Read gitonga Dhaniyeli 9 Bible Online

Dhaniyeli 9 - gitonga bible

Dhaniyeli 9

¹Khu mwaga nya guhegule nya gufume ga Dhariyo, mwamana wa Asuwero,[10] nya lihundzu nya Vamedhi, oyu a nga bani na emisidwe gu khala mufumeli nya mufumo wa Vakalidhiya.

² Khu mwaga nya guhegule nya gufume gwaye, eni Dhaniyeli, nyi di wu pima khu gu hevbula umo nya mabhuku, tengo nya myaga, eyi PFHUMU Nungungulu a nga ganelago ga muprofeti Jeremiya, gukhuye khu hwane nya livbandre na mavili magumi myaga, Jerusalema gu na pfhungumudwa gu khala marumbi.

³Khu guralo, nyi di khusedza maho yangu ga PFHUMU Nungungulu nyi gira milombelo, nyi lila ni guhala, nyi ambala silendra ni gu phorola nguma.

⁴Nyi di lombelela ga PFHUMU Nungungulu wangu, nyi dawulela sighoho sangu, kheni: Oh! Pfhumu! Nungungulu nya khongolo nya guthavisege, khu lihaladzo lago nya gutumbege, u vegedzago gidzumeledzwano ni avo va gu golago ni gu vegedza milayo yago;

⁵Hi ghohide, hi gira silo nya guvivbe, hi dzi vangede libango khu gu gu pfhurarela, hi hambana ni milayo ni sileletelo sago.

⁶Kha ha yingisa malito ya vaprofeti, sithumi sago, va ganedego khu lina lago ga vafumeli vathu, ga vathangeli vathu, ga vababe vathu, kha nga gambe ga vathu vatshavbo va tigoni.

⁷Uwe Pfhumu, u lulamide, aholu ethu muhuno hi tade khu dzitshoni kha nga u hi wonago. Ethu vathu va Judha, va Jerusalema ni vatshavbo va na Israyeli, avo va vbafuvbi, ni avo va hwindzo, mayigoni gwatshavbo u nga hi phalalegiselago umo khu kotani hi nga hambana nago, hi si gu tumbi.

⁸Ah! PFHUMU Nungungulu, ethu gumogo ni vafumeli vathu, vathangeli ni vakokwe vathu, hi tade khu dzitshoni kholu hi gu ghohedego.

⁹PFHUMU Nungungulu wathu, a na ni wuhindzi ni gu tsetselela, ambari hi mu ghohedego,

¹⁰kha ha yingisa PFHUMU Nungungulu wathu, ambari gu yingisa milayo u hi ningidego khu ga vaprofeti, sithumi sago.

¹¹Ina, vatshavbo va na Israyeli va ndragide nayo wago, va ndreya ndzilani, va yeyisa va si vbweti gu yingisa. Khu kotani nya isoso hi thegedwe khu libango, mitungu yi nga lowago Nayo ga Mosi, githumi gya Nungungulu, yi thegede vbatshani gwathu, kholu hi gu ghohede.

¹²U tadziside magana u ganedego vbakari gwathu, ni ga vathangeli vathu, u hi resede tshanisa nya yikhongolo. Mafuni gwatshavbo, gu si gu giregi nya nga esi si nga giregago Jerusalema.

¹³Latshavbo libango leli, li dugelede kha nga gu lovidwego Nayo wa Mosi. Ambari khu guralo, kha ha vbindrugedza hi lomba wuhindzi ga PFHUMU Nungungulu wathu, khu gu diga sighoho sathu hi landrisa lisine lago.

¹⁴Khu guralo, PFHUMU Nungungulu kha kanakana gu hi resela libango leli avbo gwathu, kholu PFHUMU Nungungulu wathu lulamide ga satshavbo a girago; ambari khu guralo, ethu kha hi mu yingisi.

¹⁵Khu lisine, Uwe PFHUMU Nungungulu wathu, u dusidego vathu vago khu tigoni ga Egipito khu gyandza gyago nya tshivba, u dzi girela lina nya wudhumo kala na muhuno, hi gu ghohede, hi gira silo nya guvivbe.

