Read gitonga Jona 3 Bible Online

Jona 3 - gitonga bible

Jona 3

¹Lito la PFHUMU Nungungulu li dita nya wuvili ga Jona, li ta mu embela, khilo:

²“Khuga u hongole Ninivha, lidhoropa nya likhongolo, u ya huwelela magana nyi na gu embelago.”

³Khavbo avbo, Jona a di khuga a hongola Ninivha, kha nga idzo a ganedego khidzo PFHUMU Nungungulu. Ninivha a diri lidhoropa nya likhongolo ngudzu mbeli ga Nungungulu, li di gu dzega matshigu mararu gu li dzuwuluga.

⁴ Jona a di bela dhoropani a gimbila litshigu rumba a huwelela, khuye: “Gu nga tshade gipimo nya magumana matshigu, Ninivha gu na pfhungumudwa.”

⁵Vathu va Ninivha va di khodwa ga Nungungulu, va emisa litshigu nya guhale, va ambala dzisaku, gukhugela avo nya vakhongolo kala avo nya vadugwane.

⁶Mahungu yaya ma di vboha dzindzeveni ga mufumeli wa Ninivha; uye a di khuga khu vbagikhalotunu gwaye nya wufumu, a tshula dzingandzu nya wufumu, a ambala dzisaku, a puluwundra ngumani.

⁷A di rumela gukhuye gu wombwa pundru tigoni gwa Ninivha, gupwani: “Khu gurumela ga mufumeli ni vathangeli vaye, vathu ni sirengo, mitshambi nya dzinvuta ni dzimombe va nga hodzi gilo; ambari gu sela mati!

⁸Aholu, vathu ni sirengo va na ambale dzisaku, va lila khu tshivba yawe yatshavbo ga Nungungulu. Muthu ni muthu a leya ndzilani gwaye nya guvivbe a hambane ni wughevenga wa mandzani gwaye.

⁹A gu dzina saye Nungungulu a na dzi laya a bosa giviti nya likhulo laye, gasi hi si mbembi.”

¹⁰Nungungulu a di wona esi va nga girago, nidzo va nga vbindrugedzago khidzo ndzilani gwawe nya guvivbe. A di dzi laya khu guvivba a nga vbweta gu va girela, a si va mbembisi kha nga a nga bani na ganede.