Read gitonga Hoseya 10 Bible Online

Hoseya 10 - gitonga bible

Hoseya 10

¹Israyeli a diri lithembwe nya gunone nya miuvha, li nga bani li ninga mihandro. Avbo gu nga andra mihandro yaye, a di andrisa gambe ni sihuru saye nya miphaso, avbo litigo laye li nga bani li gu engedzelana gunona, khu guralo, va di gira sithombe nya wumburi.

²Myonyo yawe khya wudambane; khu guralo, va na rwala nandru wawe; PFHUMU Nungungulu a na kokelela sihuru sawe nya miphaso, a pandrelela sithombe sakone.

³Khu guralo, va na ganela, khavo: “Hi mwalo gambe mufumeli, kholu kha hi ningi githawo PFHUMU Nungungulu. Ambari na hiri ni mufumeli, a di hadza gu hi phasa khu ginani?”

⁴Va ganela magana nyamba phasa gilo, va sambanya malipha, va gu gira gidzumeledzwano; khu kotani nya isoso, malamulelo yawe, ma na buga nga mwasi nya kholowe wu hodzago dzimbewu dza mahangeni.

⁵Vathu va vbanyago Samariya va na thuswa khu githombe nya gimombyana gya Bheti-Avheni, kholu vathu vaye, va na lila khu kotani yaye, gumogo gambe ni tsawa waye nya vaphaseli nya sifananiso va nga bani va tsaka khu wudhumo waye, kholu thomba yawe yi dusidwego, vbakari gwawe.

⁶Gimombyana nigyo gi na dzegwa gi yiswa Asiriya, kha nga ndruwo ga mufumeli khongolo; gu na manega Pfilupfilu Efrayimi, aholu Israyeli a na khala dzitshoni khu kotani nya wusingalagadzi waye.

⁷Mufumeli wa Samariya a na songwa, a fanana ni liguvi la vbatshani nya mati.

⁸Malangani nya gukhugege ya Bheti-Avheni,[1] a gu tsindza nya giwono gya Israyeli, gu na pfhungumudwa; miba ni sirangalabwa, si buga vbatshani nya siluvelo sawe. Khavbo avbo, va na embela sigomo, khavo: “Hi fenengedzeni!” Ga sigomwana, khavo: “Hi futeleni!”

⁹ Gukhugela matshiguni ya Gibheya, uwe Israyeli u di gira sighoho, u simama gu gira kharato. Ina nyimbi kha mwa manwa khiyo tigoni ga Gibheya, khu guta vbweta va nya guvivbedwa khu monyo, gani?

¹⁰Nyi na va tsayisa gukhedza khidzo nyi golago khidzo; mayigo yatshavbo, ma na tombana ma va wugela vata va mola khu kotani va ghohidego guvili.

¹¹Kholu Efrayimi, a diri gimombyana nya ngadzi nya gurule gi hevbudzidwego, gi nga bani gi tsakela guvbula tirigu; khu guralo, nyi mu thede kanga thamoni gwaye nya wumburi. Efrayimi a na ndrindra kareta, Judha a na lima, va na Jakobe va na hagula.

¹² Dzi yaleleni gululama mwabune, mu vbwera mihandro nya wuwadi limani wulime nya mahange yanu, kholu egi khu gikhati nya guvbwete PFHUMU Nungungulu, kala a wuya, ata vbaladza gululama vbakari gwanu.

¹³Mu yade manyala, mu ngu vbwera guvivba, mu hodza handro nya malipha, kholu enu mu di tumba tshivba yanu mwabune, ni talo nya dzindrena dzanu.

¹⁴Khu guralo, vbakari nya vathu vago, gu na duga ghudzeghudze nya nyimbi, makhokhola yago yatshavbo ma na khungumudwa, kha nga Salamani a nga pfhungumula Bheti-Aribheli khu litshigu nya nyimbi, avbo mayime a nga vbadzuledwa gumogo ni sanana saye.

¹⁵Si na girega kharato avbo gwago, uwe Bheteli, khu kotani nya sighoho sago nya sikhongolo. Na gu nga gu duga wuronga, mufumeli wa Israyeli a na mbembisedwa muphelo.