¹⁶Gasi olu, uwe Pfhumu, gukhedza khu sigiro sago satshavbo si lulamidego, hi ngu lomba u ndreyisa likhulo lago dhoropani gwago gwa Jerusalema, li guromo gigomoni gwago nya gukatege. Kholu sighoho sathu ni guvivba gu giridwego khu vababe vathu, va girede Jerusalema gumogo ni vathu vago gilo nya gihegiso ga mayigo ma hi randredego.

¹⁷Gasi olu, uwe Nungungulu wathu, hakha nombelo wa githumi gyago u yingisa gulila gwangu. Khu lihaladzo lago Pfhumu, wona khu maho nya wuhindzi nyumba yago nya miphaso yi digidwego.

¹⁸Nungungulu wangu, neredza ndzeve yago u yingisa; u tula maho yago u wona gu pfhungumudwa nya lidhoropa lago, li ranwago khu lina lago. Kholu kha hi giri gilombo gegi gwago khu gu na hiri valulami, aholu khu kotani nya wuhindzi wago nya wukhongolo.

¹⁹Uwe Pfhumu, yingisa! Pfhumu, divalela! Pfhumu, hi hakhe; thuma u nga hweli! Khu kotani nya lihaladzo lago, uwe Nungungulu wangu, u nga hweli; kholu lidhoropa lago ni vathu vago va gu ranwa khu lina lago.

²⁰Na nyi nga guganela ni gu lombelela, nyi dawulela sighoho sangu ni sighoho sa vathu vangu va na Israyeli, nyi resa gilombo gyangu ga PFHUMU Nungungulu wangu, khu kotani nya gigomo gyaye nya gukatege,

²¹ na nyi nga gu lombelela, a dita Gabriyeli, mwama yoyu nyi nga bani nyi mu wonide guhegulani khu giwoniso, na gu vbuvba khu guvbiredza ata nyi kuha khu gikhati nya phaso nya silambo.

²²Uye a dita nyi tivisa, a nyi embela, khuye: Dhaniyeli, olu nyi dzude gasi guta gu tula mapimo.

²³Guphelani nya milombelo yago, Nungungulu a gu ningide phindrulo, eni olu nya guta gu tivisa, kholu uwe u gigodwa. Khu guralo, olu yingisa esi nyi gu embelago gasi u wuti gwadi tshamuselo nya giwoniso.

²⁴Gu vegidwe livbandre na mavili magumi dzisemana (70) gikhati a gi dongisedego gasi gu tshudzisa vathu vago ni lidhoropa lago nya gukatege mugighohoni gumogo ni guvivba gwatshavbo, gasi va kodze gu tsetseledwa sighoho, gasi gu reswa gululama kala gupindruga, gasi gi tadzisege giwoniso nya wuprofeti wowu, ni gu todza Wulanga nya Guage Ngudzu.

²⁵Olu dziti gwadi ni gu pimisa esi: “Gukhugela gu nga duga sileletelo si rumago gu wusedza ni gu vbahedza Jerusalema, kala gu vboha Mesiya, uye a gu Pfhumu, gu na manega livbandre na dzimbili dzisemana; khu livbandre na limwedo magumi dzisemana. Gu na wusedzwa lidhoropa gu wusedzwa dzindzila ni makhokhola, aholu a na bani ari matshigu nya sigaradzo.”

²⁶Khu hwane nya livbandre na limwedo magumi dzisemana, Gihathwa gya Pfhumu, gi na songwa, kha gu na manega uye nya gu mu emele. Lidhoropa ni nyumba nya miphaso, si na khungumudwa khu dzinyimbi dza mufumeli a na gutago. Mahegiso gwaye gu na gira nga ndrambi yi resago nyimbi ni gu sasela nya gupfhungumule kala mahegiso; si vegisidwe kharato.

²⁷Khu semana mweyo basi, a na gira gidzumeledzwano gi tiyidego ni vathu nya vangi. Khu vbakari nya semana, a na vbedza miphaselo ni miningelo nya guhodze. Khu vbatshani nya gikoli nya Nyumba ya Nungungulu,[11] gu na vegwa githombe nya guthise, kala wu vboha tsayiso wu vegisidwego gu tsayisa mumbembisi.