Read gitonga Dhaniyeli 5 Bible Online

Dhaniyeli 5 - gitonga bible

Dhaniyeli 5

¹Mufumeli Bhalitazari, a di gira buzo nya khongolo ngudzu a girela likhumi mazana (1.000) dzindruna dzaye, a sela navo wadwa.

²Avbo Bhalitazari a nga bani na gu sela wadwa, a di rumela gukhuye guya dzegwa dzikhokho nya ndralama nidzo nya parata iso babe waye Nabhukodhonosori a nga dzi dusago khu Nyumbani ga Nungungulu, yi nga bani na yiri Jerusalema, gasi ata sela khidzo wadwa mufumeli, dzindruna, vagadzi ni sibhayi saye.

³Khavbo avbo, va di mu resela sombo nya ndralama si nga duswago khu Nyumbani gwa Nungungulu, yi manegago Jerusalema, vata sela khiso mufumeli ni dzindruna dzaye, vagadzi ni sibhayi saye.

⁴Avbo va nga levago khu wadwa, va di phela gu rungudza vanungungulu vawe nya ndralama, nya parata, nya sugu, nya dzisimbi, nya misimbo ni siwindri.

⁵Khu gikhati gyogyo, gu di dugelela dzinyala nya libogo nya muthu, dzi lova avbo nya ndzari yi khedzanago ni nyumba ya mufumeli, vbafuvbi ni dzikandriya; mufumeli a di wona gyandza gi nga bani na gi gu lova.

⁶Khavbo avbo, mufumeli a di vbindrugedza khovbe a thuruga khu hwanga, a hambanega mapimo, dzinyonga dzaye dzi tsekatseka, ni mazolo yaye ma ghumana.

⁷Mufumeli a di vbisega a rumela gu raniswa dzinyanga, ni vagengeli, ni Vakalidhiya, ni va nya sikwembu; ata embela vagengeli vava va Bhabhiloni, khuye: “Uye a na gu hevbulago milowo yeyi bwelo khavbo a nyi ninga tshamuselo yaye, nyi na mu ambagisa dzingandzu nya siwunguwungu, bwelo khavbo nyi mu ambagisa karara nya ndralama thamoni gwaye, nyi na mu emisa a khala vbagikalotunu nya wuraru nya mufumo wangu.”

⁸Khavbo avbo, gu dita vagengeli vatshavbo va mufumeli; aholu avo kha va nga ta kodza gu hevbula milowo yi nga bani yi lovidwe, ambari gu ninga tshamuselo wawaye ga mufumeli.

⁹Khavbo avbo, mufumeli a di vbisega ngudzu a thuviga khovbe yaye; dzindruna dzaye dzi di pilega hwambo.

¹⁰Avbo pfhumugadzi yi ngapwago ligwaha la mufumeli ni dzindruna dzaye, yi di bela nyumbani nya buzo yita, khiyo: Uwe mufumeli, vbanya kala gupindruga! U nga thurugi ambari gu thuviga khovbe.

¹¹Womo mwama moyo vbakari nya mufumo wago a gu ni liphuvbo la vanungungulu va agidego; matshiguni ya babe wago, gu di manwa avbo gwaye wenengedzo, gupimisa ni wugengeli, nya gufanane ni wugengeli wa vanungungulu. Babe wago, mufumeli Nabhukodhonosori, a mu emiside gu khala muthangeli nya dzinyanga, nya va nya sikwembu, nya Vakalidhiya, ni va nya gulola dzisolo.

¹²Gu manegide ga mwama yoyu Dhaniyeli, mufumeli a nga mu thangisago lina la Bhalitazari, a diri ni liphuvbo nya gusamadzise, nya guti ni mapimo, a ninga tshamuselo nya dzindroro ni gu ninga phindrulo dzitekatekane, ni gu dusa gukanakana ga mahungu nya gulemele, avbo mufumeli a nga mu thangisago lina la Bhalitazari. Rumela gu ya ranwa Dhaniyeli, uye a nata gu ninga tshamuselo nya milowo.

¹³Khavbo avbo, Dhaniyeli a di reswa mbeli ga mufumeli. Mufumeli a di wudzisa Dhaniyeli, khuye: “Ina khuwe Dhaniyeli, moyo nya vale nya dzikhumbi dza Judha, mu nga reswago khu mufumeli, babe wangu khu tigoni ga Judha, gani?

¹⁴Va ngu nyi embela gupwani liphuvbo la vanungungulu lomo vbakari gwago, gumogo ni wenengedzo ni mapimo, ni guti nya gusamadzise.

