu khiso, gipimo nya mazana mararu ni livbandre na mana magumi (390) matshigu, u na rwala sighoho sa va na Israyeli.

⁶Na gi vbede gikhati gegi, u na vbindrugedza u lala khu limbambo lago la nyamudye, u rwala nandru nya sighoho sa va na Judha, gipimo nya magumana (40) matshigu, nyi gu ningide litshigu limwedo kha nga mwaga.

⁷U na khusa maho u khedza lidhoropa la Jerusalema li randredwego khu valala, u na khusedza libogo, u profeta khu ilo.

⁸Nyi na gu hunga khu dzingodzi gasi u si kodzi guthendregedza u khedza limbe liphuvbo na gu si gu eneli matshigu nya tshanisa yaye.

⁹U na dzega wuguvbi nya tirigu, ni mavbila, ni dzikosane ni mala, u si pata gyomboni gimwegyo, u si suga u gira khiso sibaba u na hodzago. U yede gu si hodza gipimo nya mazana mararu ni livbandre na mana magumi (390) matshigu u na lalago khu limbambo.

¹⁰Guhodza gwago u na hodzago khu litshigu, u na pima magumavili dzisikulu; u na hodza khu gikhati ni gikhati.

¹¹U na sela gambe mati pimo nya dzikhokho dzimbili khu gikhati ni gikhati.

¹²Iso u na hodzago si na fanane kha nga khwatshi wa gu hodza dzifiyoso nya mavbila; si vawule litindzaloni khu magimba nya gubange nya vathu nu gu wonwa khu vathu.

¹³PFHUMU Nungungulu a di engedza a ganela, khuye: “Va na Israyeli va na hodza kharati gibaba gi nyenyezidego vbakari nya mayigo nyi na gu va phalalegiselago umo.”

¹⁴Khavbo avbo, eni nyi di, kheni: Oh! Mune, PFHUMU Nungungulu! Eni gima kha nya dzi nyenyezisa. Gukhugela wudzahani gwangu kala olu, gima nyi si gu hodzi gilo nya gukari gi nga manwa na gi fude mwendro gu vbadzuledwa khu sirengo sa khabini. Gima kanani gwangu gu si gu beli nyama nya gukari nya gunyenyeze.

¹⁵Uye a di ganela, khuye: “Lisine, nyi na gu diga u vawula gibaba gyago khu magimba nya dzimombe, nasiri khu ayo nya vathu.”

¹⁶A di engedza a ganela, khuye: “Mwamana wa muthu, nyi na pila guhodza dhoropani ga Jerusalema. Vathu va na hodza gibaba khu gu pimedwa na va gu ndrendremela, va sela mati nya gupimedwe na va gu thuruga;

¹⁷kholu, gu na hamugega guhodza ni mati. Va na khedzana khu gyawe na va tade khu hwanga khu kotani nya sighoho sawe.”