Read gitonga Ezekiyeli 7 Bible Online

Ezekiyeli 7 - gitonga bible

Ezekiyeli 7

¹PFHUMU Nungungulu a di nyi embela, khuye:

²“Uwe mwamana wa muthu, indra u ya ganela kharati ga va na Israyeli, khuwe: Mune PFHUMU Nungungulu wari khuye gikhati gyanu nya mahegiso gi ngu vboha; ma ngu vboha mahegiso nya dzikhona dza dzina nya litigo la Israyeli.

³Gikhati gyago nya mahegiso gi ngu vboha, nyi na gu rumela likhulo langu. Nyi na gu tsayisa gukhedza khu guvivba gwago ni mithumo yatshavbo nya gunyenyeze u giridego.

⁴Kha nyi na gu khedza khu maho nya gisiro, gambe kha nyi na gu tsetselela; aholu nyi na gu tsayisa gukhedza khu makhalelo ni esi u giridego avbo u vbanyago gwago; khavbo avbo, u na nyiti gukhuwe eni kheni PFHUMU Nungungulu.”

⁵Mune PFHUMU Nungungulu a di ganela kharati, khuye: “Wona nya gukhuwe libango li nguta nya likhongolo.

⁶Gu vbohide mahegiso! Mahegiso guvbohide, ma gu wugede; wona gukhuwe gu nguta.

⁷Gu vbohide avbo gwanu enu vavbanyi va tigoni. Gi vbohide gikhati ni litshigu nya pfilupfilu, gutsaka guvbede musigomoni.

⁸Nyi mwalo hwindzo gu vbaladze likhulo langu vbatshani gwago, nyi na vbedzisa khorodza yangu avbo gwago; nyi na gu lamula gukhedza khu mavbanyelo yago, nyi gu bweledzela mithumo yago yatshavbo nya guvivbe.

⁹Kha nyi na gu khedza khu maho nya gisiro, gambe kha nyi na gu tsetsa; nyi na gu bweledzela gukhedza khu mithumo yatshavbo nya guvivbe yi guromo vbakari gwago; u na dziti nya gukhuwe kheni, PFHUMU Nungungulu nyi gu tsayisago.

¹⁰“Wonani litshigu li vbohide! Gu vbohide gumbemba gwago; olu lipitso li rumbugide, matshandza ma thede senge!

¹¹Dzihanyi dzi vbindrugedzide dzi khala lipitso nya gutsayise khilo silo nya guvivbe; mwalo ni moyo nya vathu a na digwago, ambari ni moyo nya gidzemo gile, ambari thomba yaye, mwalo muthu a na gu yi khathalelago.

¹²Gu vbohide gikhati, litshigu li vbohide. Murengi a nga nengeli, ambari murengisi a nga khuveki; kholu likhulo lomo vbatshani ga gidzemo gyatshavbo.

¹³Mwalo ni moyo murengisi a na vbanyago nya dzadi gasi gu kodza gu dzegisa litigo a li rengisidego, ambari gu vbanya gikhati nya gingi, kholu giwoniso mayelano khu gidzemo gyatshavbo, kha gi na bwelela hwane. Khu kotani nya guvivbe gwawe, mwalo a na tiyisago womi waye khu wuvivbi waye.

¹⁴Ambari mwa gu womba pundru, mu dzi dongisela gwadi, mwalo ni moyo a na hongolago nyimbitunu, kholu likhulo langu lomo vbatshani ga gidzemo gyatshavbo.”

¹⁵Vbavbandze yomo nyimbi, ndrani womo tungu ni ndzala; vale va guromo vbavbandze nya lidhoropa, va nafa khu matshari, vale va na gu bani varomo dhoropani, va nafa khu tungu ni ndzala.

¹⁶Vatshavbo va na vbulugago gufa va na tutumela sigomoni na va gu lila kha nga sipomba si guromo kovani, moyo ni moyo a lila khu kota nya sighoho saye.

¹⁷Mawogo yawe ma na khala wugara, ni dzikhungumudzi dzawe, dzi na ruta mati.

¹⁸Avo va na dzi fenengedza khu myendra nya silendra, na va tade khu gundrendremela. Va na fenengedzwa khovbeni khu dzitshoni, va vidwa likhwalo hungoni.

¹⁹Va na swaya parata yawe dzindzilani, ni ndralama yawe yi na girwa kha nga gilo nya gunyenyeze. Parata ni ndralama yawe, kha si na nga kodza gu va vbulugisa litshigu nya likhulo la PFHUMU Nungungulu, gambe, kha si na nga kodza gu vbedza ndzala yawe ni gu tadza sisusu sawe; si na va gira basi gu va tshunganiswa va bela muguvivbani.

²⁰Avo va diri ni matshandza khu silo sesi nya gumbure, va gu dzi girela khiso sifananiso nya gunyenyeze. Khu guralo, silo soso, nyi na si gira si khala silo nya gunyenyeze avbo gwawe.

²¹Satshavbo soso nyi na si ningela kha nga silo nya guphangwe mandzani ga va nya mayigo ni mandzani ga vathu nya guvivbedwe khu myonyo va tigoni, avo va na si nyenyezisa.

²²Nyi na thendregedza khovbe yangu nyi va pfhurarela, avo va ga nyenyezisa wulanga wangu wu sihadego; kholu va na bela avbovbo vaphangi va gu nyenyezisa.

²³Dongiselani makhetshe, kholu litigo li tade khu novba wu vbaladzidwego, ni lidhoropa li tade khu dzihanyi.

²⁴Nyi na rumela va nya mayigo nya dzihanyi ngudzu, gasi va ta wandra dzindranga dzawe; nyi na vbedza matshandza nya sitetema ni malangani yawe nya miphaso ma na nyenyeziswa.

²⁵Litshigu nya sigaradzo, avo va na vbweta gurula, aholu kha va na gu mana.

²⁶Yi nata tshanisa vbatshani nya tshanisa, guta hwanga vbatshani nya hwanga, va vbweta giwoniso khu ga muprofeti ni gihevbudzo nya Nayo khu ga muphasi nya mhamba, va na gi hamuga, ni madhota ma na hamuga wusingalagadzi.

²⁷Mufumeli a na ambala gilendra, vathangeli va na vbela tshivba, ni vathu vatshavbo va na ndrendremela va khala hwanga. Nyi na va tsayisa vatshavbo khu esi va giridego, ni gu va lamula gukhedza khu esi va giredego vakwawe. Khu guralo, va na nyiti gukhavo kheni PFHUMU Nungungulu.