Read gitonga Dhaniyeli 7 Bible Online

Dhaniyeli 7 - gitonga bible

Dhaniyeli 7

¹Khu mwaga nya guhegule nya gufume ga Bhalitazari, mufumeli wa Bhabhiloni, Dhaniyeli a di lora nari ligovbeni, a wona giwoniso. Uye a di dzegela gu lova ndroro yoyo, bwelo khavbo a sasamedzela dzindrima dzakone.

²Dhaniyeli a di ganela, khuye: Na nyi lade ligovbeni, nyi di lora nyi wona dziphuvbo dzina dza ndzadzini na dzi gu dwana ni linene.[8]

³ Sirengo sesi nya sikhongolo nya sina, nya guhambanelane, si di duga khu linene.

⁴ Igyo nya guhegule, gi di fanana ni nghala na giri ni mambapi nya lighama. Nyi di gi khedza kala mambapi yaye ma duswa, gi khuswa gi emiswa mafuni nga muthu, gi ningwa monyo nya muthu.

⁵Nyi di simama gu khedza, nyi wona girengo nya wuvili nya gufanane ni Gikankanka, na gi emide khu phuvbo mwedo, kanani gwaye na gi hodzide dzimbambo dzitharu khu magwaha, gi di embedwa pwani: “Khuga u eme u hodza nyama nya gutale.”

⁶Khu hwane nya isoso, nyi di simama gu khedza nyi wona gimbe girengo nya gufanane ni likhamba, na giri ni mambapi mana nya ginyoni magatani gwaye. Girengo gegi gi diri ni mihungo mina, na gi ningidwe tshivba nya gufume.

⁷ Khu guhegisa, nyi di simama gu khedza nyi wona siwoniso nya wutshigu, nyi di wona girengo nya wu na, na giri ni tshivba nya guthise, na giri ni magwaha mana nya makhongolo nya gikete; igyo gya gu vbadzulela gu tshala khu sipandre, isoso si tshalago gi gandredzela khu migondro. Igyo gi di hambanide ni simbe sirengo si nga wonegago khu hwane gwaye na giri ni likhumi dzikheho.

⁸ Avbo nyi nga bani nyi nga gu khevisela dzikheho dzakone, nyi di wona gimbe gikhehwana na gi gu buga khu vbakari nya edzi dzimbe; gasi gu ninga wulanga gikhehwana gegi, edzi nya dzitharu nya guhegule dzi di kunudwa, kheho yeyi, yi diri ni maho nya nga ya muthu, ni likana li nga bani li ganela magana nya gu dzi khusedze.

⁹ Na nyi nga gu khevisela, gu di vegwa sikhalo nya wufumu, a dita khala avbo moyo nya lidhota. Dzingandzu dzaye dzi di agide nga thondrwane; ni ndzudzu wa hungoni gwaye, wu di fanana ni mawoya nya wumburi nya nvuta, gikhalo gyaye nya wufumu, gi di fanana ni malavbelavbe nya nilo, marodha yaye, ma di fanana ni gudzura nya nilo.

¹⁰ Wu di duga tsongo nya nilo khu mbeli gwaye, a thumedwa khu mazanazana nya vathu; mbeli gwaye gu diri ni makhulukhulu nya vathu. Phathani gu di phedwa gu lamudwa mahungu, gu tudwa mabhuku.

¹¹Nyi di simama gu khevisela khu gupwa magana ma nga bani ma gambwa khu kheho. Nyi di simama nyi khevisela kala girengo gi songwa, nyama yaye yi rinywa niloni yivbya.

¹²Gasi esi simbe sirengo, si di dzegedwa tshivba nya gufume, aholu si ningwa guvbanya matshigwana nya gukari.

¹³ Umo nya siwoniso sangu nya wutshigu, nyi di wona na guta khu mapfhini ya ndzadzini, moyo nya gufanane ni mwamana wa muthu. Ata ga wule a nga bani ari lidhota khu gale, va mu hidzimisa vbafuvbi gwaye.

¹⁴ Va di mu ninga gufuma, wudhumo ni mufumo, gasi mayigo ni vathu nya malimi yatshavbo va mu thumela. Wufumu waye khwa gu kala gupindruga, wu mwalo mahegiso, mufumo waye gima mwalo a na gu wu dzegago.

¹⁵Eni Dhaniyeli, hefemulo wangu wu di vbela tshivba, kholu siwoniso sesi si di nyi thurugisa.

¹⁶Nyi hidzimela ga wule a nga bani nari vbafuvbi, nyi mu wudzisa tshamuselo nya satshavbo sesi nyi nga si wonago. Uye a di nyi embela ni gu nyi ninga tshamuselo nya silo sesi, khuye:

¹⁷Sirengo sesi nya sina, khu vafumeli vana va na dugago omu mafuni.

¹⁸ Aholu, sihathwa sa wule a Khusegidego ngudzu, khavo va na gu ningwago mufumo wu khala wawe kala gupindruga ni gupindruga.

¹⁹Khavbo avbo, nyi vbwetide guti tshamuselo nya girengo nya wu na nya guthise, nya guhambane ni esi simbe, gi gu ni magwaha nya gikete ni samba nya sugu, gi songago gi bwelo khavbo gi vbadzulela gu tshala khu sipandre, iso si tshalago, gi gandredzela khu migondro;

²⁰gumogo gambe ni guti khu likhumi dzikheho dzi nga bani dziri hungoni gwaye ni kheho yi nga gwelago gu thega dzile nya dzitharu, khiyo yile yi nga bani yiri ni maho, ni likana nya guganele matshandza, nya guthise guvbindra edzi dzikwawe.

²¹Nyi di wona kheho yeyi, na yi gu dwana ni sihathwa yi si pala.

²² Kala guta Lidhota la gale, li ta lamulela sihathwa sa wule a Khusegidego ngudzu; kala gi vboha gikhati nya guningwe mufumo sihathwa.

²³Khu guralo, a di nyi ninga tshamuselo yoyu, khuye: Girengo nya wu na, khu mufumo nya wu na wa mafuni, wu na gu hambanago ni mifumo yatshavbo. Wu na sasela mayigo yatshavbo, wu ma gandredzela khu migondro wu ma phwatisela.

²⁴ Likhumi dzikheho, gu ganedwa gupwani khu mufumo wule wa moyo, gu na duga Likhumi vafumeli, khu hwane gwawe, gu na duga wumbe mufumo wu na gu hambanago neyi nya guhegule, uwo wu na thesa vafumeli vararu.

²⁵ Mufumo wowu, wu nata ganela malito nya guwugele oyu a Khusegidego ngudzu, wu tshanisa sihathwa saye, wu na zama gu vbindrugedza milayo ni matshigu; sihathwa saye si na ningedwa mandzani gwaye khu gikhati nya guningane myaga miraru ni gipandre.

²⁶Aholu gu nata gulamudwa, va na dzegedwa mufumo wu tshiphisa muphelo.

²⁷ Khu guralo, mufumo, tshivba ni wugulu nya mifumo yatshavbo ya mafuni, yi na ningedwa ga lihundzu nya sihathwa sa oyu a Khusegidego ngudzu. Mufumo waye khwa kala gupindruga, vafumeli vatshavbo va na mu khozela ni gu mu yingisa.

²⁸Gi di vbela avba giwoniso gyangu. Eni Dhaniyeli, nyi di vbisega ngudzu mapimoni gwangu gu vbindrugedza ni khovbe yangu, aholu silo sesi, si di khala monyoni gwangu, nyamba embela muthu.