Read gitonga Ezekiyeli 42 Bible Online

Ezekiyeli 42 - gitonga bible

Ezekiyeli 42

¹Khu hwane nya esi, a di nyi dusa vbavbandze, a nyi yisa likupakupani la vbavbandze, khu phuvbo nya ndzila ya Wuronga; a nyi dzega a nyi yisa ga makhuvi ya limbe liphuvbo nya gukhedzane ni Nyumba ya Nungungulu, khu phuvbo ga Wuronga.

²Nyumba nya gitezi yi nga bani yiri khu phuvbo ga Wuronga, lidimba laye li diri ni lizana mikono gulapha, ni myanya yi nga khedza phuvbo ga Wuronga; guanama gu diri livbandre magumi mikono.

³Khu mbeli nya magumavili mikono, yi nga bani yi lumba likupakupa la ndrani, mbeli nya nyumba nya gitezi yi nga bani yi lumba likupakupa la vbavbandze, gu diromo hubhe mbeli ga simbe sitezi nya siraru.

⁴Mbeli nya makhuvi gu diromo ndzila nya likhumi mikono guanama, khu nyumbani, gu diri ni ndzila nya kono moyo; ni myanya yaye yi di khedzide phuvbo ga Wuronga.

⁵Makhuvi ya vbatshani ma di hongide ngudzu; kholu mihubhe yi di gu dzega ngudzu wulanga guvbindra ya vbavbatshi ni ya vbakari nya nyumba nya gitezi.

⁶Kholu ayo ma diri ya sitezi siraru, gambe ma diri mwalo madingo kha nga madingo nya likupakupa; khu kotani nya isoso, ayo ya vbatshani ma diri ya guhonga guvbindra ayo ya vbavbatshi ni ayo ya vbakari.

⁷Li diromo libhiyo khu vbavbandze, li nga bani li lulama ni makhuvi nya likupakupa la vbavbandze, li diri ni livbandre magumi (50) mikono gulapha.

⁸Khu guralo, gulapha nya makhuvi, ma nga bani ma romo likupakupani la vbavbandze, ma diri ni livbandre magumi (50) mikono; ilo li nga bani li romo mbeli nya Nyumba ya Nungungulu, li diri ni lizana (100) mikono gulapha.

⁹Khu phuvbo ga vbavbatshi nya makhuvi yaya, gu diromo mwanya khu phuvbo ga Khugadambo, avbo gu nga bani gu bedwa khu likupakupa la vbavbandze.

¹⁰Khu vbakari nya libhiyo nya likupakupa li khedzidego Khugadambo, mbeli nya nyumba nya gitezi nya wulanga nya muhubhe, gu diromo gambe makhuvi.

¹¹Gasi ndzila ya mbeli gwawe, yi diri kha nga makhuvi na ma khedzide ndzila ya phuvbo ga Wuronga. Yi diri ni pimo nya gufanane gulapha ni guanama, ni myanya nya guduge nya gufanane ni myanya ya phuvbo ga Wuronga.

¹²Yi diri idzosaye ni myanya nya makhuvi ma nga bani ma khedza phuvbo ga Marandzi, gu diromo mwanya guphelani nya hubhe wa vbakari wu nga bani wu ladza guya Khugadambo, ni mwanya nya gubele makhuvini.

¹³Khavbo avbo, mwama a di nyi embela, khuye: “Makhuvi ya Wuronga ni ayo ya Marandzi, ma guromo mbeli nya mihubhe nya Nyumba ya Nungungulu, makhuvi nya guage, umo vaphasi nya mhamba va thumelago PFHUMU Nungungulu nyumbani nya miphaso, va na hodzago ni gu vega umo sombo nya guage ngudzu, a gu miningelo nya dzimbewu niyo nya ditshedzo nya sighoho ni gutsetselela milandru; kholu wulanga wu agidego.

¹⁴Gikhati vaphasi nya mhamba va belago, kha va na duga khu wulangani nya guage va hongola likupakupani la vbavbandze, aholu va na vega mule guambala va thumidego khugo, kholu ugo gu agide; va ambala gumbe guambala, khavbo va na dzi kodzago gu hidzimela ga wulanga wu lumbago vathu.”

¹⁵Uye na vbedzide gu pima Nyumba ya Nungungulu khu ndrani, a di nyi dusa khu mwanya wu khedzidego phuvbo ga Khugadambo; a di pima maphuvbo yatshavbo.

¹⁶A di pima phuvbo ga Khugadambo khu ndronga nya gupime, khiyo: Maphuvbo yatshavbo gu di manega livbandre mazana (500) dzindronga nya gupime khidzo.

¹⁷A di pima phuvbo ga Wuronga: Maphuvbo yatshavbo gu di manega livbandre mazana (500) dzindronga nya gupime khidzo.

¹⁸A di pima gambe phuvbo ga Marandzi: Gu di manega livbandre mazana (500) dzindronga.

¹⁹Khu hwane, uye a di hongola phuvbo ga Muhwadambo, aya pima: Gu manega livbandre mazana (500) dzindronga.

²⁰ A di pima maphuvbo yatshavbo ya mana, maphuvbo yatshavbo gu diromo libhiyo nya livbandre mazana (500) dzindronga gulapha, livbandre mazana (500) guanama, gasi gu hambanisa Wulanga nya Guage ni uwo nya gunyenyeze.