Read gitonga Joyele 3 Bible Online

Joyele 3 - gitonga bible

Joyele 3

¹Dzitini gukhenu khu matshigu yoyo ni gikhati gyogyo, avbo nyi na wuyisago Judha ni Jerusalema khu wugumbitunu,

²nyi na tombanisa mayigo yatshavbo nyi ma reledza kovani ga Josafani;[2] iyoyo nyi na ya ma lamula khu kotani va dzegidego vathu vangu ni thomba yangu va na Israyeli, uye va mu phalalegisidego vbakari nya mayigo, va kabanisa litigo langu.

³Va kabanede vathu vangu khu gu gira nyatumbatumbane, va renga liphuphulu khu gyanana gimwegyo nya gikhwathana, va rengisa gyagadzyana khu vbinyu, gasi va sela.

⁴ Gasi mahungu muni mu gu nawo ni eni, enu vathu va Tiro, va na Sidhoni ni maphuvbo yatshavbo ya Finisiya? Khuwo owu tshatshazelo mu nyi ningago, gani? Kholu mwa gu nyi livbisa khu malivbiselo yaya, khu guvbiredza nyi na thesa tshatshazelo yanu mihungoni gwanu.

⁵Kha nga mu dzegidego parata ni ndralama yangu ni sombo sangu nya wuzundzo wumburi mu si vega dzinyumbani ga vanungungulu vanu;

⁶ni gu rengisani sanana sa Judha ni sa Jerusalema mu si ningela Vagereki, mu va yisa hwindzo ni tigoni gwawe nya mavelego.

⁷Wonani nya gukhenu nyi na va wuyisa khumo mu va rengisidego umo, iso mu va giredego si na thegela mihungoni gwanu.

⁸ Nyi na rengisa sanana sanu nya sikhwathana niso nya sagadzyana khu mandzani ga va na Judha, avo va naya rengisela va na Sebha vathu nya litigo li khadego hwindzo ngudzu, kholu nyi ganede eni PFHUMU Nungungulu.

⁹Huwelelani esi ga mayigo, khenu: Dzi lulamiseleni guya nyimbitunu, khendzugisani dzindrena, masotshwa yatshavbo nya nyimbi ma tshangane ma ya litungatunu.

¹⁰ Pfhulani matshari khu mavbadza yanu, ni sighalala khu migala yanu, embelani uye a vbedego tshivba, khenu: “Eni nyi na ni tshivba.

¹¹Tombanani enu mayigo nya vaakelane, mu ta tshangana mwatshavbo avba, Uwe PFHUMU Nungungulu reledza vbale dzindrena dzago!

¹² Mayigo ma na khuge ma ema, ma ta kovani ga Josafani, kholu khavbo vbale nyi na gu ya khalago, gasi gu lamula mayigo yatshavbo ma mi randredego.

¹³ Resani sivbwero, kholu gikhati nya guvbwere gi vbohide. Deluni hi relele hiya vhuva dziuvha, kholu gikhwati gi tade ngudzu, maphiso ma gu vbalagela kholu wuvivbi wawe wu tade ngudzu.

¹⁴Sidzemo ni sidzemo nya vathu si tade kovani gu lamuledwago mahungu! Kholu litshigu la PFHUMU Nungungulu lomo vbafuvbi, li na vboha kovani gu lamuledwago umo mahungu.

¹⁵Lidambo ni ngima si na sivbala, dzinyeledzi kha dzi na khedziga.

¹⁶ PFHUMU Nungungulu a na bhonga khu Siyoni, lito laye li na dzuma khu Jerusalema; gu ndrendremela ndzadzi ni mafu, aholu PFHUMU Nungungulu a na khala wuthavelo nya vathu vaye ni likhokhola la va na Israyeli.

¹⁷Khavbo avbo, mu na dzitini nya gukhenu: Eni kheni PFHUMU Nungungulu wanu, nyi vbanyago Siyoni, gigomoni gwangu nya gukatege; Lidhoropa la Jerusalema li na bani li kategide, vathu nya mambe mayigo, gima kha va na li khozisa gambe.

¹⁸Khu litshigu lolo, sigomo si na ruta vbinyu nya yiphya ni sigomwana si na goga mahwe, mitsongo yatshavbo ya tigoni ga Judha, yi na tala khu mati; gu na duga gifefe nya mati khu Nyumbani ga PFHUMU Nungungulu, gi theledzela kovani wa Sitimi.

¹⁹Litigo la Egipito li na khala marumbi, Edhomi a na vbindrugedza a khala giwula nya gihala, khu kotani nya wusaseli va nga wu girago ga va na Judha, va vbaladzide tigoni novba nyambana nandru.

²⁰Aholu litigo la Judha li na bani liri ni vathu kala gupindruga, Jerusalema nuye khu mimela ni mimelana.

²¹Nyi na agisa novba wa avo nyi nga bani nyi si gu va agisi, kholu PFHUMU Nungungulu a na khala dhoropani ga Siyoni.