Read gitonga Ezekiyeli 40 Bible Online

Ezekiyeli 40 - gitonga bible

Ezekiyeli 40

¹Khu guphelani nya mwaga nya magumavili na livbandre nya guvbagedwe gwathu, khu litshigu nya likhumi nya ngima, na gu vbindride likhumi na mina myaga na gu khungumudwe lidhoropa, khu litshigu lolo kamwe, PFHUMU Nungungulu a di nyi phara khu libogo a nyi yisa iyoyo.

² Khu siwoniso, Nungungulu a di nyi yisa tigoni ga Israyeli, aya nyi vega gigomoni nya gulaphe ngudzu; avbo khu Marandzi gakone, gu diromo dzinyumba nya sitezi dzi nga bani dzi fanana ni lidhoropa.

³ Uye a di nyi dzega a nyi yisa iyoyo, nyi wona mwama moyo nya giyemo nya gufanane ni sugu; a di emide vbamwanyatunu na pharide mandzani ngodzi nya seda ni tshava nya gupime khiyo.

⁴Mwama a di nyi embela, khuye: “Mwamana wa muthu, khedza khu maho yago, u yingisa khu dzindzeve dzago; vega monyoni satshavbo nyi na gu yeyedzago, kholu khiso u resedwego iso avba; Indra tivisa ga va na Israyeli, satshavbo u na si wonago.

⁵Nyi di wona libhiyo khu phuvbo ga vbavbandze li nga bani li bhiyide nyumba yatshavbo ya Nungungulu, mwama na pharide mandzani tshava nya gulaphe nya gupime khiyo, na yiri ni livbandre na moyo mikono, kono ni koyo nya guhandzegwe nyala dzina. A di pima libhiya, gu manega livbandre na moyo mikono guanama ni livbandre na moyo mikono gukhugega guya vbatshani.

⁶Khavbo avbo, a dita ga mwanya wu nga bani wu khedzide phuvbo ga Khugadambo, a di lita khu sigandro saye; a pima mihasimo nya lidimba: Yi diri ni pimo nya ndronga mweyo guanama.

⁷Hubhe ni hubhe wu diri ni ndronga mweyo gulapha, ni ndronga mweyo guanama; ndzari ni ndzari yi diri ni mikono mivili ni gipandre gugula; hasimo nya lidimba wu guromo vbafuvbi ni mwanya wu khedzanago ni Nyumba ya Nungungulu, wu diri ni mikono miraru ni gipandre.

⁸A di pima gambe likupakupa la mbeli, li diri ni ndronga mweyo.

⁹Khavbo avbo, a di pima lidimba li khedzanago ni mwanya nya Nyumba ya Nungungulu, li nga bani liri ni livbandre na miraru mikono gugula; madingo yaye, ma diri ni mikono mivili; mwanya wu di khedzide mbeli nya Nyumba ya Nungungulu.

¹⁰Mwanya wa phuvbo ga Khugadambo, wu diri ni mihubhe miraru, khu eno ni eno, yatshavbo ya miraru, yi diri ni mipimo nya gufanane; madingo nayo ya hwane ni mbeli ma diri ni pimo nya gufanane.

¹¹Khu gulandrela a di pima guanama nya mwanya nya gubele khuwo, wu diri ni likhumi mikono; gulapha guya vbavbatshi, wu diri ni likhumi na miraru mikono.

¹²Mbeli nya hubhe ni hubhe, gu diri ni kono moyo, wulanga wa limbe liphuvbo a diri kono moyo; hubhe ni hubhe wu diri ni livbandre na moyo mikono maphuvbo yatshavbo ya mana.

¹³Khavbo avbo, a di pima lidimba gukhugela dzitshokhatunu nya ndzari nya hubhe kala wumbe hubhe: Wu diri ni magumavili na livbandre mikono guanama gukhugela lidimba kala limbe lidimba.

¹⁴A di pima pfhukha nya likupakupa, wu diri ni livbandre na limwedo magumi mikono, likupakupa li di ladzide kala vbalidingotunu khu dzibambe nya lidimba.

¹⁵Gukhugela mbeli nya lidimba la vbanyangwatunu kala mbeli nya lidimba la makupakupani, gu diri ni livbandre magumi mikono.

¹⁶Makupakupa ni dzindzarini, gu diri ni sihogwana nya gusege nya gugirwe khu simbi vbatshani nya madingo yawe, idzosaye gambe ni malimba; sihogwana si di dzundrulugide khu phuvbo ga ndrani, madingoni gu di mburisedwe khu migindru.

