Read gitonga Amosi 9 Bible Online

Amosi 9 - gitonga bible

Amosi 9

¹Nyi di wona Pfhumu na emide vbafuvbi ni giluvelo, a nyi embela, khuye: “Veta mihungo nya madingo, gasi gu ndrendremedzisa mihasimo. U yi pandrelela yi khala sipandre si thegela vbatshani nya mihungo ya vathu vatshavbo va guromo umo; nyi na va songa khu litshari, kala nyi vboha ga uye nya mahegiso wawe. Mwalo ni moyo wawe a na tutumago, ambari gu vbuluga.

²Ambari va gu kemba kala va vboha phalani nya vafi, gyandza gyangu gi naya va dusa khumo; va gu lita kala Ndzadzini, nyi naya va tshigisa khiyoyo.

³Va guya sihala tshokhatunu nya gigomo gya Karimelo, nyi naya va dusa khiyoyo, nyi va rinya vbavbatshi. Ambari va guya sihala nondrwani nya linene, va dzimela mahoni gwangu, nyi na rumela Nyoga nya yikhongolo yi ya va hodza.

⁴Ambari va gu yiswa wugumbitunu khu valala vawe, nyi na va rumela litshari li ya va songa. Nyi na va khedza khu maho nya guvivbe, nasiri khu wuwadi.

⁵Kholu Mune, PFHUMU Nungungulu nya Tshivba Yatshavbo, khuye a khuhago mafu, ayo ma nyiviliga, vatshavbo va vbanyago umo va na lila; ma gugumuga mati yatshavbo gu fanana ni tsongo wa Nilo, bwelo havbo ma bosa gu fanana ni tsongo wa Egipito.

⁶Nungungulu khuye a vbahago dzinyumba dzaye vbatshani Ndzadzini, a thawuludza ndzadzi yi fenengedza mafu, khuye a ranago mati nya linene a ma guhula vbatshani nya mafu. Lina laye khuye PFHUMU Nungungulu.

⁷Ina enu va na Israyeli, avbo gwangu kha mu khali kha nga sanana nya Vaetiyopiya, gani kha nga idzo nyi golago khidzo Vaetiyopiya, gani? A ngu ganela PFHUMU Nungungulu. Ina kha nya dusa va na Israyeli khu tigoni ga Egipito, ni Vafilisitiya khu tigoni ga Kafitori, ni Vaasiriya khu tigoni ga Kiri, gani?

⁸Wonani nya gukhenu maho ya PFHUMU Nungungulu, ma ngu wugela mufumo yoyu nya gighohi. Nyi na wu mbembisa wu fuva mafuni; aholu kha nyi na mbembisa muphelo livelego la Jakobe,” a ngu ganela PFHUMU Nungungulu.

⁹Kholu wonani nya gukhenu nyi na rumela, nyumba ya Israyeli yi vbevberwa vbakari nya mayigo yatshavbo, kha nga idzo gu vbevberwago khidzo mavbila khu gisalava gu si thegi ni tshotha mweyo mafuni.

¹⁰Sighohi satshavbo si guromo vbakari ga vathu vangu, si na songwa khu matshari, vatshavbo va ganelago, khavo: Gima kha hi na thegedwa khu libango ambari guvbohedwa khilo.

¹¹Khu litshigu lolo, nyi na wusa gambe tshatsha wa Dhavhidhe wu thegidego. Nyi tshikedzela malufa yaye, nyi wusa marumbi yaye. Nyi na wu vbahedza nga idzo wu nga bani ma romo khidzo khu gale;

¹² gasi vathu vangu va fumela mitshaledwa ya Edhomi ni mayigo yatshavbo ma ranwago khu lina langu, a ngu ganela PFHUMU Nungungulu, a girago silo sesi.

¹³Wonani nya gukhenu ma nguta matshigu, a ngu ganela PFHUMU Nungungulu, mulimi a na gu fananago ni uye a vbwerago, ni uye a gamago dziuvha, a fanana ni oyu a yalago mbewu; sigomo si na ruta vhinya, sigomwana satshavbo si na nyiviliga.

¹⁴Nyi na wuyisa vathu vangu va na Israyeli khu wugumbitunu, va ta vbahedza marumbi nya madhoropa yawe, va khala umo. Va na yala miuvha, va sela vhinya yaye, va yala misimbo, va hodza mihandro yakone.

¹⁵Nyi na va yala tigoni gwawe, gima kha va na sigudwa gambe ga litigo nyi va ningidego, a ngu ganela PFHUMU Nungungulu wago.