Read gitonga Jona 4 Bible Online

Jona 4 - gitonga bible

Jona 4

¹Khu kotani nya isoso, Jona kha nga tsaka, a di swihala a vbisega.

² A di lombelela ga PFHUMU Nungungulu, khuye: “Oh! PFHUMU Nungungulu! Ina khandriso esi nyi nga gu embelago, na nyi ngari tigoni gwangu, gani? Khiso si nga nyi gira nyi thava nyi tutumela tigoni ga Tarisisi, kholu nyi di gu dziti gukheni uwe u Nungungulu nya wuhigo, u tadego khu wuhindzi, u hwelago gugoroga, na wu tade khu wuwadi, u si goligo gu gira silo nyamba sadi.

³ Khu guralo, uwe PFHUMU Nungungulu, nyi ngu gu lomba u nyi songe, kholu i tshukwana gufa guvbindra guvbanya.”

⁴PFHUMU Nungungulu a di mu embela, khuye: “Ina u na ni fanelo nya gugoroge kharato, gani?”

⁵Khavbo avbo, Jona a di duga dhoropani, aya khala khu phuvbo ga Khugadambo nya lidhoropa, a dzi vbahela tshatsha avbovbo, a khala mutsani nya simbo, gasi gu wona igyo gi na dugelelago ga lidhoropa la Ninivha.

⁶Khavbo avbo, PFHUMU Nungungulu a di bugisa tshafura nya gulaphe wu vega mahagane vbatshani ga Jona, wu gira mutsa vbatshani nya hungo waye, wu mu tshula guvbisegani gwaye. Jona a di tsaka ngudzu khu khungu wowo.

⁷Aholu, khu litshigu li landrelago na gu ngari dzimindru, Nungungulu a di rumela giwungu gasi guya hodza khungu, uwo wu di banga.

⁸Avbo li nga duga lidambo, Nungungulu a di rumela phuvbo nya guvbise nya gute khu Khugadambo, lidambo li di vbisa hungo wa Jona, uye a di titivala, a lomba gufa, khuye: “Avbo gwangu i tshukwana gufa guvbindra guvbanya.”

⁹Khavbo avbo, Nungungulu a di embela Jona, khuye: “Ina wa gu pimisa gukhuwe u na ni fanelo nya gugoroge khu khungu yoyu, gani?” Uye a di hakha, khuye: Nyi ngu yela nyi manega ni giviti kala nyifa.

¹⁰PFHUMU Nungungulu a di engedza a mu wudzisa, khuye: “Ina wa gupwa wuvi khu simbo, u ngamba wupwa wuvi gu wu yala ni gu wu dandrisa, uwo wu nga bugago khu litshigu limwedo wu dandra gambe khu litshigu limwedo.

¹¹Ina kha nyi yeli gu pwela gisiro lidhoropa nya likhongolo la Ninivha, eli li gu na ni guvbindra lizana ni magumavili mazana vathu, va si kodzigo gu hambanisa gyandza gya nyamudye nigyo gya nyambade, na liri ni sifuyo nya singi, gani?”