¹⁷A di nyi dzega a nyi yisa ga likupakupa la vbavbandze; vbale nyi di wona mihubhe nya gukari na gu londridwe maphuvbo yatshavbo nya likupakupa; mbeli nya avbo gu londridwego gwatshavbo gu diri ni magumararu mihubhe.

¹⁸Wulanga wowo watshavbo wu di londridwe wu dzundrulugela likupakupa. Likupakupa la vbavbandze li diri vbadugwana vbavbatshi guvbindra likupakupa la ndrani.

¹⁹Khu guralo, a di pima guanama gukhugela mbeli nya mwanya nya wudugwane kala mbeli nya likupakupa la ndrani, khu vbavbandze; gu diri ni lizana mikono khu phuvbo ga Khugadambo ni ga Wuronga.

²⁰Gasi khu mwanya wu nga khedza phuvbo ga Wuronga, nya likupakupa la vbavbandze, uye a di pima gulapha gwaye ni guanama gwaye.

²¹Nyangwa yi diri ni makupakupa mararu khu phuvbo mwedo ni mararu ga limbe liphuvbo, gumogo ni madingo yaye, lidimba laye, li diri ni mipimo nya gufanane ni gulapha nya nyangwa nya guhegule; li diri ni livbandre magumi mikono gulapha gwaye, ni guanama, li diri ni magumavili na livbandre mikono.

²²Sihogwana saye ni malimba yaye, gumogo ni migindru yaye si diri ni pimo nya mwanya wu nga bani wu khedzide Khugadambo, gu diri ni livbandre na sivili sigandro, nya gulite khiro guya lidimbatunu. Likupakupa lakone li diromo khu mbeli.

²³Mwanya yoyo nya likupakupa la ndrani, wu di khedzanide ni lidimba nya mwanya wa Wuronga, kha nga gambe mwanya wa Khugadambo; a di pima gukhugela mwanya ga wumbe mwanya, lizana mikono.

²⁴Khavbo avbo, uye a di nyi dzega a nyi yisa phuvbo ga Marandzi, eni nyi di wona mwanya wu nga bani wu khedza phuvbo ga Marandzi; uye a di pima madingo yaye gumogo ni malimba yaye, ma nga bani mari ni mipimo nya gufanane ni mambe malimba.

²⁵Gu diri gambe ni sihogwana na si randrede malimba, si diri ni mipimo nya gufanane ni simbe sihogwana; livbandre magumi mikono gulapha, guanama magumavili na livbandre mikono.

²⁶Gasi gu gwela u vboha iyoyo, gu diri ni livbandre na sivili sigandro, ni malimba yaye ma diromo mbeli nya limbe likupakupa; gambe madingo ya ndrani nya hubhe gu vbindrwago khumo, na di mburisedwe eno ni eno khu migindro.

²⁷Gu diromo gambe likupakupa la ndrani, ilo nilo li diri ni mwanya wu nga bani wu khedzide Marandzi; uye a di pima gukhugela vbamwanya kala ga wumbe mwanya khu phuvbo ga Marandzi, lizana mikono.

²⁸Khavbo avbo, a di nyi dzega a nyi yisa ga likupakupa la ndrani khu mwanya wa phuvbo ga Marandzi; uye a di pima mwanya wa Marandzi, wu nga bani wuri ni mipimo nya gufanane ni mimbe.

²⁹Makhuvi yaye ni madingo yaye, gumogo ni malimba yaye, ma di gu fanana ni mipimo yeyi; ma diri nayo ni sihogwana khu maphuvbo yatshavbo nya malimba; gulapha nya lidimba li diri livbandre magumi mikono, ni guanama, li diri magumavili na livbandre mikono.

³⁰Gu diri ni malimba khu maphuvbo yatshavbo; gulapha ma diri ni magumavili na livbandre mikono, ni guanama gwaye, a diri livbandre mikono.

³¹Malimba yaye ma di khedzide phuvbo ga likupakupa la vbavbandze, gu diromo migindru umo nya madingo yaye; gu gwela guya mwanyatunu, gu diri ni pimo nya livbandre na siraru sigandro.

³²Khu hwane, uye a di nyi dzega a nyi yisa ga likupakupa la ndrani, khu phuvbo ga Khugadambo, uye a di pima mwanya, wu nga bani wuri ni mipimo nya gufanane ni mimbe.

³³Makhuvi yaye, madingo yaye, gumogo ni malimba yaye, ma diri ni mipimo nya gufanane ni mambe; gu diri gambe ni sihogwana khu maphuvbo yatshavbo nya malimba yaye; gulapha nya lidimba a diri livbandre magumi mikono, ni guanama, a diri magumavili na livbandre mikono.

