Read gitonga Dhaniyeli 8 Bible Online

Dhaniyeli 8 - gitonga bible

Dhaniyeli 8

¹Khu mwaga nya wuraru nya gufume ga mufumeli Bhalitazari, eni Dhaniyeli, nyi di woniswa giwoniso nya wuvili hwane nya gile nya guhegule.[9]

²Umo nya giwoniso gyangu, nyi di dzi wona na nyiri dhoropani ga Suza, gipandrengulu gya Elamo, ga giwoniso gegi, nyi diri vbafuvbi ni tsongo wa Ulayi.

³Nyi di khusa maho nyi khedza vbatshani, nyi wona hamba na yiri vbafuvbi ni tsongo; na yiri ni dzikheho dzimbili nya gulaphe, aholu mweyo yi di vbindra yikwawe khu gulapha, ambari ulo yi nga hegisela gu buga.

⁴Nyi di wona hamba yeyi na yi gu phandraphandra vbavbatshi yi pfuledza Muhwadambo, ni Wuronga ni Marandzi. Gi mwalo girengo gi nga bani gi hidzimela vbafuvbi gwaye, ambari ni moyo a nga bani a dzi kodza gu vbuluga tshivbani gwaye. Iyo yi di gira iso yi si golago, yi dzi dandrisa ngudzu.

⁵Na nyi nga gu wona gisamadziso gegi, nyi di wona nyamabhongwe na guta khu Pfoladambo, a tsemakanya litigo latshavbo nyamba gandra mafu; nyamabhongwe yoyu, a diri ni kheho nya yikhongolo mahoni gwaye.

⁶A di tutuma ata ga hamba yi nga bani yiri ni dzikheho dzimbili, eyi nyi nga yi wonago vbafuvbi ni tsongo; wu tela hamba khu gu tutuma khu tshivba yaye yatshavbo.

⁷Nyi di wu wona na wu guta khu gigaha wu ta ghumula hamba khu tshivba wu yi bayisa, dzi fanyega dzikheho dzaye dza dzimbili. Hamba kha ya nga mana gambe tshivba nya gudwane naye; nyamabhongwe wu di yi thesa vbavbatshi, wu yi gandredzela khu migondro, mwalo a nga dzi kodzago gu vbulugisa hamba mandzani ga nyamabhongwe.

⁸Nyamabhongwe a di phela gu dzi dandrisa ngudzu, aholu avbo a nga dzipwa nari ni tshivba nya yingi, kheho yaye nya yikhongolo yi di fanyega, vbatshani gwaye gu buga dzikheho dzina dzi dandra dzi khedza maphuvbo ya mana ya damboni.

⁹Khu ga mweyo nya idzo, gu di duga gikhehwana, gi dandra ngudzu, gi khedza Marandzi, Khugadambo ni ga Litigo li vbindrago Mayigo yatshavbo khu Wumburi.

¹⁰ Yi dandra kala yi ya ghuma sivangwa sa ndzadzini, yi baga simbe sivangwa ni dzinyeledzi yi si rinya mafuni yi si gandredzela.

¹¹Yi di dzi dandrisa kala yi dwana ni muthangeli nya sivangwa sa ndzadzini; yi mu dzegela phaso nya mhamba wu ningedwago khu litshigu ni litshigu ga muthangeli, gu pfhungumudwa wulanga nya miphaso wu dzudzugwa vbavbatshi.

¹²Khu kotani nya gughohe, sivangwa ni miphaso nya litshigu ni litshigu, si di ningedwa mandzani nya kheho. Kheho yi di dugelela ga satshavbo yi nga bani yi gu gira, lisine li di theswa vbavbatshi.

¹³Khu hwane, nyi dipwa gihathwa gi nga bani gi ganela; gimbe gihathwa gi di embela gile gi nga bani gi ganela, khigyo: “Silo sesi nyi si wonago khu giwoniso, si na simama kala lini si ganelago khu phaso nya litshigu ni litshigu, khu gughoha, si nga pfhungumudzisago nyumba nya miphaso, ni sivangwa si ningedwago si gandredzedwa khu migondro nya kheho, na?”

¹⁴Gi di nyi embela, khigyo: “Kala gu vbela magumavili na mararu mazana (2.300) dzimindru ni silambo, khavbo gu na gu agiswago nyumba nya miphaso.”

¹⁵Avbo eni Dhaniyeli, nyi nga wonago giwoniso gegi, na nyi nga gu vbweta guti tshamuselo waye, gu di wonega givangwa mbeli gwangu nya gufanane ni muthu.

¹⁶ Nyi dipwa lito nya muthu na li guta khu dzibambe nya tsongo wa Ulayi, na li huwata, khilo: “Gabriyeli, ninga muthu yoyo tshamuselo nya giwoniso.”

¹⁷Avbo a nga hidzimela vbafuvbi gwangu, nyi di mu wona, nyi tala khu hwanga nyi thega khu khovbe mafuni. Uye a di nyi embela, khuye: “Gyanana nya muthu, dziti nya gukhuwe giwoniso u gi wonidego, gya gu ganela khu matshigu nya guhegise.”

¹⁸A di ganela ni eni, na nyi titivade, khovbe yangu na yi pfugunyede mafuni. Khavbo avbo, uye a di nyi kuha a nyi khusa nyi ema.

¹⁹A nyi embela, khuye: “Nya gu vbweta gu gu embela iso si na dugelelago khu gikhati nya guhegise, a gu matshigu nya likhulo, kholu ayo ma na tadzisega khu gikhati gi vegisidwego nya mahegiso.”

²⁰Hamba nya dzikheho dzimbili u yi wonidego, ya gu yeyedza vafumeli va Medhi ni va Peresi.

²¹Aholu, nyamabhongwe nya mawoya khu mufumeli wa Gresiya, ni kheho nya yikhongolo yi nga dugago khu mahoni gwaye, khu mufumeli nya guhegule.

²²Kheho yi nga fanywago, wulangani gwaye gu buga dzikeho dzina, gu yeyedza gupwani gu na duga mifumo mina khu litigo la limwedo, aholu yi na bani yiri mwalo tshivba nya nga yaye.

²³Aholu, guhegisani nya mifumo yeyi, avbo sighohi si na gu bani si enedzide pimo wawe nya gufume, gu na dugelela mufumeli moyo nya khovbe nya guthise, nya mano nya guti siwudziso nya misihalo.

²⁴Uye a na bani nari ni tshivba, nasiri khu tshivba yaye. A na wusa vhilinganya nya gusamadzise, aholu uye a na dugelela ga satshavbo a gira esi a si golago. A na mbembisa dzimbe dzindrena ni sihathwa sa Nungungulu.

²⁵Khu kotani nya wugengeli ni mano yaye, a na dugelela ngudzu, monyoni gwaye gu na tala khu matshandza, a na mbembisa nya vangi va mu tumbago, bwelo khavbo a wugela ni Pfhumu nya dzipfhumu. Ambari khu kharato, a na mbembiswa, aholu nasiri khu mandza nya vathu.

²⁶Gasi khu mahungu nya giwoniso nya miphaso nya dzimindru ni silambo, u embedwego, khya lisine, gi vegedze monyoni, kholu gi na tadzisega hwane nya myaga nya gutale.

²⁷Gasi eni Dhaniyeli, nyi di vbela tshivba nyi dwala matshigwana. Khu hwane nyi di khuga nyi wuya thumoni ga mufumeli. Nyi di samadziswa ngudzu khu giwoniso gegi; mwalo a nga kodza gu gi pima.