¹⁵Va ngari gu resa mbeli gwangu, vagengeli ni va nya sikwembu, gasi guta hevbula milowo ni gu nyi ninga tshamuselo waye, aholu ni moyo wawe kha dzi kodza gu nyi ninga tshamuselo nya magana yaya.

¹⁶Va nyi embede gukhavo uwe u nga dzi kodza gu nyi ninga tshamuselo ni gu dusa gukanakana. Gasi olu, wa gu kodza gu hevbula milowo yeyi, ni gu nyi ninga tshamuselo yaye, nyi na gu ambagisa dzingandzu nya siwunguwungu, thamoni gwago nyi gu ambagisa karara nya ndralama, ni gu khala gikhalo nya wuraru nya mufumo wangu.”

¹⁷Khavbo avbo, Dhaniyeli a di mu phindrula, khuye: Siningwa sago khala naso, ni tshatshazelo yago ningela ga vambe. Aholu nyi na hevbulela mufumeli milowo nyi bwelo khavbo nyi mu pwadzela tshamuselo yaye.

¹⁸Uwe mufumeli, Nungungulu a Khusegidego ngudzu, a di ninga babe wago Nabhukodhonosori, mufumo, wugulu, wudhumo nya gusamadzise.

¹⁹Khu kotani nya wugulu a nga ningwago khu Nungungulu, vathu vatshavbo, mayigo ni mafumbu nya guhambanelane va di ndrendremela mbeli gwaye; a diri ni tshivba nya gusonge uye a mu golago, ni gu diga uye a mu golago. A di khusedza uye a mu golago ni gu vbwasamisa uye a mu golago.

²⁰Aholu avbo a nga phela gu dzi dandrisa, a di bangisa hungo waye wu tala khu matshandza, a di duswa vbagikhalotunu gwaye nya wufumu, a dzegedwa wudhumo waye.

²¹A di duswa vbakari nya vathu, a ningwa monyo nya gufanane ni girengo, aya vbanya gumogo ni dziburu nya likhabi, a hodza mwasi nga dzimombe, a naganiswa givili gyaye khu hunguva ya damboni, kala a dziti nya gukhuye Nungungulu a Khusegidego ngudzu a na ni tshivba nya gufumele mifumo nya vathu ni gu emisa vbatshani gwawe uye a mu golago.

²²Gasi uwe Bhalitazari, mwanaye u nga khalago wulangani gwaye, ambari ulo u nga si wonago satshavbo soso, kha wa dzi sodzisa monyoni gwago.

²³U di bwelo khavbo u wugela Pfhumu ya ndzadzini. U di rumela guya dzega sombo sa nyumbani gwaye sita avbo gwago, ni ga dzindruna, vagadzi vago ni sibhayi sago mu ta sela khiso wadwa; gudiga nya isoso, u di bwelo khavbo u rungudza vanungungulu nya parata, nya ndralama, nya sugu, nya dzisimbi, nya misimbo ni siwindri, va si wonigo, nya mbapwa, ni gumbati. Aholu Nungungulu uye a pharidego womi wago, ni dzindzila dzago dzatshavbo, khu theli kota khuye gu mu dhumisa.

²⁴Khu guralo, khuye a residego mandza ma ta lova milowo yeyi.

²⁵Iso si nga lowago khu mandza khesi: MENE, MENE, TEKELI NI PARISIMI.

²⁶Tshamuselo waye khowu: MENE:[3] Gupwani Nungungulu sayide matshigu nya mufumo wago, olu ma vbede.

²⁷TEKELI: [4] Gu thudwa gupwani: U pimidwe vbagikalotunu, u manega na wu vbevbugide.

²⁸PERESI: [5] Gu tshamusela gupwani: Mufumo wago, wu na kabaniswa khu vbakari wu ningedwa Vamedhi [6] ni Vaperesi.[7]

²⁹Khavbo avbo, mufumeli Bhalitazari, a di ruma gukhuye va ambagise Dhaniyeli dzingandzu nya giwunguwungu, thamoni va mu ambagisa karara nya ndralama, va mu emisa khu gu ruma gwaye, gu khala vbagikhalotunu nya wuraru nya mufumo waye.

³⁰Khu wutshigu wowo kamwe, a di songwa Bhalitazari, mufumeli wa Vakalidhiya.

³¹Wulangani nya mufumo waye, Dhariyo nya lifumbu nya Vamedhi, a dita khala uye mufumeli nya litigo nari ni tanga nya livbandre na limwedo magumi ni myaga mivili.