Read gitonga Dhaniyeli 10 Bible Online

Dhaniyeli 10 - gitonga bible

Dhaniyeli 10

¹Khu mwaga nya wuraru nya gufume ga Kiro, mufumeli wa Perisiya, Dhaniyeli, a ranwago gambe gupwani khu Bhalitazari, a di ningwa giwoniso. Mahungu nya giwoniso gegi, ma diri ya lisine, ma di ganela khu libango nya nyimbi nya yikhongolo ngudzu. A di mati gwadi magana yakone ni gu mana tshamuselo nya giwoniso.

²Khu gikhati gyogyo, eni Dhaniyeli, nyi di vbedza semana tharu na nyi swihade.

³Nyi di si hodzi guhodza nya gutshambe, nyama, ambari gu sela vhinya, ambari gu tola mafura nya gunungele, kala guvbindra semana tharu.

⁴Khu litshigu nya magumavili na mana nya ngima nya guhegule, eni nyi di khade bambe nya tsongo nya wukhongolo wa Tigire.

⁵ Nyi di khusa maho nyi khedza vbatshani, nyi di wona mwama nari vbafuvbi gwangu nya guambale dzingandzu nya seda, mugiwununi gwaye na hungide libhandri nya ndralama nya guhutwe ya Ufazi.

⁶Mili waye wu di fanana ni giwindri nya wumburi, khovbe yaye yi di khedziga nga libara, maho yaye nga myenge nya gudzure, mawogo ni mawundru yaye, ma diri ni muvala nya sugu, lito laye, li di dziya nga lito nya gidzemo.

⁷Kheni nyonga, eni Dhaniyeli, nyi nga wona giwoniso gegi; avo nyi nga bani nyiri navo, kha va wona gilo, aholu, va di thedwa hwanga nya wukhongolo ngudzu, va thava va tutuma vaya sihala.

⁸Nyi tshala nyiri nyenga, na nyi gu wona giwoniso gile nya gikhongolo; nyi di vbela tshivba, khovbe yangu yi vbindrugedza yi wu na.

⁹Khavbo avbo, nyi dipwa lito nya magana yaye, avbo nyi nga pwago magana yaye, nyi di thega khu khovbe mafuni, nyi titivala.

¹⁰Khu hwane, nyi dipwa gyandza gya muthuyo na gi gu nyi kuha nyi phela gu khuga khu dzikhungumudzi ni mawogo na nyi gu ndrendremela.

¹¹Uye a di khuye: “Dhaniyeli, muthu nya gugodwe ngudzu khu Nungungulu, yingisa gwadi iso nyi vbwetago gu gu embela; khuga u eme, kholu eni nyi rumedwe avbo gwago.” Avbo a nga nyi embela isoso, nyi di khuga nyi ema na nyi gu ndrendremela.

¹²A di engedza, khuye: “Dhaniyeli, u nga khali hwanga. Gukhugela litshigu nya guhegule u nga dzi sodzisa mbeli ga Nungungulu wago khu gu vbweta guti makungo yaye, malito yago ma yingisidwe, eni nya guta gu ninga phindrulo yaye.

¹³ Aholu ndruna nya mufumo wa Perisiya, yi dita dwana ni eni gipimo nya magumavili na limwedo matshigu; aholu Migeli, moyo nya dzingilozi nya guhegule, a dita nyi phasa, eni nyi di simama vbale ni vafumeli va Perisiya.

¹⁴Olu nyi dzude guta gu tivisa iso si na gu giregago ga vathu vago khu matshigu nya guhegise, kholu giwoniso gya gu ganela khu silo si ngarigo hwindzo ni gu girega.”

¹⁵Avbo a nga bani a nyi embela magana yaya, nyi di noga khovbe mafuni, nyi si kodzi ni gu ganela.

¹⁶Khavbo avbo, givangwa gimwegyo nya gufanane ni sanana nya vathu, gi di nyi kuha gihofu, khavbo avbo, nyi di tula likana nyi ganela, nyi embela wule a nga bani na emide mbeli gwangu, kheni: “Pfhumu yangu, nyi ngu saniseka ngudzu khu mahungu nya giwoniso nyi gi wonidego, nyi rerekide nyi vbela tshivba.”

¹⁷Ina nyi nga dzi kodza kharini gu ganela nago uwe mune wangu? Kholu, gukhugela olu nyi garade, nyi vbede tshivba.

¹⁸Givangwa nya gu gufanane ni muthu, gi di engedza gu nyi kuha gi nyi ninga tshivba.

¹⁹Gi nyi embela, khigyo: “U nga khali hwanga, uwe u gigodwa ngudzu. Gurula gu na khale ni uwe! Tiya! U nga thavi!” Avbo nyi nga embedwago magana yaya, nyi di dzipwa na nyi tiyide, nyi ganela, kheni: “Ganela mune wangu, kholu u nyi ningide tshivba.”

²⁰Khavbo avbo, uye a di nyi embela, khuye: U ngu dziti gukhuwe ginani gi nga nyi tisago avbo gwago, gani? Nya guta gu tivisa gukheni nyi ngu yela gu bwelela nyi ya dwana ni girumwa gya Perisiya, me ni gu nyi khuga, gi na vboha girumwa gya Gerekiya;

²¹ aholu, nyi na phela khu gu gu embela esi si lovidwego Libhukuni nya Lisine. Mwalo a na gu nyi phasedzelago gu dwana litunga lolo, vbavbandze basi ga Migeli, muemeli wanu.