Read gitonga Ezekiyeli 5 Bible Online

Ezekiyeli 5 - gitonga bible

Ezekiyeli 5

¹“Olu, uwe mwamana wa muthu, dzega ngala nya gulodzwe, u wu thumisa kha nga lwembe gya mugayi, gasi gu vbalula ndzudzu hungoni ni giledzu. Khu hwane, dzega ndzudzu wakone u wu pima vbagikalotunu u wu kabanisa.

²Gikhati ma vbelago matshigu nya gurandredwe lidhoropa, u na vbisa niloni gipandre nya wuraru nya ndzudzu ndrani nya lidhoropa. Dzega gimbe gipandre nya wuraru u gi pilela khu litshari maphuvbo yatshavbo ya dhoropani. U mwaladzela gimbe gipandre nya wuraru gi vbuvbiswa khu phuvbo; kholu eni nyi na va lundra khu hwane khu litshari.

³U na rola gambe dzikhindra nya gukari nya ndzudzu u dzi petela u dzi siha dzitshokhani nya dzingandzu dzago.

⁴U na dusa dzidugwana nya idzo u dzi rinya vbakari nya nilo, gasi dzivbye. Khu vbale wu na duga nilo wu na endrelegago ni litigo latshavbo la Israyeli.”

⁵Mune PFHUMU Nungungulu, a ngu ganela kharati, khuye: “Eli khu lidhoropa la Jerusalema; nyi li vegidego vbakari nya vathu ni mayigo nya vaakelane vaye.

⁶Khu guralo, khu kotani nya guvivbe gwaye wugede milayo yangu, gumogo ni sileletelo sangu, a gira guvivba guvbindra ni mayigo nya vaakelane vaye. Kholu uye yeyiside milayo yangu, a si landrisi sileletelo sangu.”

⁷Khu guralo, Mune PFHUMU Nungungulu a ngu ganela kharati, khuye: “Kha nga olu mu yeyisidego milayo yangu guvbindra mayigo nya vaakelane vanu, mu engedzela gu gira guvivba, mu si landrisi sileletelo sangu, ambari gu landrisa milayo yangu, mu gimbila khu milayo nya mayigo ma mu randredego;”

⁸khu guralo, Mune, PFHUMU Nungungulu a ngu ganela kharati, khuye: Wonani nya gukhenu eni, mune kamwe, nyi na gu lamula uwe Jerusalema; nyi gu ninga tsayiso nu gu wonwa khu va nya mayigo.

⁹Nyi na gu gira esi nya gu gima nyi si si giri, gambe kha nyi na si gira, khu kotani nya guvivbe gwago gwatshavbo.

¹⁰ Khu guralo, vbakari gwago, vavelegi va na hodza sanana sawe, ni sanana niso, si na hodza vavelegi vawe; nyi na gu tsayisa, nyi phalalegisa mitshaledwa yago khu maphuvbo yatshavbo.

¹¹Khu guralo, Mune, PFHUMU Nungungulu, a ngu ganela kharati, khuye: Nyi ngu sambanya khu guvbanya gwangu, khu kotani nya olu u nyenyezisidego Nyumba yangu nya miphaso khu sifananiso sago satshavbo nya gunyenyeze ni mithumo nya guvivbe, eni nyi na dusa gwago gikategiso gyangu. Kha nyi na gu khedza khu maho nya wuhindzi, gambe kha nyi na gu pwela gisiro.

¹²Gipandre nya wuraru nya vathu vago gi nafa khu mitungu mwendro ndzala vbakari gwago; gipandre nya wuraru va na songwa khu matshari vbavbandze nya lidhoropa, ni gipandre nya wuraru nyi na va phalalegisa khu maphuvbo yatshavbo ni gu va lundra na nyiri ni litshari mandzani.

¹³Khu guralo, li na vbela likhulo langu, ni khorodza yangu yi na bosa, nyi tangala; khavbo va na dzitigo gukhavo Eni, kheni PFHUMU Nungungulu, nyi ganedego khu guvbisega gwangu, avbo gu na tadzisegago likhulo langu.

¹⁴Nyi na gu gira marumbi ni gu gu gira givalo vbakari nya mayigo nya vaakelane vago, ni mahoni ga vatshavbo va na vbindrago khavbo gwago.

¹⁵Uwe u na khala gilo nya gihegiso ni givalo, u vbindrugedza u khala giyeyedzo nya gisamadziso ga vathu nya vaakelane vago, gikhati nyi na gu tsayisago khu likhulo, khorodza ni sitsayiso nya gulemele. Eni, PFHUMU Nungungulu nyi ganede kharato.

¹⁶Gikhati nyi na gu khwandrelago sighalala sangu nya guthise nya ndzala, iso nyi na gu si rumelago gasi guta mi mbembisa, nyi na engedzela ndzala yi dandra bwelo khavbo gu si manegi guhodza.

¹⁷ Nyi na mi rumelani ndzala ni sirengo nya likhabi si na guta songetelago sanana sanu. Tungu ni gu vbalaga nya novba, si na vbindra khavbo gwanu, gambe nyi na mu resela dzinyimbi mu ta sasedwa khu matshari. Eni, PFHUMU Nungungulu nyi ganede kharato.