³⁴Malimba yaye, ma di gu khedzide phuvbo ga likupakupa la vbavbandze; avbo nya madingo yaye, gu di sasamedzwa gambe migindru, khu phuvbo ga eno ni eno; gugwela kala mwanyatunu gu diri livbandre na siraru sigandro.

³⁵Khavbo avbo, uye a di nyi dzega a nyi yisa ga mwanya wa Wuronga, a wu pima; wu diri ni mipimo nya gufanane ni mimbe,

³⁶kha nga gambe nya mihubhe yaye, dzindzari dzaye, ni malimba yaye, gumogo ni sihogwana saye khu maphuvbo yatshavbo; gulapha nya lidimba a diri livbandre magumi mikono, ni guanama a diri magumavili na livbandre mikono.

³⁷Madingo yaye ma di khedzide phuvbo ga likupakupa la vbavbandze; gu diromo gambe migindru madingoni gwaye, khu phuvbo ga eno ni eno; gu gwela kala mwanyatunu a diri livbandre na siraru sigandro.

³⁸Likhuvi ni mwanya waye si diromo vbafuvbi ni lidimba nya mwanya nya mihubhe ya ndrani, avbo miphaso nya guvbiswe yi nga bani yi gu handzwa avbo.

³⁹Vbalidimbatunu nya mwanya gu diromo dzimeza dzimbili khu eno ni eno, avbo gu nga bani gu songedwa avbo sirengo nya miphaso nya guvbiswe, miningelo ni mihengo nya lombe guhandzwa sighoho.

⁴⁰Vbafuvbi ni lidimba la vbavbandze nya gugwele guya vbamwanyatunu nya lidimba la Wuronga, dzi diromo dzimeza dzimbili; khu limbe liphuvbo la vbamwanyatunu nya lidimba, gu diromo dzimeza dzimbili.

⁴¹Gu diri ni dzimeza dzina khu phuvbo ga eno, ni dzimeza dzina khu limbe liphuvbo; avbo gu nga bani gu songwa sirengo nya miphaso nya guvbiswe. Dzatshavbo a diri livbandre na dzitharu dzimeza.

⁴²Gu diri ni dzimeza dzina nya gugirwe khu siwindri nya guvatwe, gasi gu girela avbo miphaso nya guvbiswe; mweyo ni mweyo gulapha, yi diri ni kono moyo ni gipandre, guanama a diri kono moyo ni gipandre, gulapha guya vbatshani, a diri kono moyo; vbatshani gakone gu di gu vegwa sombo va nga bani va si thumisa gu paya khiso sirengo nya miphaso nya guvbiswe ni dzimbe dzimhamba.

⁴³Hubhe wa ndrani wu di dzundrulugedwe khu ngongola nya nyala dzina gugula wu di ladzidwe khu nyumbani khu maphuvbo yatshavbo, khu vbatshani nya dzimeza gu diromo nyama nya ditshedzo.

⁴⁴Vbavbandze nya mwanya wa ndrani ma diromo makhuvi mavili ya vaembeleli, ga likupakupa la nyumbani; limwedo, khu phuvbo ga mwanya wa Wuronga, wu nga bani wu khedziside phuvbo ga Marandzi; wumbe, khu phuvbo ga mwanya wa Marandzi wu nga bani wu kedzide phuvbo ga Wuronga.

⁴⁵Uye a di nyi embela, khuye: “Likhuvi li guromo khu phuvbo ga Marandzi la gu lumba vaphasi nya mhamba va thumelago Nyumbani ga Nungungulu.”

⁴⁶Aholu likhuvi li guromo khu phuvbo ga Wuronga la gu lumba vaphasi nya mhamba va thumelago vbagiluvelotunu; a gu avo sanana sa Sadhoki, vbakari nya sanana sa Levhi, va yelago gu hidzimela vbafuvbi ga PFHUMU Nungungulu gasi gu mu thumela.

⁴⁷Uye a di pima likupakupa: Li diri ni lizana mikono gulapha, ni lizana mikono guanama; maphuvbo yatshavbo ma di gu fanana; giluvelo gi diromo mbeli nya Nyumba ya Nungungulu.

⁴⁸Khu gulandrela uye a di nyi dzega a nyi yisa mwanyatunu nya Nyumba ya Nungungulu, a di pima lidingo ni lidingo nya mwanya li diri ni livbandre mikono khu phuvbo ga eno ni eno; guanama nya mwanya, gu diri ni pimo nya mikono miraru khu phuvbo ga eno ni eno.

⁴⁹Gulapha nya likupakupa gu diri magumavili mikono; guanama, gu diri likhumi na moyo mikono; gu di gu gwedwa khu sigandro kala mwanyatunu. Gu diri ni madingo; limwedo khu phuvbo ga eno ni eno.